ភាពមិនប្រក្រតីក្នុងការអនុវត្តច្បាប់រឹតបន្តឹងច្បាប់ចរាចរណ៍នៅភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល! នគរបាល៧នាក់រងការព្រមាន និងអប់រំធ្វើកិច្ចសន្យា
នគរបាលចរាចរណ៍៤នាក់រងការព្រមានជាលាយលក្ខណ៍អក្សរលើកទី១ និង៣នាក់ត្រូវបានអប់រំធ្វើកិច្ចសន្យា ហើយដាក់ឱ្យអនុវត្តវិន័យ៣ខែនៅការិយាល័យបុគ្គលិក។ នេះបើតាមសេចក្តីបំភ្លឺព័ត៌មានរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល។
សកម្មភាពរបស់នគរបាលចរាចណ៍ ត្រូវបានបង្ហាញ ក្នុងឃ្លីបវីដេអូ ដែលបង្ហោះដោយគណនីហ្វេសប៊ុកឈ្មោះ Lay Kongkea។ មន្ត្រីទាំងនោះ រងការចោទប្រកាន់ថា អនុវត្តច្បាប់ ប៉ុន្តែបណ្តាលឱ្យរថយន្តពលរដ្ឋជួបបញ្ហា។ ពួកគាត់មិនដោះស្រាយបញ្ហា តែបែរជារើបារាស់ ហើយនាំគ្នាចាកចេញពីទីតាំង។
រឿងរ៉ាវបានកើតឡើងនៅព្រឹកថ្ងៃទី២ ខែមេសា ចំណុចផ្លូវជាតិលេខ៣ ចន្លោះគីឡូម៉ែត្រលេខ២៨-២៩ ឋិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល។
នាព្រឹកថ្ងៃបន្ទាប់ ការិយាល័យបុគ្គលិក នៃស្នងការដ្ឋាននគរបាលខេត្តកណ្តាល បានកោះហៅកងកម្លាំងនគរបាលចរាចរណ៍ផ្លូវគោកចំនួន៧នាក់ ឱ្យចូលខ្លួនទៅបំភ្លឺ ពាក់ព័ន្ធហេតុការណ៍ដែលបានកើតឡើង។
ក្រោយពីសាកសួរ និងឆ្លើយបំភ្លឺរួច មន្រ្តីនគរបាលចរាចរណ៍ដែលមានការពាក់ព័ន្ធក្នុងហេតុការណ៍ខាងលើ ត្រូវបានព្រមានជាលាយលក្ខណ៍អក្សរលើកទី១ ចំនួន៤នាក់ និងអប់រំ ធ្វើកិច្ចសន្យាចំនួន៣នាក់ ហើយដាក់ឲ្យអនុវត្តវិន័យរយៈពេល៣ខែ នៅការិយាល័យបុគ្គលិក។
