ជប៉ុន ប្រទះឃើញផ្កាយដុះកន្ទុយទាំងព្រលឹម មហាជនឃើញហើយ នឹកគិតដល់ប្រផ្នូលមិនល្អ

តាំងពីបើកក្បាលឆ្នាំ ២០២៤ មក គេសង្កេតឃើញថា ប្រទេសជប៉ុនចេះមានរឿងរ៉ាវមិនឈប់ឈរសោះ ទាំងគ្រោះធម្មជាតិរញ្ជួញដី ទាំងអគ្គិភ័យ ព្រមទាំងឧប្បទ្ទវហេតុមួយចំនួនទៀត។

យ៉ាងណាមិញ ហេតុការណ៍ទាំងនេះ បានធ្វើឱ្យប្រជាជនជប៉ុនមួយចំនួន កំពុងតែស្ថិតនៅក្នុងភាពព្រួយបារម្ភនៅឡើយ ព្រោះមើលទៅគ្រោះធម្មជាតិផ្សេងៗ ព្រមទាំងឧប្បទ្ទវហេតុ ក៏នៅតែសម្តែងខ្លួនដោយមិនបានរំពឹងទុកនោះទេ។ ដោយឡែក ថ្មីៗនេះ ប្រទេសជប៉ុនក៏បានប្រទះឃើញផ្កាយដុះកន្ទុយមួយ ដែលធ្លាក់មកទាំងព្រឹកព្រលឹម រឹតតែធ្វើឱ្យមហាជនមួយចំនួន នឹកភ័យទៅដល់រឿងមិនល្អថែមទៀត។

ផ្កាយមួយនេះ ត្រូវបានគេដឹងថា បានធ្លាក់នៅម៉ោងប្រមាណ ៦ និង ៥៩ នាទី នាព្រឹកថ្ងៃទី ១៥ ខែមករា ឆ្នាំ ២០២៤ នេះ ដោយមានប្រជាជនក្នុងតំបន់ជាច្រើន នៅក្នុងប្រទេសបានឃើញ។ ក្នុងនោះ មហាជនមួយចំនួន​ ក៏ចាប់អារម្មណ៍ទៅលើបាតុភូតមួយនេះថាជារឿងវិទ្យាសាស្រ្ត ឯអ្នកខ្លះទៀតក៏គិតថាជារឿងអបិយជំនឿ ព្រោះឱ្យតែមានផ្កាយដុះកន្ទុយធ្លាក់មកបែបនេះ ស្រុកទេសគឺមិនផុតពីគ្រោះនោះទេ ដែលជាក់ស្តែងប្រទេសជប៉ុនក៏ជួបគ្រោះច្រើនមកហើយនៅក្នុងដើមឆ្នាំនេះ ហើយក៏មិនដឹងថានឹងជួបអ្វីទៀតនោះដែរ៕