យុវជនស្ម័គ្រចិត្តជាង ៥ពាន់នាក់ បានចូលរួមក្នុងការរៀបចំព្រឹត្តិការណ៍អង្គរសង្រ្កាន្ត ឆ្នាំ២០២៥ ឱ្យមានភាពសម្បូរបែប

(ភ្នំពេញ)៖ ក្រុមការងារអង្គរសង្ក្រាន្ត បានទទួលយុវជនស្ម័គ្រចិត្តជាង ៥ពាន់នាក់ ចូលរួមក្នុងការរៀបចំព្រឹត្តិការណ៍អង្គរសង្រ្កាន្ត ឆ្នាំ២០២៥ ឱ្យមានភាពសម្បូរបែប ក្នុងនោះ យុវជន ២/៣ មកពីបណ្តាខេត្ត-រាជធានី និង ១/៣ យុវជនស្ម័គ្រចិត្ត នៅខេត្តសៀមរាបស្រាប់ ហើយក្រុមយុវជនទាំងអស់ សុទ្ធតែទទួលបាននូវការផ្គត់ផ្គង់កន្លែងស្នាក់នៅសមរម្យ អាហារ និងសេវាដឹកជញ្ជូនផងដែរ ។ នេះជាការបញ្ជាក់របស់ឯកឧត្តម សុខ សប្បាយណា ប្រធានក្រុមការងារប្រតិបត្តិនៃព្រឹត្តិការណ៍អង្គរសង្ក្រាន្ដ នាព្រឹកថ្ងៃទី៥ ខែមេសា ឆ្នាំ២០២៥ ក្នុងសិក្ខាសាលាតម្រង់ទិស និងផ្តល់ព័ត៌មានលម្អិត ជូនយុវជនស្ម័គ្រចិត្តទាំងអស់ បានស្វែងយល់ឱ្យកាន់តែច្បាស់អំពីព្រឹត្តិការណ៍អង្គរសង្ក្រាន្ត ឆ្នាំ២០២៥ ដើម្បីត្រៀមខ្លួននៅក្នុងការរៀបចំព្រឹត្តិការណ៍នេះឱ្យមានភាពសម្បូរបែប និងដោយរលូន រង់ចាំស្វាគមន៍ភ្ញៀវជាតិ និងអន្ដរជាតិ ។

នៅក្នុងឱកាសនេះ ឯកឧត្តម សុខ សប្បាយណា បានធ្វើជាវាគ្មិនកិត្តិយសធ្វើបទបង្ហាញអំពីការរៀបចំ នៃព្រឹត្តិការណ៍អង្គរសង្ក្រាន្ដឆ្នាំ២០២៥ ដោយមានប្រសាសន៍ថា អង្គរសង្ក្រាន្តឆ្នាំ២០២៣ កន្លងទៅ ខេត្តសៀមរាប មានភ្ញៀវទេសចរជាតិ អន្តរជាតិជាង ២លាន១សែននាក់ ដែលជាមធ្យមភ្ញៀវទេសចរម្នាក់ៗ ចាយលុយអស់ប្រមាណ ៦០ដុល្លារ សម្រាប់អាហារ ថ្លៃស្នាក់នៅ និងសេវាដឹកជញ្ជូន ។ តាមតួលេខពីក្រសួងទេសចរណ៍ ខេត្តសៀមរាប បានទទួលចំណូលប្រមាណ ១០០លានដុល្លារ ពីវិស័យទេសចរណ៍ក្នុងខេត្ត និងបានចាក់ចំណូលថវិកាចូលសេដ្ឋកិច្ចជាតិ ។

ប្រធានក្រុមការងារប្រតិបត្តិនៃព្រឹត្តិការណ៍អង្គរសង្ក្រាន្ដ សង្ឃឹមថា អង្គរសង្ក្រាន្តឆ្នាំ២០២៥ នឹងនាំចំណូលថវិកាដល់ទេសចរណ៍ខេត្តសៀមរាប និងចាក់បំពេញចំណូលសេដ្ឋកិច្ចជាតិ កាន់តែធំជាងឆ្នាំមុនៗ និងបានផ្សព្វផ្សាយអង្គរសង្ក្រាន្តកាន់តែធំទូលាយទៅលើឆាកអន្តរជាតិ ។ ព្រឹត្តិការណ៍អង្គរសង្ក្រាន្ត ឆ្នាំ២០២៥ នឹងដំណើរការ នាថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ រៀបចំឡើងនៅលើទីតាំងចំនួន ៦ ដោយមានកម្មវិធីចំនួន ៣៨ សុទ្ធសឹងជាកម្មវិធីផ្ដល់ជូននូវភាពសប្បាយរីករាយដល់មហាគ្រួសារខ្មែរ ពិសេស យុវជន បានចូលរួមឈ្វេងយល់ពីមរតកវប្បធម៌ខ្មែរជាច្រើនទម្រង់ ដែលត្រូវបានលើកយកមករំលេចនៅក្នុងកម្មវិធីនីមួយៗ ក្នុងគោលដៅបំផុសស្មារតីស្រឡាញ់ និងលើកស្ទួយវប្បធម៌ជាតិ ។

យុវជន វ៉ាន់ វ៉េងស្រេង ក្រុមកាយរឹទ្ធិរៀមច្បងរាជធានីភ្នំពេញ បានឱ្យដឹងថា ការចូលរួមជាយុវជនស្ម័គ្រចិត្តនៃព្រឹត្តិការណ៍អង្គរសង្ក្រាន្ដ បានជួយលើការផ្សព្វផ្សាយវប្បធម៌ដើម្បីជំរុញភ្ញៀវទេសចរណ៍ឱ្យលេងកម្សាន្តបានច្រើន និងទទួលបានបទពិសោធន៍ពីការងារដែលមិនធ្លាប់បានធ្វើពីមុនមក ដូចជា៖ កិច្ចសហការជាក្រុម ការស្នាក់នៅរួម និងធ្វើដំណើររួមជាដើម ។ យុវជន វ៉ាន់ វ៉េងស្រេង បានលើកទឹកចិត្តដល់យុវជនយើង ចូលរួមក្នុងកិច្ចការងារសង្គមដោយស្ម័គ្រឱ្យបានច្រើន ព្រោះការងារនេះ ពេលខ្លះបានផ្ដល់ចំណេះដឹង និងបទពិសោធន៍ដែលអាចយកមកអនុវត្តន៍ជាប្រចាំថ្ងៃបាន ។

សូមជម្រាបថា គិតមកដល់ថ្ងៃទី៤ ខែមេសា ឆ្នាំ២០២៥ ក្រុមការងារបានរៀបចំ តុបតែង កែលម្អសោភ័ណភាព និងកន្លែងកម្សាន្តទាំងនៅតំបន់អង្គរ និងក្រុងសៀមរាប បានប្រមាណ ៨០% ដើម្បីទទួលប្រជាពលរដ្ឋក្នុងខេត្ត ក៏ដូចជាភ្ញៀវទេសចរជាតិ អន្តរជាតិមកទស្សនាកម្សាន្តក្នុងព្រឹត្តិការណ៍អង្គរសង្ក្រាន្ត ឆ្នាំ២០២៥នេះ ៕