ល្ងាចនេះ សម្ដេចធិបតី ហ៊ុន ម៉ាណែត អញ្ជើញជាអធិបតី ក្នុងពិធីបើកបុណ្យទន្លេលើកទី៩ ឆ្នាំ២០២៥

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នាល្ងាចថ្ងៃទី២២ ខែមីនា ឆ្នាំ២០២៥នេះ អញ្ជើញជាអធិបតី ក្នុងពិធីបើកបុណ្យទន្លេលើកទី៩ ឆ្នាំ២០២៥ នៅខេត្តតាកែវ។

ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានឱ្យដឹងថា ពិធីបុណ្យទន្លេ ដែលប្រារព្ធពិធីបើកនាឱកាសនេះ ជាបុណ្យលើកទី៩ សម្រាប់ព្រះរាជាណាចក្រកម្ពុជា និងជាបុណ្យលើកទី១ជាប្រវត្តិសាស្ត្រសម្រាប់ខេត្តតាកែវ។ ក្នុងនាមជាម្ចាស់ផ្ទះ រៀបចំពិធីបុណ្យទន្លេនេះ រដ្ឋបាលខេត្តតាកែវ បានសហការជាមួយក្រសួង ពាក់ព័ន្ធ មន្ទីរ អង្គភាព រួមនឹង មន្រ្តីរាជការ កងកម្លាំងប្រដាប់អាវុធគ្រប់ប្រភេទ ប្រជាពលរដ្ឋទាំងអស់ បានចូលរួមសហការរៀបចំឱ្យមានព្រឹត្តិការណ៍នានា ដូចជា ការជិះកង់ចម្ងាយ ៧៥គីឡូម៉ែត្រ ពីរាជធានីភ្នំពេញមកទីរួមខេត្តតាកែវ ក្រោមប្រធានបទ «សេរីភាពនៃការជិះកង់» កាលពីថ្ងៃទី៨ ខែមីនា ឆ្នាំ២០២៥កន្លងទៅថ្មីៗនេះ ការរត់កម្សាន្តមហាជនចម្ងាយ ៥គីឡូម៉ែត្រ ការដាំ ដើមឈើរួមគ្នា កីឡាប៉េតង់មហាជន កីឡាអុកចត្រង្គ កីឡារែក លោតមឹក កីឡាបាល់ទះ មហាជនបាល់ទាត់មិត្តភាព កីឡាប៉ារ៉ាម៉ូទ័រ ប្រដាល់គុនខ្មែរ និងការជិះទូកកាយ៉ាកជាដើម ដែលបានបើកឱកាសឱ្យប្រជាពលរដ្ឋគ្រប់មជ្ឈដ្ឋានបាន ចូលរួមលេងកម្សាន្តរីករាយក្រោមម្លប់ នៃសុខសន្តិភាព។

ជាមួយគ្នានេះ ក៏មានរៀបចំពិព័រណ៍ផលិតផលពាណិជ្ជកម្មគ្រប់ប្រភេទ ក្នុងគោលបំណងជំរុញសកម្មភាពពាណិជ្ជកម្ម ផលិតផលក្នុងស្រុក ក្នុងតំបន់ និងតំបន់ទន្លេនៅតាមមូលដ្ឋានឱ្យបានទូលំទូលាយ ដើម្បីជាការចូលរួមចំណែកដល់ការអភិវឌ្ឍសេដ្ឋកិច្ចស្របតាម យុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧។

ជាថ្មីម្តងទៀត ជំនួសមុខឱ្យក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំង ប្រដាប់អាវុធ និងប្រជាពលរដ្ឋក្នុងខេត្តតាកែវទាំងអស់ និងក្នុងនាមខ្លួនឯកឧត្តមអភិបាលខេត្តផ្ទាល់ សូមគោរព ថ្លែងអំណរគុណដល់ប្រមុខរាជរដ្ឋាភិបាលកម្ពុជាមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលបានសម្រេចរៀបចំពិធី បុណ្យទន្លេលើកទី៩ ឆ្នាំ២០២៥នេះ ព្រមទាំងបានផ្តល់នូវមហាកិត្តិយសដ៏ឧត្តុង្គឧត្តមអញ្ជើញជាអធិបតីដ៏ខ្ពង់ខ្ពស់ ក្នុងពិធីបើកជាផ្លូវការពិធីបុណ្យទន្លេលើកទី៩ ជាប្រវត្តិសាស្រ្តបំផុតសម្រាប់ខេត្តតាកែវនាឱកាសនេះ។

ឯកឧត្តមអភិបាលខេត្តសង្ឃឹមជឿជាក់ថា បន្ទាប់ពីពិធីបុណ្យទន្លេនេះ បានបញ្ចប់ ក្នុងនាមជាម្ចាស់ផ្ទះក្នុងការសហការរៀបចំពិធីនេះ បានបន្សល់ទុកនូវសមិទ្ធផល សង្គមយ៉ាងច្រើន ទាំងផ្នែកហេដ្ឋារចនាសម្ព័ន្ធរូបវន្ត ទាំងផ្នែកស្មារតី ឥរិយាបថ ផ្នត់គំនិត ចំណេះដឹងគ្រប់អ្នកពាក់ព័ន្ធ ទាំងវិស័យមុខងារសាធារណៈ វិស័យឯកជន ត្រូវបន្តរួមគ្នាគិត រួមគ្នាធ្វើ និង រួមគ្នាទទួលខុសត្រូវ ក្នុងការបន្តកិច្ចអភិវឌ្ឍខេត្ត ឱ្យប្រែក្លាយជាខេត្តដែលស៊ីវិល័យប្រកប ដោយសក្តានុពលទាក់ទាញ ទាំងថ្នាក់តំបន់ និងលើឆាកអន្តរជាតិ ទាក់ទាញបណ្តា វិនិយោគិន ភ្ញៀវទេសចរជាតិ អន្តរជាតិ ចូលមកវិនិយោគ ទស្សនាសម្រាកលម្ហែ កម្សាន្ត ដែលជាកត្តាជួយជំរុញសេដ្ឋកិច្ចក្នុងខេត្ត លើកកម្ពស់ជីវភាពរស់នៅរបស់ប្រជាពលរដ្ឋឱ្យបានកាន់តែប្រសើរឡើងថែមទៀត ស្របតាមគោលនយោបាយ ផែនការយុទ្ធសាស្ត្រ អភិវឌ្ឍន៍ជាតិ យុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ដែលមានចក្ខុវិស័យវែងឆ្ងាយ សំដៅប្រែក្លាយកម្ពុជាឱ្យទៅជាប្រទេសមានចំណូលមធ្យមកំរិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០។

រាល់សមិទ្ធផលទាំងអស់ខាងលើនេះ ពិតជាមិនអាចបំភ្លេចបាន អំពីតម្លៃនៃសន្តិភាព ក្រោមការដាក់ចេញនូវនយោបាយ ឈ្នះ-ឈ្នះ របស់សម្តេចអគ្គមហាសេនាតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា និងការបន្ត ដឹកនាំដ៏ត្រឹមត្រូវប្រកបដោយចក្ខុវិស័យវែងឆ្ងាយរបស់ប្រមុខរាជរដ្ឋាភិបាលកម្ពុជា ដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើ ឱ្យខេត្តតាកែវមានការប្រែប្រួលមុខមាត់គួរឱ្យកត់សម្គាល់ ហើយសេដ្ឋកិច្ចមានការរីកចម្រើនជាបន្តបន្ទាប់ សំដៅរួមចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋកាន់តែមាន ប្រសិទ្ធភាព៕