ម៉ាឡេស៊ីជួយ ២.៣ លានដុល្លារដល់មីយ៉ាន់ម៉ា សម្រាប់ជាជំនួយគ្រោះរញ្ជួយដី

គូឡាឡាំពួរ ៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ប្រកាសផ្តល់ជំនួយមនុស្សធម៌ចំនួន ២.៣ លានដុល្លារ ដើម្បីជួយដល់អ្នកដែលរងផលប៉ះពាល់ពីគ្រោះរញ្ជួយដីនៅមីយ៉ាន់ម៉ា។

ការប្រកាសនេះកើតឡើងនៅពេលដែលសមាជិកក្រុមជំនួយ និងសង្គ្រោះគ្រោះមហន្តរាយម៉ាឡេស៊ីពិសេសចំនួន ៥០ នាក់ បានចេញដំណើរទៅកាន់រដ្ឋធានីណៃពិដោ របស់ប្រទេសមីយ៉ាន់ម៉ានៅព្រឹកថ្ងៃអាទិត្យ ដើម្បីជួយដល់កិច្ចខិតខំប្រឹងប្រែងមនុស្សធម៌ និងជួយសង្គ្រោះអាយុជីវិតមនុស្ស។

លោក អាន់វ៉ា បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា ការរួមចំណែកនេះឆ្លុះបញ្ចាំងពីការទទួលខុសត្រូវ និងសាមគ្គីភាពរបស់ម៉ាឡេស៊ី ក្នុងនាមជាប្រធានអាស៊ានឆ្នាំ ២០២៥។

លោក អាន់វ៉ា បន្ថែមថា អាទិភាពរបស់អាស៊ាន ក្នុងការការពារសុខុមាលភាពរបស់ប្រជាជនក្នុងតំបន់ គឺជាការបញ្ចេញប្រតិកម្មរហ័ស មានប្រសិទ្ធភាព និងទូលំទូលាយ ដោយសង្កត់ធ្ងន់លើរបៀបវារៈមនុស្សធម៌របស់ប្លុក ជាមួយក្តីមេត្តា ទំនួលខុសត្រូវរួម និងសាមគ្គីភាព។

សូមបញ្ជាក់ថា គ្រោះរញ្ជួយដីក្នុងកម្រិត ៧.៧ រ៉ិចទ័របានវាយប្រហារប្រទេសមីយ៉ាន់ម៉ា កាលពីថ្ងៃសុក្រ ដែលប៉ះពាល់យ៉ាងធ្ងន់ធ្ងរដល់ទីក្រុង Mandalay, Bago, Magway, រដ្ឋ Shan, Sagaing និង Naypyidaw។ ប្រទេស ថៃ ដែល ជា ប្រទេស ជិត ខាង ក៏ ទទួល រង ផល ប៉ះ ពាល់ ពី គ្រោះរញ្ជួយ ដី នេះ ដែរ។

របបយោធាមីយ៉ាន់ម៉ានិយាយថា មនុស្សជាង ១.៦០០ នាក់បានស្លាប់ ហើយតួលែខនេះអាចនឹងកើនឡើងបន្ថែមទៀត ខណៈដែលមនុស្សរាប់ពាន់នាក់រងរបួស និងយ៉ាងហោចណាស់ ១៣៩ នាក់ទៀតកំពុងបន្តបាត់ខ្លួន នេះបើយោងតាមប្រព័ន្ធផ្សព្វផ្សាយក្នុងស្រុករបស់មីយ៉ាម៉ា៕