សហរដ្ឋអាមេរិកយឺតយ៉ាវក្នុងការជួយដល់មីយ៉ាន់ម៉ា

បរទេស៖ រដ្ឋបាលអាមេរិកបានរងការរិះគន់ ជុំវិញភាពយឺតយ៉ាវខុសពីធម្មតា ក្នុងការផ្តល់ជំនួយជួយដល់ប្រទេសមីយ៉ាន់ម៉ា ដែលបានកើតមានគ្រោះរញ្ជួយដី កម្លាំង៧.៧ រិចទ័រ សម្លាប់មនុស្ស ជាង២,០០០នាក់។

បើតាមការចុះផ្សាយ របស់ទីភ្នាក់ងារព័ត៌មាន CNA កាលពីថ្ងៃអង្គារ អាមេរិកទើបតែបានចាប់ផ្តើមបញ្ជូនក្រុមសង្គ្រោះទៅទីនោះ ក្រោយពេល ដែលចិន រុស្ស៊ី និងឥណ្ឌា បានបញ្ជូនទៅដល់រួចរាល់ហើយ កាលពីប៉ុន្មានថ្ងៃមុន។ មួយវិញទៀត បើតាមក្របខណ្ឌ ទីភ្នាក់ងារជំនួយអន្តរជាតិ USAID កន្លងមក អាមេរិកតែងតែអន្តរាគមន៍លឿន ជាងនេះ។ អាមេរិកក៏ប្រកាសថា ផ្តល់២លានដុល្លារអាមេរិក ហើយនាំទៅតាមរយៈអង្គការ មិនមែនតាមរយៈរដ្ឋាភិបាលមីយ៉ាន់ម៉ា នោះទេ ដោយគេដឹងថា ចិនបានផ្តល់ជំនួយជិត១៤លានដុល្លារ ដល់មីយ៉ាន់ម៉ា។

ឆ្លើយតបនឹងការរិះគន់នេះ លោកស្រី Tammy Bruce អ្នកនាំពាក្យក្រសួងការបរទេសអាមេរិក បានថ្លែងការពារ បើទោះបីជារដ្ឋបាលលោក Trump កំពុងព្យាយាមលុបចោល គម្រោងជំនួយអន្តរជាតិ USAID ដ៏លើសលុបក៏ដោយ។ លោកស្រី បានប្រាប់អ្នកសារព័ត៌មាន ទាំងប្រើប្រាស់ឈ្មោះចាស់ របស់មីយ៉ាន់ម៉ា គឺ ភូមា បញ្ជាក់ថា «ក្រុមអ្នកជំនាញផ្នែកមនុស្សធម៌ របស់សហរដ្ឋអាមេរិក ដែលមានមូលដ្ឋាននៅក្នុងតំបន់ កំពុងធ្វើដំណើរ ទៅកាន់ប្រទេសភូមា ឥឡូវនេះ ដើម្បីកំណត់ពីតម្រូវការបន្ទាន់បំផុត របស់ប្រជាជន រួមមាន ទីជំរកសង្គ្រោះបន្ទាន់ អាហារ តំរូវការផ្នែកវេជ្ជសាស្រ្តនិងការទទួលបានទឹក»។

នៅពេលសួរថា តើការឆ្លើយតប របស់សហរដ្ឋអាមេរិកយឺតជាងធម្មតា ឬ អត់ លោកស្រី Bruce បានច្រានចោល ការយល់ឃើញបែបនេះ។ លោកស្រីថែមទាំង ទាត់ចោលការរិះគន់ ដែលថា ការយឺតនេះគឺជាប់ពាក់ព័ន្ធ នឹងផែនការរំលាយ USAID ទៀតផង ដោយលោកស្រី អះអាងថា រឿងជួយមីយ៉ាន់ម៉ា ពេលនេះ ខុសពីរឿងមូលនិធិរបស់ USIAD។ លោកស្រី បានអះអាងថា ជំនួយទាំងនេះ ធ្វើឡើង តបតាមសំណើផ្លូវការ ពីប្រទេសមីយ៉ាន់ម៉ា ដែលជារដ្ឋាភិបាលគ្រប់គ្រងដោយយោធា និងកំពុងស្ថិតនៅក្រោមការដាក់ទណ្ឌកម្ម យ៉ាងធ្ងន់ធ្ងរ ពីសំណាក់រដ្ឋាភិបាល ទីក្រុងវ៉ាស៊ីនតោន។

លោកស្រី Tammy Bruce ក៏បាននិយាយដែរថា ប្រាក់២លានដុល្លារអាមេរិក ត្រូវបញ្ជូនទៅអង្គការនានា ដែលមានស្រាប់។ យ៉ាងណាមិញ របបយោធា មីយ៉ាន់ម៉ា ត្រូវបានដឹងថា បានស្និទ្ធនឹងចិន ជាយូរមកហើយ ខណៈដែលសហរដ្ឋអាមេរិក បានចោទសួរពីឥទ្ធិពលរបស់រដ្ឋាភិបាលទីក្រុងប៉េកាំង ហើយបានជំរុញឲ្យ មីយ៉ាន់ម៉ា ផ្លាស់ប្តូរទៅរកលទ្ធិប្រជាធិបតេយ្យ វិញ៕