ក្រសួងសុខាភិបាល ប្រកាសរកឃើញជំងឺអុតស្វា ២ ករណីថ្មីទៀតហើយ
កាលពីថ្ងៃទី ៣ ខែមករា ឆ្នាំ ២០២៤ កន្លងទៅ ក្រសួងសុខាភិបាល នៃព្រះរាជាណាចក្រកម្ពុជា បានចេញសេចក្តីប្រកាសព័ត៌មានស្តីពី ការរកឃើញជំងឺអុតស្វា ២ ករណីបន្ថែមទៀត។
យោងតាមសេចក្ដីប្រកាសព័ត៌មាន ក្រសួងសុខាភិបាលបានឱ្យដឹងថា លទ្ធផលទទួលបានពីវិទ្យាស្ថានជាតិសុខភាពសាធារណៈគិតត្រឹមថ្ងៃទី ៣ ខែមករា ឆ្នាំ ២០២៤ បានរកឃើញករណី ជំងឺអុតស្វា ២ ករណីបន្ថែមទៀតសរុបចំនួន ៣ ករណី ហើយក្រោយពីទទួលបានលទ្ធផលវិជ្ជមានវីរុសអុតស្វា អ្នកជំងឺបានដាក់ឱ្យនៅសម្រាកព្យាបាលដាច់ ដោយឡែកនៅក្នុងមន្ទីរពេទ្យបានយ៉ាងត្រឹមត្រូវ។
ជាមួយគ្នានេះដែរ ក្រសួងសុខាភិបាល ក៏បានអំពាវនាវក្រើនរំលឹកដល់បងប្អូនប្រជាពលរដ្ឋទាំងអស់ឱ្យយកចិត្តទុកដាក់ប្រុងប្រយ័ត្នផ្ទាល់ខ្លួនប្រកប ដោយស្មារតីទទួលខុសត្រូវខ្ពស់ ដើម្បីបង្ការនូវការចម្លងជំងឺអុតស្វាដោយស្វែងយល់របៀបឆ្លង និង ត្រូវអនុវត្តនូវវិធានការបង្ការនានាដូចជា ៖
១. របៀបចម្លង ៖
• វីរុសអុតស្វា ឆ្លងពីមនុស្សម្នាក់ ទៅមនុស្សម្នាក់ទៀត តាមរយៈការរួមភេទគ្រប់ទម្រង់ ជាមួយអ្នកជំងឺ អុតស្វា និង ការប៉ះពាល់ដោយផ្ទាល់នឹងកន្លែងមានដំបៅ ទឹកសារពាង្គកាយ ទឹកមាត់ តំណក់តូចៗ តាមផ្លូវដង្ហើម និង សម្ភារៈប្រើប្រាស់ ដែលប្រឡាក់ប្រឡូសជាមួយនឹងវីរុស រួមមាន សម្លៀកបំពាក់ ពូក កន្សែង ឬសម្ភារៈ ស្លាបព្រា ចាន កែវទឹក ។ល។
• វីរុសអុតស្វា ឆ្លងពីម្ដាយទៅកូនតាមរយៈទងសុក ក្នុងអំឡុងពេល ឬក្រោយពេលសម្រាល តាមរយៈការប៉ះផ្ទាល់ បើស្ត្រីមានផ្ទៃពោះឬឪពុកម្តាយមានជំងឺអុតស្វា។
២. វិធានការបង្ការការចម្លងជំងឺអុតស្វា ៖
• អនុវត្តការរួមភេទ ដែលមានសុវត្ថិភាព ដោយប្រើប្រាស់ស្រោមអនាម័យរាល់ពេលរួមភេទ និង ចៀសវាង មានដៃគូរួមភេទច្រើន។
• ចៀសវាងប៉ះពាល់ផ្ទាល់ ជាមួយអ្នក ដែលមានចេញរោគសញ្ញាជំងឺអុតស្វា។
• ចៀសវាងការប៉ះពាល់ ជាមួយសម្លៀកបំពាក់ កម្រាលពូកខ្នើយ ឬកន្សែងពោះគោ ឬ ចាន ស្លាបព្រា ឬពែង ឬផ្ទៃនៃទីតាំង ដែលអ្នកមានជំងឺអុតស្វាប្រើប្រាស់។
• ចៀសវាងការប៉ះពាល់ជាមួយតំណក់ទឹកចេញពីផ្លូវដង្ហើម ឬសារធាតុរាវតាមមាត់របស់អ្នកជំងឺអុតស្វា។
• អនុវត្តអនាម័យដៃ ដោយលាងសម្អាតដៃជាមួយទឹកនឹងសាប៊ូ ឬដែលលាងដៃ ឬអាល់កុលលាងដៃ។
ដោយឡែក ចំពោះបុគ្គល ដែលសង្ស័យ ឬបញ្ជាក់ថាមាន ជំងឺអុតស្វា ត្រូវតែដាក់ឱ្យនៅដាច់ ដោយឡែករហូតដល់ក្រមរ ជ្រុះអស់ និង ទទួលលទ្ធផលអវិជ្ជមានវីរុសអុតស្វា ហើយបុគ្គល ដែលផ្តល់ការថែទាំអ្នកជំងឺអុតស្វា ត្រូវតែប្រើប្រាស់វិធានការការពារខ្លួនឱ្យបានត្រឹមត្រូវ។
យ៉ាងណាមិញ ចំពោះបុគ្គលមានរោគសញ្ញាដូចជា កន្ទួលរមាស់ជាមួយពងទឹកនៅលើមុខ បាតដៃ ជើង ដងខ្លួន ភ្នែក មាត់ ឬប្រដាប់ភេទ គ្រុនក្តៅ ហើមកូនកណ្តុរ ឈឺក្បាល ឈឺសាច់ដុំ និង ឈឺចង្កេះ អស់កម្លាំង ទោះបានប៉ះពាល់ផ្ទាល់ជាមួយអ្នកជំងឺអុតស្វា ឬមិនមានប្រវត្តិប៉ះពាល់ជាមួយអ្នកជំងឺអុតស្វា ត្រូវទៅពិគ្រោះយោបល់ជាមួយមណ្ឌលសុខភាព ឬមន្ទីរពេទ្យ ដើម្បីធ្វើការពិនិត្យ ពិគ្រោះ ឬធ្វើតេស្តរកជំងឺអុតស្វា ឬទូរស័ព្ទមកកាន់លេខ ១១៥ ដើម្បីទទួលបានការណែនាំ និង ពិគ្រោះយោបល់៕
