ក្រុមហ៊ុនចិន ដែលបានម៉ៅការសាងសង់អគារ ៣០ ជាន់បាក់រលំនៅថៃ កំពុងត្រូវភ្នាក់ងារស៊ើបអង្កេតពិសេស DSI ត្រៀមត្រួតពិនិត្យ និង ដំណើរការក្តី

កាលពីថ្ងៃទី ១​ ខែមេសា ឆ្នាំ ២០២៥ កន្លងទៅនេះ តាមព័ត៌មានបានឱ្យដឹងថា នាយកដ្ឋានស៊ើបអង្កេតពិសេស របស់ថៃ ត្រៀមលូកដៃចូលត្រួតពិនិត្យទៅលើក្រុមហ៊ុនចិន China Railway ដែលបានម៉ៅការសាងសង់អគារ ៣០ ជាន់ក្នុងតម្លៃ ២០០០ លានបាត ដែលបានរលំកាលពីថ្ងៃទី ២៨ ខែមីនា ឆ្នាំ ២០២៥ កន្លងទៅ។

នាយកដ្ឋានស៊ើបអង្កេតពិសេស (DSI) កំពុងពិចារណាស៊ើបអង្កេតទៅការដួលរលំអគារការិយាល័យសវនកម្មហិរញ្ញវត្ថុ ដែលមានកម្ពស់ ៣០ ជាន់នេះ ព្រោះមានតែអគារមួយនេះដែលបានរលំ ដែលបង្កឱ្យមានការសង្ស័យជាច្រើនពាក់ព័ន្ធនឹងការសាងសង់។ ក្នុងនោះ DSI នឹងផ្តោតទៅលើបញ្ហាធំៗបីគឺ ពិនិត្យទៅលើការដេញថ្លៃអគារនេះ តើវាមានភាពត្រឹមត្រូវឬទេ ពិនិត្យទៅលើក្រុមហ៊ុនដែលទទួលម៉ៅការ ដែលជាក្រុមហ៊ុនបរទេស ថាតើមានសកម្មភាពខុសច្បាប់ឬទេ និង ពិនិត្យទៅលើស្តង់ដារគុណភាពនៃសម្ភារៈសំណង់ ជាពិសេសគឺសរសៃដែក ថាតើវាមានគុណភាព ឬស្របតាមស្តង់ដារឬយ៉ាងណា។

យ៉ាងណាមិញ DSI បាន​បញ្ជាក់​ថា ការ​ស៊ើប​អង្កេត​នឹង​ត្រូវ​ធ្វើ​ឡើង​ក្នុង​លក្ខណៈ​វិជ្ជាជីវៈ ហើយនឹងដំណើរការឱ្យបានលឿនតាមដែលអាចធ្វើទៅបាន ដើម្បីផ្តល់ទំនុកចិត្តដល់សាធារណជនថា ករណីនេះនឹងត្រូវបានដោះស្រាយដោយយុត្តិធម៌ជាទីបំផុត៕

ប្រភព៖ AMARINTV