សេតវិមានគ្រោងបើកកិច្ចប្រជុំនៅថ្ងៃស្អែកនេះ ដើម្បីពិភាក្សាអំពីអនាគត TikTok នៅសហរដ្ឋអាមេរិក
(បរទេស)៖ មន្ត្រីសេតវិមានបានប្រាប់ទីភ្នាក់ងារសារព័ត៌មានរ៉យទ័រថា ប្រធានាធិបតីអាមេរិក លោក ដូណាល់ ត្រាំ នឹងពិចារណាបើកិច្ចប្រជុំនៅថ្ងៃពុធសប្តាហ៍នេះ ត្រូវនឹងថ្ងៃទី០៣ ខែមេសា ឆ្នាំ២០២៥ នូវសំណើចុងក្រោយទាក់ទងនឹងកម្មវិធីកម្សាន្ត TikTok។ ពោលគឺ កិច្ចប្រជុំនេះ ធ្វើឡើងមុនថ្ងៃផុតកំណត់ដែលដំបូងឡើយគ្រោងធ្វើនៅថ្ងៃទី ០៥ ខែមេសា ដើម្បីស្វែងរកអ្នកទិញដែលមិនមែនជាជនជាតិចិន ឬប្រឈមនឹងការហាមឃាត់របស់សហរដ្ឋអាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០២ ខែមេសា ឆ្នាំ២០២៥។
កិច្ចប្រជុំនាពេលខាងមុខ ត្រូវបានប្រភពពី CBS News រាយការណ៍មកថា នឹងប្រព្រឹត្តិទៅការិល័យរាងពងក្រពើហើយនឹងមានវត្តមានចូលរួមពី ប្រធានាធិបតីលោក ដូណាល់ ត្រាំ អនុប្រធានាធិបតីលោក JD Vance រដ្ឋមន្ត្រីក្រសួងពាណិជ្ជកម្មលោក Howard Lutnick ទីប្រឹក្សាសន្តិសុខជាតិលោក Mike Waltz និងនាយកទីភ្នាក់ងារស៊ើបការណ៍សម្ងាត់ជាតិលោកស្រី Tulsi Gabbard ។
យ៉ាងណាមិញ បើយោងតាមរបាយការណ៍ដែលចុះផ្សាយដោយ Reuters កាលពីសប្តាហ៍មុនបានបង្ហាញថា ផែនការឈានមុខគេពាក់ព័ន្ធនឹងការបង្កើនភាគហ៊ុនរបស់វិនិយោគិនដែលមិនមែនជាជនជាតិចិនដែលមានស្រាប់របស់ ByteDance រួមមាន ក្រុមហ៊ុន Susquehanna International Group និង General Atlantic ដើម្បីទទួលបានប្រតិបត្តិការរបស់ TikTok នៅសហរដ្ឋអាមេរិក។ មិនត្រឹមតែប៉ុណ្ណោះ វិនិយោគិនសក្តានុពលផ្សេងទៀតរួមមាន Blackstone និង Oracle គ្រោងនឹងចូលរួមផងដែរ។
គួរជម្រាបថា រហូតមកទល់ពេលនេះ នៅមិនទាន់ច្បាស់នោះទេថានឹងបានទៅលើក្រុមហ៊ុនណា ហើយប្រសិនបើគ្មានកិច្ចព្រមព្រៀងណាមួយត្រូវបានឈានដល់ត្រឹមថ្ងៃទី០៥ ខែមេសាទេនោះ TikTok អាចប្រឈមមុខនឹងការហាមឃាត់ទូទាំងប្រទេសនៅសហរដ្ឋអាមេរិក។ ទោះជាយ៉ាងណាក៏ដោយ លោក ត្រាំ ធ្លាប់បានបង្ហាញថាគាត់អាចបន្តរយៈពេលកំណត់ប្រសិនបើចាំបាច់៕
