ផ្ទូះការសរសើរខ្លាំង! លោក ខាត់ វៃហាំង បង្ហាញវត្តមានជាមួយនឹងឈុតសម្លៀកបំពាក់ពណ៌សរំលេចនូវខោលមុខយក្ស និង ក្រវ៉ាត់ករូបទង់ជាតិខ្មែរ
មកដល់ថ្ងៃទី ២១ ខែធ្នូ ឆ្នាំ ២០២៣ នេះ ជាថ្ងៃទី ៣ ហើយដែលតារាសម្ដែងប្រុសដ៏ឆ្នើមលោក ខាត់ វៃហាំង និង កញ្ញា ស៊ីន យូប៊ីន តំណាងសិល្បករកម្ពុជាទទួលបានការអញ្ជើញចូលរួមកម្មវិធីសប្តាហ៍ផ្លាស់ប្តូរវប្បធម៌ និង ភាពយន្តកម្ពុជា-ចិន នៅសៀកមិន ខេត្តហ្វុចូវ នាឱកាសខួបទី ៦៥ នៃចំណងមិត្តភាពកម្ពុជា-ចិន។
ពិតណាស់ ក្នុងការចូលរួមកម្មវិធីសប្តាហ៍ផ្លាស់ប្តូរវប្បធម៌ និង ភាពយន្តកម្ពុជា-ចិន ២០២៣ នាប៉ុន្មានថ្ងៃនេះ លោក ខាត់ វៃហាំង និង កញ្ញា ស៊ីន យូប៊ីន បានបង្ហាញពីសកម្មភាពពេញដោយមោទភាពជាបន្តបន្ទាប់លើឆាកអន្តរជាតិនាប្រទេសចិននេះដែរ។
យ៉ាងណាមិញ ដំណើរការនៃចូលរួមរបស់តារាសម្ដែងប្រុសស្រីមួយគូនេះ នៅថ្ងៃទី ៣ ជាកម្មវិធី Cambodia Night ក្រឡេកទៅមើលលោក ខាត់ វៃហាំង វិញកំពុងទទួលបានការចាប់អារម្មណ៍ និង សរសើរខ្លាំង ក្រោយពីបានឃើញលោកបង្ហាញវត្តមានជាមួយនឹងឈុតសម្លៀកបំពាក់ពណ៌សរំលេចនូវខោលមុខយក្ស និង ក្រវ៉ាត់ករូបទង់ជាតិខ្មែរ ដែលបង្ហាញពីអត្តសញាណខ្មែរឱ្យពិភពបានឃើញអ្វីដែលខ្មែរមានលើឆាកនេះ។
ក្នុងនោះ លោក ខាត់ វៃហាំង ក៏បានសរសេរភ្ជាប់ជាមួយរូបភាពថា ៖ «កុំខ្លាចនឹងគេថា យេីងត្រូវហ៊ានបង្ហាញនូវអ្វីដែលយើងមាន! ខោលមុខយក្ស ក្នុងកម្មវិធី Cambodia Night របស់សប្តាហ៍ផ្លាស់ប្តូរវប្បធម៌ កម្ពុជា-ចិន ទីក្រុងសៀកមិន ប្រទេសចិន»៕
