រដ្ឋមន្ត្រីការងារ ពន្យល់ឆ្លើយតបទៅនឹងការដំឡើងពន្ធ របស់លោកប្រធានាធិបតី ត្រាំ មានផលប៉ះពាល់ខ្លាំង ដល់កម្មករ និងប្រជាពលរដ្ឋឬទេ

ភ្នំពេញ)៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី០៣ ខែមេសា ឆ្នាំ២០២៥ ពន្យល់ឆ្លើយតបពាក់ព័ន្ធនឹងការដំឡើងពន្ធ របស់លោកប្រធានាធិបតីសហរដ្ឋអាមេរិក ដូណាល់ ត្រាំ មានផលប៉ះពាល់ខ្លាំងដល់កម្មករ និងប្រជាពលរដ្ឋឬទេ ដោយបញ្ជាក់ថា៖ សហរដ្ឋអាមេរិក ដំឡើងពន្ធ មិនប៉ះពាល់ ១០០% សម្រាប់វិស័យនាំចេញរបស់កម្ពុជាឡើយ ខណៈការបញ្ជាទិញ សម្រាប់ឆ្នាំ២០២៦ និង ២០២៧ មានរួចហើយ ។ ការអះអាងរបស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្រោយពេលដែលលោកប្រធានាធិបតី ដូណាល់ ត្រាំ បានសម្រេចដាក់ពន្ធ ៤៩ភាគរយ លើទំនិញ នាំចូលពីកម្ពុជា ដើម្បីឆ្លើយតបនឹងពន្ធរបស់កម្ពុជា លើអាមេរិកចំនួន ៩៧ភាគរយ ។

បើយោងតាមសារព័ត៌មានរដ្ឋ AKP ដកស្រង់សម្តីរបស់ ឯកឧត្តម ហេង សួរ បានបកស្រាយចម្ងល់ ជូនបងប្អូនប្រជាពលរដ្ឋថា តើការដំឡើងពន្ធ របស់លោកប្រធានាធិបតី ត្រាំ មានផលប៉ះពាល់ខ្លាំង ដល់បងប្អូនកម្មករ និងប្រជាពលរដ្ឋយើងដែរឬទេ? ឯកឧត្តមបញ្ជាក់ថា ជាការពិតអាចមានផលប៉ះពាលខ្លះ ប៉ុន្តែយើងអាចគ្រប់គ្រងបាន ហើយសូមជម្រាបជូនថា៖

ទី១៖ ការដាក់ពន្ធនេះជាការដាក់ទូទាំងពិភពលោក គ្រាន់តែដាក់ក្នុងអាត្រាខុសគ្នា អាស្រ័យទោះលើជញ្ជីងពាណិជ្ជកម្មរវាងអាមេរិក និងប្រទសនីមួយៗ តែប៉ុណ្ណោះ។ ការដំឡើងពន្ធនេះ មិនមែនដោយសសារកត្តានយោបាយ ឬដោយសារតែពួកប្រឆាំងវាអំពាវនាវឱ្យដាក់ទណ្ឌកម្មលើកម្ពុជាអីនោះទេ។

ទី២៖ កន្លងទៅកម្ពុជាក៏មានការបង់ពន្ធដែរ មិនមែនអត់បង់ពន្ធទាំងស្រុង តាមប្រពន្ធ GSP នោះទេ។ លោកប្រធានាធិបតីត្រាំក៏បានដំឡើងពន្ធ ៤៦% លើប្រទេសវៀតណាម និងដំឡើងពន្ធ លើប្រទេសបង់ក្លាដេសក្នុងអាត្រាមួយខ្ពស់ផងដែរ ។ អញ្ចឹងវាមិនបង្កឱ្យមានការលម្អៀងខ្លាំងលើថ្លៃដើមផលិតនៅកម្ពុជា ធៀបនឹងប្រទេសដទៃ ដែលជាដៃគូប្រជែងយើងនោះទេ ។

ទី៣៖ សម្រាប់ឆ្នាំ២០២៥នេះ ផលប៉ះពាល់ គឺមិនមាននោះទេ ដោយសារការបញ្ជាទិញ សម្រាប់វិស័យកាត់ដែរ គឺមានមុនពេលដែលពន្ធ ត្រូវបានដាក់ ហើយការដាក់ពន្ធនេះ គឺមិនមែនដាក់តែលើកម្ពុជានោះទេ គឺដាក់គ្រប់ប្រទេស ដែលនាំចេញសម្លៀកបំពាក់ ។ ប្រសិនជាគេលុបចោលការបញ្ជាទិញ គេក៏ត្រូវបង់ការពិន័យ នៃការលុបចោល ដែលចំណាយដើមទុនច្រើនជាងថ្លៃបង់ពន្ធ ។

ចំណែកវិស័យស្បែកជើង ការបញ្ជាទិញភាគច្រើន គឺដាក់ ៣ឆ្នាំ ជាប់គ្នា ។ ដូច្នេះការបញ្ជាទិញឆ្នាំនេះ គឺសម្រាប់ឆ្នាំ២០២៦ និង ២០២៧ផងដែរ ។ ប៉ុន្តែឆ្នាំ២០២៧ អាចមានការបញ្ហាប្រឈមខ្លះ ប្រសិនជាស្ថានភាពពន្ធនេះ មានការបន្ធូរបន្ថយ ចំពោះប្រទេសគេ ប៉ុន្តែមិនមានការបន្ធូរបន្ថយ សម្រាប់កម្ពុជាយើង ។

ទី៤៖ ការនាំចេញរបស់យើងក្នុងរយៈពេល ៥ឆ្នាំ ជាប់ៗគ្នានេះ គឺទៅអឺរ៉ុប ច្រើនជាងអាម៉េរិក។ យើងមានលទ្ធភាពពង្រីកទីផ្សារអ៊ឺរ៉ុបបន្ថែមទៀត ។

ទី៥៖ ប្រទេសបង់ក្លាដេស ប្រទេសមីយ៉ាន់ម៉ា ដែលធ្លាប់តែជាដៃគូរប្រជែងធំ ហើយនាំចេញ ផលិតផលទៅអាម៉េរិកច្រើន ក៏នៅមានបញ្ហាផ្ទៃក្នុង របស់ខ្លួន ។ ហេតុនេះ ឯកឧត្តម បានវាយតម្លៃថា ការដំឡើងពន្ធនេះវាមិនប៉ះពាល់ ១០០% សម្រាប់វិស័យនាំចេញរបស់យើងនោះទេ។ ទន្ទឹមនឹងនេះ រាជរដ្ឋាភិបាល នឹងបន្តធ្វើការ ជាមួយអាមេរិក និងបង្កើតឱ្យមានបរិយាកាសវិនិយោគ កាន់តែប្រសើរថែមទៀត ដើម្បីរក្សាឧត្តមភាព ផលិកម្មរបស់យើង ។

ឯកឧត្តម គួច វែងស្រ៊ុន ក៏បានសូមបងប្អូនជ្រាប និងកុំមានការយល់ច្រឡំ ឬយល់ខុស តាមការបំភ័យ របស់បុគ្គលមួយចំនួន ៕