លោកតាធាក់ស៊ីក្លូ អាយុប្រមាណ ៧០ ឆ្នាំ ម្នាក់ ត្រូវបានបុរសវ័យក្មេងម្នាក់ វាយត្រូវក្បាលចំនួន ២ ដៃ ដោយសារតែប៉ះពាក្យសម្ដីគ្នា
លោកតាធាក់ស៊ីក្លូ អាយុប្រមាណ ៧០ ឆ្នាំ ម្នាក់ ត្រូវបានបុរសវ័យក្មេងម្នាក់ វាយត្រូវក្បាលចំនួន ២ ដៃ ដោយសារតែប៉ះពាក្យសម្ដីគ្នា ដែលហេតុការណ៍នេះបង្កការភ្ញាក់ផ្អើលកាលពីវេលាម៉ោង ៩ និង ៣០ នាទីយប់ ថ្ងៃទី ៤ ខែមីនា ឆ្នាំ ២០២៥ ស្ថិតនៅផ្សារឌុយមិច ផ្លូវ ១០៩ ក្បែរស្តុបសុកហុក សង្កាត់អូរឫស្សី ខណ្ឌ ៧ មករា រាជធានីភ្នំពេញ។
តាមការបញ្ជាក់ពីបុរសវ័យក្មេង បានឲ្យដឹងថា មុនឈានដល់ប្រើអំពើហិង្សាវាយទៅលើលោកតាវ័យ ៧០ ឆ្នាំ ដែលធាក់ស៊ីក្លូគេងតាមផ្លូវនោះ ក៏ដោយសារតែលោកតាឈ្លើយ និង តមាត់ចុះឡើងជាមួយរូបខ្លួន។
ដោយឡែកបើតាម លោកតាស៊ីក្លូ ក៏បានបញ្ជាក់ដែរថា រូបគាត់មិនបានទៅនិយាយអ្វីជាមួយបុរសខាងលើធ្ងន់ធ្ងរអ្វីនោះទេ។ ក្នុងនោះ ខណៈគាត់កំពុងអង្គុយនៅលើស៊ីក្លូសុខៗ ស្រាប់តែបុរសវ័យក្មេងនោះ មកវាយគាត់តែម្ដង ត្រូវក្បាលចំនួន ២ ដៃ។
ក្រោយពេលកើតហេតុកម្លាំងសមត្ថកិច្ចបានចុះមកដល់ចំណុចកើតហេតុ រួចនាំបុរសវ័យក្មេងខាងលើយកទៅកាន់អធិការដ្ឋាននគរបាលខណ្ឌ ៧ មករា ដើម្បីចាត់ការតាមនីតិវិធី៕
