ជនសង្ស័យម្នាក់ ឃាត់ខ្លួន ពាក់ព័ន្ធករណី ជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀន

ពោធិ៍សាត់៖ ជនសង្ស័យឈ្មោះ សាត សឺង ហៅ សឺង ភេទប្រុស អាយុ៣១ឆ្នាំ ជនជាតិខ្មែរ មានកំរិតវប្បធម៌ ថ្នាក់៧ថ្មី មានមុខរបរមិនពិតប្រាកដ រស់នៅភូមិកំពង់លើ ឃុំក្បាលត្រាច ស្រុកក្រគរ ខេត្តពោធិ៍សាត់ ត្រូវបានសមត្ថកិច្ចនគរបាលនៃអធិការដ្ឋាននគរបាលស្រុកក្រគរ បង្ក្រាបចាប់ឃាត់ខ្លួន ពាក់ព័ន្ធករណី ជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀន នៅចំណុចក្នុងបរិវេណវត្តបន្ទាយក្រង ស្ថិតក្នុងភូមិបន្ទាយក្រង ឃុំអន្លង់ត្នោត ស្រុកក្រគរ ខេត្តពោធិ៍សាត់ កាលពី ថ្ងៃទី១៤ ខែវិច្ឆិកា ឆ្នាំ២០២៣ ។

ឃាត់ខ្លួនជនសង្ស័យនេះ ដោយរកឃើញវត្ថុតាង មានម្សៅក្រាមពណ៌សថ្លាសង្ស័យជាសារធាតុញៀនចំនួន០២កញ្ចប់ ទម្ងន់២,៣០ក្រាម ថ្លឹងសាច់ថ្នាំសុទ្ធ ទូរស័ព្ទចំនួន០១គ្រឿង ខ្លងសម្រាប់ដាក់ថ្នាំញៀនចំនួន១ ។ ជនសង្ស័យ ត្រូវសមត្ថកិច្ចឃាត់ខ្លួន នៅអធិការដ្ឋាននគរបាលស្រុកក្រគរ តាមបញ្ជាឯកឧត្ដម កូយកាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ ចុះថ្ងៃទី១៤ ខែវិច្ឆិកា ឆ្នាំ២០២៣ វេលាម៉ោង១៩ និង០៣នាទី ដើម្បីរៀបចំបែបបទអនុវត្តតាមនីតិវិធីច្បាប់ ៕