ចំនួនអ្នកស្លា./ប់ក្នុងអគាររលំដោយគ្រោះរញ្ជួយដីនៅថៃ បានកើនដល់ ១៥ នាក់ហើយ

នៅព្រឹកថ្ងៃទី ០២ ខែមេសា ឆ្នាំ ២០២៥ នេះ ក្រុមសង្គ្រោះនៅប្រទេសថៃបានរកឃើញសាកសពជនរងគ្រោះម្នាក់ទៀតហើយជាស្ត្រី ដែលបានស្លាប់ក្នុងហេតុការណ៍បាក់រលំអគារដោយគ្រោះរញ្ជួយដីកាលពីថ្ងៃទី ២៨ ខែមីនា ឆ្នាំ ២០២៥ កន្លងទៅ ខណៈមនុស្សប្រមាណ ៧២ នាក់ផ្សេងទៀតនៅកំពុងជាប់គាំងមិនទាន់រកឃើញនៅឡើយ។

គិតមកទល់ពេលនេះ ជនរងគ្រោះដែលមានស្លាប់បានកើនដល់ ១៥ នាក់ហើយក្នុងនោះ ៧ នាក់ជាស្ត្រី និង ៨ នាក់ជាបុរស ខណៈមនុស្ស ៩ នាក់ទៀតបានរងរបួសក្នុងហេតុការណ៍នេះផងដែរ។ ភាគច្រើននៃកម្មករដែលជាប់ក្រោមអគារដែលរលំនោះត្រូវបានជឿជាក់ថាជាអ្នកចំណាកស្រុកមកពីប្រទេសជិតខាងរួមមានប្រទេសមីយ៉ាន់ម៉ា និង កម្ពុជា។

ក្រុមសង្គ្រោះបានទម្លាយឱ្យដឹងថា ពួកគេបានព្យាយាមប្រើវិធីសាស្ត្រគ្រប់បែបយ៉ាងដើម្បីស្វែងរកជនរងគ្រោះដែលជាប់គាំងក្រោមគំនរអគារ ប៉ុន្តែទទួលស្គាល់ថាវាពិបាកខ្លាំងក្នុងការពន្លឿនការរុករកព្រោះតែអគារកំពុងសាងសង់នោះមានកម្ពស់ដល់ទៅ ៣០ ជាន់ហើយបានបាក់រលំគរលើគ្នា ទាំងមិនដឹងថាជាន់មួយណាមានជាប់មនុស្សក្នុងនោះឡើយ៕