កម្មការិនីក្នុងវិស័យកាត់ដេរ៖ រាជរដ្ឋាភិបាល និងក្រសួងការងារ តែងលើកកម្ពស់សិទ្ធិ ឱកាសការងារ និងអត្ថប្រយោជន៍ជាអាទិភាព ដល់ស្ត្រីគ្រប់រូប
ភ្នំពេញ៖ កម្មការិនីក្នុងវិស័យកាត់ដេរ បានលើកឡើងថា រាជរដ្ឋាភិបាល និងក្រសួងការងារ តែងលើកកម្ពស់សិទ្ធិ ឱកាសការងារ និងអត្ថប្រយោជន៍ជាអាទិភាពដល់ស្ត្រីគ្រប់រូប ហើយស្ត្រីត្រូវបានផ្ដល់សិទ្ធិជាអាទិភាពជានិច្ច មិនថាក្នុងសង្គមការងារ ឬសង្គមគ្រួសារ ពោលគឺពួកគាត់ទទួលបាននូវការយកចិត្តទុកដាក់ និងលើកកម្ពស់គ្រប់ផ្នែក។
ក្រុមកម្មការិនីនៃក្រុមហ៊ុន សាប្រ៊ីណា (ខេមបូឌា) ហ្គារម៉ិន ម៉ាញូហ្វាក់ឆឺរីង ខប (SABRINA(CAMBODIA) GARMENT MANUFACTURING CORP.) ក្នុងខេត្តកំពង់ស្ពឺ បានបញ្ជាក់ថា នៅកន្លែងបំពេញការងារ ពួកគាត់ទទួលបានសិទ្ធិ និងសមភាពពេញលេញនិងមានការយកចិត្តទុកដាក់ពីថ្នាក់ដឹកនាំគ្រប់ជាន់ថ្នាក់ ផ្ដល់នូវអត្ថប្រយោជន៍ផ្សេងៗជាច្រើនដល់ពួកគាត់ដោយស្មើភាពភាពគ្នាអាស្រ័យលើសមត្ថភាពជាក់ស្តែង។
កម្មការិនីនៅរោងចក្រនេះបានបញ្ជាក់បន្ថែមថា ពួកគាត់ពិតជាសប្បាយចិត្ត ដែលមានរាជរដ្ឋាភិបាល ក៏ដូចជាក្រសួងការងារនិងបណ្ដុះបណ្ដាលវិជ្ជាជីវៈ ដែលតែងតែគិតគូរយកចិត្តទុកដាក់លើកកម្ពស់ដល់ស្ត្រី ផ្ដល់សិទ្ធិសមភាព អាទិភាព គិតគូរអំពីសុខទុក្ខ ពិសេសតែងមានគោលការណ៍ផ្ដល់អត្ថប្រយោជន៍ជាច្រើនដល់កិច្ចការរបស់ស្ត្រីជានិច្ច។ ជាមួយគ្នានេះដែរ កម្មការិនីក្នុងវិស័យកាត់ដេរ ក៏សូមអរគុណដល់រាជរដ្ឋាភិបាល និងក្រសួងការងារនិងបណ្ដុះបណ្ដាលវិជ្ជាជីវៈ ដែលមានយន្តការវិជ្ជមានក្នុងការលើកកម្ពស់សមភាពយេនឌ័រ ដោយបានបង្កើនភាពអង់អាចដល់ស្ត្រីនិងក្មេងស្រីគ្រប់រូប អាចប្រកបកិច្ចការងារផ្សេងៗដោយសិទ្ធិសេរីពេញលេញក្នុងសង្គម។
សូមជម្រាបថា ដើម្បីអបអរសាទរទិវាអន្តរជាតិនារី៨ មីនា ខួបទី ១១៤ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រួមនិងបងប្អូនកម្មករនិយោជិតនៃក្រុមហ៊ុន សាប្រ៊ីណា ជាង ៥៥០០នាក់ បានប្រារព្ធកម្មវិធីជប់លៀងអបអរសាទររួមគ្នាយ៉ាងសប្បាយរីករាយ នៅក្នុងបរិវេណក្រុមហ៊ុន សាប្រ៊ីណា ក្នុងស្រុកសំរោងទង ខេត្តកំពង់ស្ពឺ កាលពីចុងសប្ដាហ៍នេះ៕
