រដ្ឋមន្រ្តីការពារជាតិ ចាត់ទុកមជ្ឈមណ្ឌលទំនើបកម្មសមុទ្ររាម គឺជាកន្លែងពង្រឹងសមត្ថភាពកងទ័ពជើងទឹកកាន់តែខ្លាំង

(ព្រះសីហនុ)៖ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានថ្លែងចាត់ទុកមជ្ឈមណ្ឌលទំនើបកម្មសមុទ្ររាម គឺជាកន្លែងបង្កើនសមត្ថភាពរបស់កងទ័ពជើងទឹកឱ្យកាន់តែខ្លាំងក្លាបន្ថែមទៀត ទាំងវិជ្ជាជីវៈ គ្រឿងបំពាក់បញ្ចេកទេស និងយុទ្ធោបករណ៍ ស្របទៅតាមការកែទម្រង់ដល់កងកម្លាំងប្រដាប់អាវុធរបស់រាជរដ្ឋាភិបាលកម្ពុជា ។

ឯកឧត្តម ឧបនាយករដ្ឋមន្រ្តី ទៀ សីហា បានថ្លែងដូច្នេះក្នុងពិធីសម្ពោធដាក់ឱ្យប្រើប្រាស់ជាផ្លូវការ មជ្ឈមណ្ឌលទំនើបកម្មមូលដ្ឋានសមុទ្ររាម និងមជ្ឈមណ្ឌល ភស្តុ ភារ និងហ្វឹកហ្វឺនរួមគ្នាកម្ពុជា-ចិន និងផែរាម ខេត្តព្រះសីហនុ ក្រោម អធិបតីភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នៅព្រឹកថ្ងៃទី០៥ ខែមេសា ឆ្នាំ២០២៥ ។

នាយឧត្តមសេនីយ៍ ទៀ សីហា បានបញ្ជាក់ថា មជ្ឈមណ្ឌល ទំនើបកម្មសមុទ្ររាម គឺជាមរតកប្រវត្តិសាស្រ្តនៃការពង្រឹង និងការពង្រីកទំនាក់ទំនងជាប្រពៃណី រវាងរាជរដ្ឋាភិបាល និងកងទ័ពប្រទេសកម្ពុជា និងចិន បន្តពីប្រពៃណីដែលធ្លាប់ បានឆ្លងកាត់ជាប្រវត្តិសាស្រ្តដ៏យូរលង់ និងកាន់តែមានភាពកក់ក្តៅជឿជាក់រឹងមាំ ជាពិសេស នៅក្នុងរាជរដ្ឋាភិបាល នីតិកាលទី៧ នៃរដ្ឋសភា ដែលដឹកនាំដោយសម្តេចធិបតីនាយករដ្ឋមន្រ្តី បានបន្តប្តេជ្ញាចិត្តការពារ នូវសមិទ្ធផល ដែលថ្នាក់ដឹកនាំជំនាន់មុន បានបន្សល់ទុកឲ្យរឹងមាំស្ថិតស្ថេរ និង បន្តអភិវឌ្ឍន៍កាន់តែរីកចម្រើនបន្ថែមទៀត ។

ឯកឧត្តមរដ្ឋមន្ត្រីការពារជាតិ បានបន្តថា ការកសាងនូវមជ្ឈមណ្ឌលភស្តុភារ និងហ្វឹកហ្វឺនរួមគ្នារវាងកម្ពុជា និងចិន ឬហៅថាផែរាម ដែលសម្ពោធដាក់ ឲ្យប្រើប្រាស់នាពេល នេះ គឺបានប្រព្រឹត្តទៅស្របតាមគោលដៅនៃការពង្រឹងសមត្ថភាពកងទ័ពជើងទឹក ដែលជាជ្រុងអាទិភាពមួយនៃការកែទម្រង់កងកម្លាំងប្រដាប់អាវុធ ក្នុងយុទ្ធសាស្រ្តរបស់រាជរដ្ឋាភិបាល សៀវភៅការពារជាតិ សំដៅធ្វើទំនើបកម្ម និងបង្កើនសមត្ថភាពវិជ្ជាជវៈដល់កងទ័ពជើងទឹក បន្តធានាកិច្ចការពារប្រកបដោយប្រសិទ្ធភាពនូវអធិបតេយ្យជាតិ បូរណភាពទឹកដី សន្តិភាព សន្តិសុខ និង សុវត្ថិភាពជូនប្រជាជន ។

ទន្ទឹមនេះដែរ ឯកឧត្តម ឧបនាយករដ្ឋមន្រ្តី ទៀ សីហា បានលើកឡើងថា ដើម្បីជាមូលដ្ឋានក្នុងការលើកកម្ពស់សមត្ថភាព បំពេញតួនាទីភារកិច្ចរបស់កងទ័ពជើងទឹកឲ្យមានការអភិវឌ្ឍ ទាំងវិជ្ជាជីវៈ គ្រឿងបំពាក់ឧបករណ៍បម្រើបច្ចេកទេសយុទ្ធោបករណ៍ សំដៅឈានទៅធ្វើទំនើបកម្ម កងទ័ពជើងទឹកកម្ពុជា ឲ្យឆ្លើយតបនឹងភាពជឿនលឿននៃបច្ចេកវិទ្យាទំនើប និងនវានុវត្តន៍យោធាក្នុងតំបន់ ក្រសួង ការពារជាតិកម្ពុជា ស្នើសុំភាគីចិន បន្តគាំទ្រ និងជួយឧបត្ថម្ភដល់កងទ័ពជើងទឹកកម្ពុជា ជាពិសេស ការបណ្តុះបណ្តាល និងបំប៉នធនធានមនុស្សលើផ្នែកគ្រឿងបំពាក់ជំនាញ ដែល កំពុងមាននៅក្នុងមូលដ្ឋានសមុទ្ររាម និងសុំអ្នកជំនាញបច្ចេកទេស ដែលមានបទពិសោធន៍ខ្ពស់មកធ្វើការហ្វឹកហ្វឺន លើ ការជួសជុល ផលិត និងថែទាំនាវា ឬបញ្ជូនខាងកម្ពុជាទៅហ្វឹកហ្វឺនបំប៉នលើការ ជួសជុល ផលិត និងការថែទាំនាវនៅតាមបណ្តារោងចក្រ សហគ្រាសនៅប្រទេសចិន ៕