វៀតណាម និងថៃ ចេញប្រតិកម្មភ្លាមៗ ចំពោះការដាក់ពន្ធនាំចូលរបស់អាម៉េរិក
នាយករដ្ឋមន្ត្រីវៀតណាមលោក ផាម មិញ ជិញ បានស្នើឱ្យបង្កើតក្រុមឆ្លើយតបភ្លាមៗ ដើម្បីឱ្យមានវិធានការក្តៅនៅពេលអាម៉េរិកដាក់ពន្ធទៅមក (Reprocal Tariff ) រហូតដល់ ៤៦ភាគរយលើប្រទេសនេះ។ ចំណែកថៃវិញ នាយករដ្ឋមន្រ្តី លោកស្រី ផែថងថាន ស៊ីណាវ៉ាត់ បានចេញមុខប្រាប់កុំឲ្យពលរដ្ឋបារម្ភ ក្រោយអាម៉េរិកដាក់ពន្ធ ៣៦ភាគរយ។
នាព្រឹកថ្ងៃទី៣ មេសា នាយករដ្ឋមន្ត្រី ផាម មិញ ជិញ បានដឹកនាំកិច្ចប្រជុំជាមួយក្រសួង និងវិស័យនានា បន្ទាប់ពីអាម៉េរិកប្រកាសដំឡើងពន្ធថ្មីលើទំនិញនាំចូលពីវៀតណាម។ កិច្ចប្រជុំនេះមានការចូលរួមពីប្រមុខក្រសួងហិរញ្ញវត្ថុ ឧស្សាហកម្ម និងពាណិជ្ជកម្ម កសិកម្ម និងបរិស្ថាន វិទ្យាសាស្ត្រ និងបច្ចេកវិទ្យា ធនាគាររដ្ឋ និងទីភ្នាក់ងារជាច្រើនទៀត។
«វៀតណាមចង់ឲ្យអាម៉េរិកមានគោលនយោបាយកាន់តែសមស្រប ទៅនឹងទំនាក់ទំនងល្អរវាងប្រទេសទាំងពី» ។ លោក ផាម មិញ ជិញ បញ្ជាក់ដូច្នេះដោយបន្ថែមថា នេះគឺសមស្របនឹងលក្ខខណ្ឌ និងកាលៈទេសៈរបស់វៀតណាម ដែលជាប្រទេសកំពុងអភិវឌ្ឍ ដែលត្រូវបន្តជម្នះផលវិបាកធ្ងន់ធ្ងរ និងអូសបន្លាយនៃសង្គ្រាមជាច្រើនឆ្នាំ។ នេះបើតាមសារព័ត៌មាន VnExpress ។
នាយករដ្ឋមន្ត្រីវៀតណាមរូបនេះ បានស្នើឱ្យក្រសួង និងស្ថាប័នមានការឆ្លើយតបយ៉ាងសកម្ម និងបត់បែនចំពោះការអភិវឌ្ឍន៍ទាំងអស់។ ថ្នាក់ដឹកនាំរដ្ឋាភិបាលបានស្នើឱ្យបង្កើតក្រុមឆ្លើយតបយ៉ាងឆាប់រហ័សលើបញ្ហានេះ ដែលដឹកនាំដោយឧបនាយករដ្ឋមន្ត្រី Bui Thanh Son។ លោកបានចាត់ឲ្យឧបនាយករដ្ឋមន្ត្រី Ho Duc Phoc ដឹកនាំក្រសួង និងស្ថាប័ន ព្រមទាំងកត់ត្រាមតិយោបល់ពីអង្គភាពអាជីវកម្ម ជាពិសេសអ្នកនាំចេញធំៗ។
លោក ផាម មិញ ជិញ បានសង្កត់ធ្ងន់ថា ស្ថានភាពបច្ចុប្បន្នបង្ហាញថា ការប្រកួតប្រជែងពាណិជ្ជកម្មមានភាពខ្លាំងក្លា ស្មុគស្មាញ និងមិនអាចទាយទុកជាមុនបាន។ ទោះជាយ៉ាងណាក៏ដោយ។ នេះក៏ជាឱកាសមួយក្នុងការរៀបចំរចនាសម្ព័ន្ធសេដ្ឋកិច្ចឡើងវិញ ឆ្ពោះទៅរកការអភិវឌ្ឍន៍យ៉ាងឆាប់រហ័ស ប៉ុន្តែប្រកបដោយនិរន្តរភាព ដោយផ្អែកលើបច្ចេកវិទ្យា និងការច្នៃប្រឌិត។
វៀតណាមសជាប់ក្នុងអត្រាពន្ធទៅមករបស់អាម៉េរិករហូតដល់ ៤៦ភាគរយ ដែលស្ថិតក្នុងក្រុមប្រទេសមានអត្រាពន្ធខ្ពស់បំផុតរួមជាមួយចិន កម្ពុជា ឥណ្ឌូណេស៊ី និងមីយ៉ាន់ម៉ា។
ចំណេកថៃ នាយករដ្ឋមន្ត្រី ផែថងថាន បានចេញសេចក្តីថ្លែងការណ៍ភ្លាមៗស្តីពីជំហររបស់ប្រទេសទាក់ទងនឹងគោលនយោបាយពាណិជ្ជកម្មរបស់អាម៉េរិក បន្ទាប់ពីប្រធានាធិបតី ដូណាល់ ត្រាំ បានប្រកាសដំឡើងពន្ធទៅមករហូតដល់ ៣៦ភាគរយលើទំនិញថៃ។
«រដ្ឋាភិបាលថៃទទួលស្គាល់ និងយល់ពីភាពចាំបាច់សម្រាប់អាម៉េរិក ក្នុងការដោះស្រាយអតុល្យភាពពាណិជ្ជកម្មជាមួយដៃគូពាណិជ្ជកម្មជាច្រើនរបស់ខ្លួន តាមរយៈគោលនយោបាយពាណិជ្ជកម្ម និងពន្ធ»។ លោកស្រី ផែថងថាន បញ្ជាក់បែបនេះ។
លោកស្រី ផែថងថាន លើកឡើងថា រដ្ឋាភិបាលថៃបាននិងកំពុងធ្វើការយ៉ាងជិតស្និទ្ធជាមួយទាំងវិស័យសាធារណៈ និងឯកជន ដើម្បីតាមដាន និងវាយតម្លៃការវិវត្តក្នុងរយៈពេលបីខែកន្លងមកនេះ។
នាយករដ្ឋមន្រ្តីរូបនេះបានធានាជាថ្មីសម្រាប់ពលរដ្ឋថៃថា ៖« មិនចាំបាច់ព្រួយបារម្ភអំពីអាម៉េរិកដំឡើងពន្ធ ៣៦ភាគរយលើការនាំចូលរបស់ថៃនោះទេ ដោយសារតែវិធានការនានាមានរួចហើយដើម្បីដោះស្រាយបញ្ហានេះ។ ទាំងនេះរួមមានការរៀបចំរចនាសម្ព័ន្ធពន្ធនាំចូល និងបង្កើតក្រុមចរចាដោយមានទំនុកចិត្តថាការពិភាក្សាអាចផ្តល់លទ្ធផលអំណោយផល»។ លោកស្រីបញ្ជាក់យ៉ាងមុតមាំថា វិធានការនេះនឹងមិនប៉ះពាល់ដល់ផលិតផលក្នុងស្រុកសរុបរបស់ប្រទេសថៃឡើយ ។ នេះបើតាមសារព័ត៌មាន The Nation ។
ទាក់ទងនឹងការសម្រេចចិត្តរបស់អាម៉េរិកក្នុងការដំឡើងពន្ធនាំចូល ៣៦ភាគរយលើផលិតផលថៃ ដែលជាអត្រាខ្ពស់បំផុតមួយនៅក្នុងអាស៊ាន លោកស្រី ផែថងថាន បានពន្យល់ថា ថៃត្រូវការកែសម្រួលរចនាសម្ព័ន្ធពន្ធនាំចូលរបស់ខ្លួនជាមួយអាម៉េរិក និងបង្កើតក្រុមការងារសម្រាប់ការចរចា។
លោកស្រីបានកត់សម្គាល់ថា ខណៈថៃមិនបាននាំចូលទំនិញដែលរងផលប៉ះពាល់ក្នុងបរិមាណច្រើន ពន្ធខ្ពស់បានធ្វើឱ្យប្រទេសនេះស្ថិតក្នុងចំណោមប្រទេសដែលរងផលប៉ះពាល់ខ្លាំងបំផុត។ ដូច្នេះ ទាំងផែនការរយៈពេលខ្លី និងរយៈពេលវែងកំពុងត្រូវបានរៀបចំ។ ក្នុងរយៈពេលខ្លី ការចរចានឹងផ្តោតលើការជួយអ្នកនាំចេញ និងកាត់បន្ថយផលប៉ះពាល់។ បច្ចុប្បន្នក្រសួងហិរញ្ញវត្ថុ និងក្រសួងពាណិជ្ជកម្មថៃកំពុងដោះស្រាយ៕