ហេតុអ្វីបានជាគេជ្រើសរើសថ្ងៃទី ៨ មីនា ជាថ្ងៃប្រារព្ធទិវានារីអន្តរជាតិ?

ទិវានារីអន្តរជាតិ ឬ ជាភាសាអង់គ្លេសថា «International Women’s Day» ជាទិវាមួយតែងតែប្រារព្ធធ្វើឡើងនៅថ្ងៃទី ០៨ ខែមីនា ជារៀងរាល់ឆ្នាំ។ ថ្ងៃដែលប្រារព្ធធ្វើទិវានេះដែរ គឺជាថ្ងៃដែលមានសារសំខាន់មួយ ឆ្លុះបង្ហាញឱ្យពិភពលោកឃើញនៅភាពមោះមុត អង់អាចក្លាហានរបស់ស្ត្រី ដែលអាចធ្វើអ្វីៗគ្រប់យ៉ាងបានដូចជាបុរសៗដែរ។

តើទិវាមួយនេះ មានប្រវត្តិកកើតឡើងដំបូងបែបណា ហើយហេតុអ្វីបានជាគេកំណត់យកថ្ងៃ ០៨ មីនា ជាថ្ងៃប្រារព្ធទិវានេះ?

ដើមហេតុនៃការកកើតទិវាអន្តរជាតិនេះឡើង គឺចាប់ផ្ដើមនៅថ្ងៃទី ៨ ខែមីនា ឆ្នាំ ១៨៥៧ នាទីក្រុងញូយ៉ក សហរដ្ឋអាមេរិក នៅពេលដែលកម្មការិនីផ្នែកតម្បាញ បានចាប់ដៃគ្នាក្រោកឈរធ្វើបាតុកម្មជុំវិញលក្ខខណ្ឌការងារគ្មានភាពយុត្តិធម៌ និង មិនមានសិទ្ធិស្មើគ្នាចំពោះស្ត្រី។ ក្រុមកម្មការិនីទាំងនោះ បានលើកក្រដាសតវ៉ាទាមទារឱ្យកាត់បន្ថយម៉ោងការងារ និង ដំឡើងប្រាក់បៀវត្ស។ ការតវ៉ាប្រឆាំងទាមទារសិទ្ធិស្មើគ្នានេះ ត្រូវបានធ្វើឡើងម្ដងហើយម្ដងទៀត រហូតទាល់តែម្ចាស់ក្រុមហ៊ុនរោងចក្រ ព្រមទទួលយល់ស្របតាម។

មកដល់ថ្ងៃទី ៨ ខែមីនា ឆ្នាំ ១៩០៨ កម្មការិនីនៅរោងចក្រកាត់ដេរ បាននាំគ្នាចុះធ្វើបាតុកម្មតាមតំបន់ Lower East Side ក្នុងក្រុងញូយ៉ក ដើម្បីតវ៉ាប្រឆាំងលើពលកម្មកុមារ លក្ខខណ្ឌការងារ និង ទាមទារឱ្យស្ត្រីមានការបោះឆ្នោតដែរ។ ដំណើរតស៊ូប្រឆាំងយ៉ាងស្វិតស្វាញពីដំណាក់កម្មការិនីទាំងនោះ បានជំរុញទឹកចិត្តយ៉ាងខ្លាំងក្លា ដល់នារីៗជាកម្មការិនីលើពិភពលោកទាំងមូល។

រហូតមកដល់ឆ្នាំ ១៩១០ ថ្ងៃទី ៨ ខែមីនា ក៏ត្រូវបានសម្រេចជ្រើសយកជាថ្ងៃ «ទិវានារីអន្តរជាតិ» ដែលជាថ្ងៃបង្ហាញនូវភាពអង់អាចក្លាហានរបស់ស្ត្រីលើសកលលោក និង បន្តប្រារព្ធធ្វើឡើងជារៀងរាល់ឆ្នាំ រហូតមកទល់បច្ចុប្បន្ននេះ៕