ប្រធានាធិបតីអាមេរិក លោក ដូណាល់ ត្រាំ បាននិយាយថា សហរដ្ឋអាមេរិកនឹងជួយមីយ៉ាន់ម៉ា បន្ទាប់ពីគ្រោះរញ្ជួយដីបានវាយប្រហារយ៉ាងធ្ងន់ធ្ងរ

ប្រធានាធិបតីអាមេរិក លោក ដូណាល់ ត្រាំ បាននិយាយថា សហរដ្ឋអាមេរិកនឹងជួយមីយ៉ាន់ម៉ា បន្ទាប់ពីគ្រោះរញ្ជួយដីបានវាយប្រហារនៅជិតទីក្រុងធំទីពីររបស់ប្រទេស ដែលបានសម្លាប់មនុស្សជាង ១៤០ នាក់។ នេះបើតាមការចេញផ្សាយរបស់សារព័ត៌មាន CNN កាលពីប៉ុន្មានម៉ោងមុននេះ។

តាមសម្តី លោក ដូណាល់ ត្រាំ លោកបាននិយាយពីការិយាល័យ Oval យ៉ាងដូច្នេះ៖ «យើងនឹងជួយ….. យើងបាននិយាយ​ជាមួយប្រទេសរួចហើយ» ។

ការផ្តល់ជំនួយនេះ កើតឡើងបន្ទាប់ពីមេដឹកនាំរបបយោធា ដែលកំពុងកាន់អំណាចរបស់មីយ៉ាន់ម៉ា គឺលោក Min Aung Hlaing បានធ្វើការអំពាវនាវដ៏កម្រមួយសម្រាប់ជំនួយពីសហគមន៍អន្តរជាតិ។

គួរឱ្យដឹងដែរថា ប្រទេសមីយ៉ាន់ម៉ាកំពុងប្រឈមមុខនឹងចំណាត់ការរបស់រដ្ឋបាល ដូណាល់ ត្រាំ ក្នុងការកាត់បន្ថយថវិកាប្រមាណ ៥២ លានដុល្លារនៅក្នុងមូលនិធិ USAID ដោយយោងតាមការវិភាគថ្មីមួយ របស់អ្នកជំនាញខាងអភិវឌ្ឍន៍អន្តរជាតិ នៅមជ្ឈមណ្ឌល Center for Global Development។ អង្គការអន្តរជាតិនិយាយថា ការបំផ្លិចបំផ្លាញពីការរញ្ជួយដីដ៏ធំនៅថ្ងៃសុក្រនេះ នឹងត្រូវបានបូកបញ្ចូលគ្នាដោយការខាតបង់ជំនួយ៕

ប្រភព៖ CNN