ជ្រះថ្លាណាស់! ព្រះអង្គ ចន្ទ មុនី បានថ្វាយថវិកាជាង ១ ម៉ឺនដុល្លារដល់សម្ដេច បួរ គ្រី សម្រាប់អភិវឌ្ឍពុទ្ធិកសិក្សា

កាលពីថ្ងៃទី ១៤ ខែមករា ឆ្នាំ ២០២៤ កន្លងទៅ ព្រះធម្មវនវាសី ចន្ទ មុន្នី បានចូលក្រាបបង្គំគាល់សម្តេចព្រះមហាសង្ឃរាជ បួរ គ្រី និង មានសទ្ធាជ្រះថ្លាថ្វាយបច្ច័យកសាងពុទ្ធិកសាកលវិទ្យាល័យព្រះសីហមុនីរាជា ជាង ១ ម៉ឺនដុល្លារ។

យោងតាមការបង្ហោះរបស់ឯកឧត្ដម ងួន ស្ដេចភក្ដី សាកលវិទ្យាធិការងពុទ្ធិកសាកលវិទ្យាល័យព្រះសីហមុនីរាជា បានបង្ហោះសារជាព័ត៌មានឱ្យបានដឹង នៅព្រឹកថ្ងៃទី ១៤ ខែមករា ឆ្នាំ ២០២៤ កន្លងទៅ សម្តេចព្រះមហាសង្ឃរាជ បួរ គ្រី ព្រះសាកលវិទ្យាធិការ បានព្រះរាជានុញ្ញាតទទួលការចូលបង្គំគាល់សម្តែងការគួរសម ពីព្រះអង្គ ចន្ទ មុន្នី អមដំណើរ ដោយថ្នាក់ដឹកនាំពុទ្ធិកសាកលវិទ្យាល័យព្រះសីហមុនីរាជា ហើយក្នុងឱកាសនៃការចូលបង្គំគាល់សម្តែងការគួរសមនេះ សម្តេចជាអម្ចាស់ បានយាងដំណើរព្រះអង្គចន្ទ មុន្នី ទស្សនកិច្ច និង មានព្រះរាជបន្ទូលសំណេះសំណាលពីវឌ្ឍនភាពរបស់ពុទ្ធិកសាកលវិទ្យាល័យព្រះសីហមុនីរាជា។

ជាមួយគ្នានេះដែរ ព្រះអង្គ ចន្ទ មុន្នី ក៏បានសម្តែងការកោតសរសើរ និង សាទរពីភាពជោគជ័យ ដែលកើតចេញពីការយកព្រះទ័យទុកដាក់ ខិតខំអភិវឌ្ឍរបស់សម្តេចជាអម្ចាស់ រួមទាំងមានសទ្ធាជ្រះថ្លាថ្វាយបច្ច័យកសាងចំនួន ១០ ០០០ ដុល្លារ សម្រាប់បន្តការអភិវឌ្ឍន៍សាកលវិទ្យាល័យ និង បច្ច័យទិញកៅអីសិក្សាចំនួន ២ ៥០០ ដុល្លារ សម្រាប់ទិញកៅអីនិស្សិតអង្គុយសិក្សានៅពុទ្ធិកសាកលវិទ្យាល័យព្រះសីហមុនីរាជា ដែលកំពុងមានការខ្វះខាតផងដែរ៕