ទិដ្ឋភាពពិធីជប់លៀងមង្គលការ ដួង ម៉ានិច និង Lyderzz ត្រៀមរៀបចំទទួលភ្ញៀវនៅសមុទ្រល្ងាចនេះ

ក្រោយពីបានរៀបចំកម្មវិធីមង្គលការតាមប្រពៃណី និង ចុះសំបុត្រអាពាហ៍ពិពាហ៍ ដោយមានការចូលរួមពីចាស់ទុំទាំងសងខាងកាលពីថ្ងៃទី ១០ ខែមេសា ឆ្នាំ ២០២៤ កន្លងទៅនោះ ទីបំផុតថ្ងៃបំពេញក្តីស្រមៃរៀបការនៅមាត់សមុទ្ររបស់ ដួង ម៉ានិច និង លោក Lyderzz បានមកដល់ហើយ។

ក្នុងនោះ កម្មវិធីជប់លៀងជួបជុំមិត្តភក្តិ អបអរថ្ងៃមង្គលការរបស់ ដួង ម៉ានិច និង Lyderzz នឹងរៀបចំនៅឯក្រុងព្រះសីហនុ ចាប់ពីវេលាម៉ោង ៣ ថ្ងៃទី ២២ ខែមេសា ឆ្នាំ ២០២៤ នេះ។

យ៉ាងណាមិញ មុនពិធីជប់លៀងឈានមកដល់ បើតាមការបង្ហោះ story ខ្លីៗរបស់កូនកំលោះកូនក្រមុំនោះ អ្នកទាំង ២ កំពុងថតរូបអនុស្សាវរីយ៍បណ្តើរ និង រង់ចាំទទួលភ្ញៀវនារសៀលនេះ។

ម្យ៉ាងវិញទៀត បើក្រឡេកទៅមើលការតុបតែងរោងមង្គលការវិញមើលទៅហាក់ដូចជាស្រស់ស្អាតមួយបែប ដោយ ដួង ម៉ានិច និង Lyderzz បានជ្រើសរើសផ្កាពណ៌សមកតាំងលម្អតាមផ្លូវ និង ខ្លោងទ្វារចូលកម្មវិធីផងដែរ៕