មន្ទីរសុខាភិបាលរាជធានីភ្នំពេញ បើកសន្និបាតបូកសរុបលទ្ធផលការងារប្រចាំឆ្នាំ២០២៤ និងទិសដៅការងារឆ្នាំ២០២៥

(ភ្នំពេញ)៖ នៅព្រឹកថ្ងៃទី២ ខែមេសា ឆ្នាំ២០២៥នេះ មន្ទីរសុខាភិបាល នៃរដ្ឋបាលរាជធានីភ្នំពេញ បានធ្វើពិធីបើកសន្និបាតបូកសរុបលទ្ធផលការងារ ប្រចាំឆ្នាំ២០២៤ និងទិសដៅការងារ ឆ្នាំ២០២៥ ក្រោមវត្តមានលោក អ៉ីមរ៉ន ហាស្សាន់ អភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញ និងលោក ងី មានហេង ប្រធានមន្ទីរសុខាភិបាលរាជធានីភ្នំពេញ និងសមាជិកក្រុមប្រឹក្សារាជធានីភ្នំពេញ។

លោក អ៉ីមរ៉ន ហាស្សាន់ បានលើកឡើងថា តាមរយៈសមិទ្ធផលការងារឆ្នាំ២០២៤ របស់មន្ទីរសុខាភិបាល នៃរដ្ឋបាលរាជធានីភ្នំពេញ គឺពិតជាបានបង្ហាញឲ្យឃើញពីភាពរីកចម្រើន លើវិស័យសុខាភិបាល នៅរាជធានីភ្នំពេញ គួរឲ្យកត់សម្គាល់ទាំងលើការផ្តល់សេវា ក៏ដូចជាផ្នែកហេដ្ឋារចនាសម្ព័ន្ធរូបវ័ន្តផងដែរ។

រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិត ចក្ខុវិស័យវែងឆ្ងាយ ស្មារតីបុរេសកម្ម និងភាពស្វាហាប់ របស់សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបំពេញបេសកកម្មដ៏ឧត្តុងឧត្តម ក្នុងការដឹកនាំអនុវត្តកម្មវិធីនយោបាយ និងយុទ្ធសាស្ត្រ បញ្ចកោណ ដំណាក់កាលទី១ ដោយបន្តរក្សាគង់វង្សនូវសន្តិភាព ដែលមានគុណតម្លៃជាសកល ស្ថេរភាព នយោបាយ សន្តិសុខ សណ្តាប់ធ្នាប់សង្គម ដែលជាមូលដ្ឋានគ្រឹះ នៃការសម្រេចបាននូវវឌ្ឍនភាពថ្មីៗ ក្នុងការបន្តអភិវឌ្ឍសង្គមសេដ្ឋកិច្ច រួមទាំងវឌ្ឍនភាព នៃវិស័យសុខាភិបាលឆ្នាំ២០២៤។

លោក ងី មានហេង ប្រធានមន្ទីរសុខាភិបាល នៃរដ្ឋបាលរាជធានីភ្នំពេញ បានលើកឡើងថា មន្ទីរសុខាភិបាលនៃរដ្ឋបាលរាជធានីភ្នំពេញ មានមន្ទីរពេទ្យបង្អែករាជធានីភ្នំពេញ និងការិយាល័យស្រុកប្រតិបត្តិ ចំនួន៧ ដែលមានមន្ទីរពេទ្យបង្អែកកម្រិត CPA1 ចំនួន៧ មណ្ឌលសុខភាពចំនួន៤៦ និងប៉ុស្តិ៍សុខភាព ចំនួន៥ទីតាំង និងមានមន្ត្រី និងបុគ្គលិកសុខាភិបាលចំនួន ១,៣៨៤រូប (ស្ត្រីចំនួន៧៨៩រូប)។

មូលដ្ឋានសុខាភិបាលសាធារណៈនៅរាជធានីភ្នំពេញ មានគ្រែសរុបចំនួន៤៥៤គ្រែ បានទទួល ពិនិត្យពិគ្រោះជំងឺជូនប្រជាពលរដ្ឋចំនួនសរុប៤៧០,៩៥៤ករណី (កើនឡើងចំនួន៨,៨៦០ករណី ធៀបនឹងឆ្នាំ២០២៣) បានផ្តល់សេវាសម្រាកព្យាបាលនៅមន្ទីរពេទ្យបង្អែកទាំង៨ ចំនួន១៦,៤០៧នាក់ (កើន៣,៥៣១នាក់ ធៀបនឹងឆ្នាំ២០២៣)។ ផ្តល់សេវាថែទាំសុខភាពមាតាទារក និងកុមារបានល្អ ប្រសើរ ព្រមទាំងបានពង្រីកការផ្តល់សេវារំលូតប្រកបដោយសុវត្ថិភាព ទៅកាន់មណ្ឌលសុខភាព ចំនួន៤២កន្លែង និងមន្ទីរពេទ្យបង្អែកចំនួន ៨កន្លែង។

នៅក្នុងឆ្នាំ២០២៤ យោងតាមរបាយការណ៍ស្តីពីការស្រាវជ្រាវមរណភាពមាតា ការសង្គ្រោះ បន្ទាន់ផ្នែកសម្ភព និងការថែទាំទារកទើបកើតបានបង្ហាញថា មិនមានករណីសង្ស័យមរណភាពមាតា ត្រូវបានរាយការណ៍ចេញពីមន្ទីរពេទ្យបង្អែក និងមណ្ឌលសុខភាពនោះទេ។ ការគ្រប់គ្រងសេវាសុខាភិបាលឯកជន និងឱសថស្ថានឯកជនត្រូវបានពង្រឹង ឱសថស្ថាន-ឱសថស្ថានរងមន្ទីរពហុព្យាបាល មន្ទីរសំរាកព្យាបាល និងបន្ទប់ពិគ្រោះព្យាបាល ជំងឺត្រូវបានត្រួតពិនិត្យជាទៀងទាត់រៀងរាល់ខែ។ ការរីកចម្រើនទាំងអស់នេះ គឺច្បាស់ណាស់ កើតចេញមកពីកិច្ចសហការល្អ រវាងក្រសួងសុខាភិបាល រដ្ឋបាលរាជធានីភ្នំពេញ អាជ្ញាធរខណ្ឌ-សង្កាត់ និងអង្គការដៃគូអភិវឌ្ឍន៍វិស័យសុខាភិបាលនានា ដែលជាកត្តាដ៏សំខាន់ក្នុងការអភិវឌ្ឍន៍វិស័យសុខាភិបាលនៅក្នុងរាជធានីភ្នំពេញ។

លោក ងី មានហេង បានបញ្ជាក់ថា នៅក្នុងឆ្នាំ២០២៤ រាជធានីភ្នំពេញ ទទួលបានជោគជ័យលើការអនុវត្តសកម្មភាពឆ្លើយតបទៅ នឹងគោលដៅសកលនៃជំងឺអេដស៍ ពោលគឺ៩៥%។ មណ្ឌលសុខភាពចំនួន៤៥ និងមន្ទីរពេទ្យបង្អែកចំនួន៨ បាននិងកំពុងផ្តល់សេវាពិនិត្យ ព្យាបាលជំងឺរបេងតាមរយៈដូតស៍សហគមន៍ ចំណែកឯការអនុវត្តសកម្មភាពកម្មវិធីរបេង-អេដស៍ មាននៅគ្រប់ស្រុកប្រតិបត្តិទាំងអស់។ រីឯជំងឺគ្រុនឈាម រាយការណ៍សរុបមានចំនួន ២,៦៥៤ករណី និងករណីស្លាប់ចំនួន១នាក់។

ចំនួនករណីជំងឺគ្រុនឈាម មានការថយចុះប្រមាណជិតពាក់កណ្តាល បើប្រៀបធៀបនឹងឆ្នាំ២០២៣ ដែលមានចំនួន ៤,៦៦៩ករណី។ ប្រជាពលរដ្ឋដែលមាន អាយុចាប់ពី៤០ឆ្នាំឡើង ទៅរស់នៅក្នុងតំបន់គ្របដណ្តប់របស់មណ្ឌលសុខភាព បានទទួលសេវា ពិនិត្យស្រាវជ្រាវរកជំងឺទឹកនោមផ្អែម និងជំងឺលើសសម្ពាធឈាមមានចំនួន១៩,៨៧២នាក់ (ស្រីចំនួន១៣,៣១៤នាក់)។ ក្នុងចំណោមប្រជាជនទាំងនោះ បានរកឃើញអ្នកជំងឺដែលបានធ្វើរោគវិនិច្ឆ័យថា មានទាំងជំងឺទឹកនោមផ្អែម និងលើសសម្ពាធឈាមមានចំនួន៩,០១៥នាក់ អ្នកមានតែជំងឺទឹកនោមផ្អែមមានចំនួន៣,៥៨០នាក់ និងអ្នកដែលរកឃើញថា មានជំងឺលើសសម្ពាធឈាម សរុបចំនួន៣,៨៦៩នាក់។

មន្ទីរសុខាភិបាល នៃរដ្ឋបាលរាជធានីភ្នំពេញ បានគ្រប់គ្រង និងសម្របសម្រួលក្នុងការអនុញ្ញាតបើកថ្មី និងបន្តសុពលភាពនូវមន្ទីរពេទ្យឯកជន មន្ទីរសម្រាកព្យាបាល មណ្ឌលកែសម្ផស្ស មន្ទីរព្យាបាលមាត់ធ្មេញ មន្ទីរពិសោធន៍វេជ្ជសាស្ត្រ បន្ទប់ពិគ្រោះ ព្យាបាលជំងឺទូទៅ បន្ទប់ពិគ្រោះជំងឺមាត់-ធ្មេញ និងបន្ទប់ពិគ្រោះស្ត្រីមានផ្ទៃពោះ។ល។ គិតត្រឹមខែ ធ្នូឆ្នាំ២០២៤ ចំនួនមូលដ្ឋានសុខាភិបាលឯកជន មានចំនួនសរុប ៤,៤៤៦ កន្លែង (កម្រិតមន្ទីរសម្រាក ព្យាបាលចំនួន ៥៤៦កន្លែង (កើន៥៧កន្លែង ធៀបនឹងឆ្នាំ២០២៣) និងកម្រិតបន្ទប់ថែទាំ បន្ទប់ពិគ្រោះ ព្យាបាលជំងឺ ចំនួន ៣,៩០០កន្លែង (កើន៥៨១កន្លែង ធៀបនឹងឆ្នាំ២០២៣)។ ម្ចាស់ទីតាំងបានស្នើសុំបិទដោយស្មគ្រ័ចិត្ត ចំនួន២៨ទីតាំង និងទីតាំងចំនួន០៤ ត្រូវបានផ្អាក (សរុប ៣២ទីតាំង)។

លោក ងី មានហេង បន្តថា សមិទ្ឋផលដែលមន្ទីរសុខាភិបាល នៃរដ្ឋបាលរាជធានីភ្នំពេញសម្រេចបាន ក្នុងឆ្នាំ២០២៤នេះ មានទំហំធំគួរជាទីមោទនៈ។ សូចនាករសំខាន់ៗ កំពុងស្ថិតនៅក្នុងវឌ្ឍនភាព ហើយកត្តាគន្លឹះ ដែលនាំឲ្យសំរេចបាននូវសមិទ្ធផលខាងលើ គឺដោយមានការគាំទ្រយ៉ាងរឹងមាំពីសំណាក់ រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

សមិទ្ធផលទាំងនេះ កើតចេញពីស្មារតី នៃការទទួលខុសត្រូវរួមគ្នា និងសាមគ្គីភាពរវាងថ្នាក់ដឹកនាំ មន្ត្រីរាជការ បុគ្គលិកសុខាភិបាលគ្រប់ លំដាប់ថ្នាក់ ក្នុងការបំពេញតួនាទី-ភារកិច្ចរបស់ខ្លួន ប្រកបដោយការទទួលខុសត្រូវខ្ពស់ និងមានការ ឧបត្ថម្ភគាំទ្រពីថ្នាក់ដឹកនាំក្រសួងសុខាភិបាល ថ្នាក់ដឹកនាំរដ្ឋបាលរាជធានីភ្នំពេញ និងកិច្ចសហការ គ្នាល្អពីអាជ្ញាធរមូលដ្ឋាន និងស្ថាប័នពាក់ព័ន្ធព្រមទាំងការចូលរួមពីសហគមន៍ និងដៃគូអភិវឌ្ឍន៍ ជាតិ អន្តរជាតិផងដែរ៕