រាជរដ្ឋាភិបាលត្រៀមនឹងដាក់ឲ្យអនុវត្តនូវ «កម្មវិធីលើកកម្ពស់ភាព ប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ច នៅក្នុងបរិការណ៍សកល ដែលមានភាពមិនប្រាកដប្រជាខ្ពស់ ឆ្នាំ២០២៥-២០២៨»

គម្រោងការដាក់អោយប្រើប្រាស់កម្មវិធីថ្មីនេះ បានធ្វើឡើងបន្ទាប់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី បានគូសបញ្ជាក់ថា ស្ថិតនៅក្នុងស្ថានភាពសេដ្ឋកិច្ចប្រែប្រួល តម្រូវឲ្យគោលនយោបាយប្រែប្រួលដូចគ្នា។

សម្ដេចមហាបវរធិបតី ហ៊ុន ម៉ាណែត កាលពីថ្ងៃទី៤ ខែមីនា ឆ្នាំ២០២៥ បានបង្ហាញថា ក្នុងរយៈពេល១៩ខែមកនេះ រាជរដ្ឋាភិបាលនីតិកាលទី៧ បានបន្ដដាក់ចេញ និងអនុវត្តវិធី យន្ដការកែទម្រង់បន្ដបន្ទាប់ ដើម្បីឆ្លើយតបបញ្ហានានា។

ហេតុដូចនេះហើយ រាជរដ្ឋាភិបាលបានរៀបចំសន្និសីទចក្ខុវិស័យប្រទេសកម្ពុជាឆ្នាំ២០២៥ ស្ដីពី «យុទ្ធសាស្ដ្រកំណើនថ្មីរបស់កម្ពុជា៖ អាទិភាពសម្រាប់ការអភិវឌ្ឍប្រកបដោយគុណភាព និងនិរន្ដរជាតិ» ក្នុងគោលបំណងដើម្បីធ្វើការវាយតម្លៃពីភាពខ្លាំង និងភាពខ្សោយ នៃសមិទ្ធកម្មសេដ្ឋកិច្ចរបស់កម្ពុជានាពេលបច្ចុប្បន្ន ដើម្បីកំណត់ទិដ្ឋភាពសំខាន់ៗដែលចាំបាច់ត្រូវកែលម្អ ដើម្បីសម្រេចបាន នូវចក្ខុវិស័យអភិវឌ្ឍន៍កម្ពុជា ។

សន្និសីទកាលពី ថ្ងៃទី៤ ខែមីនា ឆ្នាំ២០២៥ បានរៀបចំឡើងក្នុងកិច្ចប្រឹងប្រែង ដើម្បីប្រមូលហេតុចូលដែលបកស្រាយនិងបង្ហាញឱ្យកាន់តែច្បាស់ អំពីបញ្ហាប្រឈម ចំពោះមុខ និងកាលានុវត្តភាព ក្នុងការជួយកម្ពុជា ក្នុងការអនុវត្តកម្មវិធីកំណែទម្រង់ប្រកបដោយប្រសិទ្ធភាព ក្នុងបរិការណ៍នៃស្ថានភាព ដែលមានភាពមិនច្បាស់លាស់ខ្ពស់ ដែលអាចប៉ះពាល់ដល់គន្លង នៃការអភិវឌ្ឍ នាពេលអនាគតនៅកម្ពុជា។

នៅក្នុងសន្និសីទចក្ខុវិស័យប្រទេសកម្ពុជាឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត ចង់ឱ្យមានការពិភាក្សាផុលផុសទៅលើទី១៖ ការកំណត់ និងអភិវឌ្ឍន៍វិស័យដែលជាប្រភពកំណើន ជាពិសេសឧស្សាហកម្មយុទ្ធសាស្ត្រលេចឡើងថ្មីៗ និងការទាក់ទាញវិនិយោគដែលមានតម្លៃបន្ថែមខ្ពស់។ ទី២៖ ការត្រៀមលក្ខណៈចាកចេញពីចំណាត់ក្រុមប្រទេសអភិវឌ្ឍតិចតួច។ ទី៣៖ យុទ្ធសាស្ត្រក្នុងការអភិវឌ្ឍសហគ្រាសធុនមីក្រូ, តូច និង ធ្យម និងធុរកិច្ចបង្កើតថ្មី តាមរយៈការបន្តពង្រឹង ប្រព័ន្ធអេកូឡូស៊ី និងការបង្កើនសមត្ថភាព និងផលិតភាព និងទី៤៖ ការអភិវឌ្ឍ ជំនាញបច្ចេកទេស បំពេញគម្លាតនៃជំនាញ និងការបំពេញតម្រូវការនាពេលអនាគត។

ទស្សនទាននៃយុទ្ធសាស្ដ្រកំណើនថ្មីរបស់កម្ពុជា ទាមទារអោយធ្វើ សមិទ្ធកម្ម និង ទស្សនៈវិស័យកំណើន, ការកែទម្រង់រចនាសម្ព័ន្ធ សម្រាប់កំណើនរយៈពេលវែង, និងការផ្សារភ្ជាប់គ្នាចក្ខុវិស័យកំណើនទៅនឹង អាទិភាពគោលនយោបាយ។

យ៉ាងណាក៏ដោយយុទ្ធសាស្ត្រថ្មីនេះ ក៏មានភាពស៊ីចង្វាក់ទៅនឹង «យុទ្ធសាស្ត្របញ្ចកោណ» ជាច្រើន, ហើយដើម្បីសម្រេចបានកំណើនខ្ពស់ និង មានចីរភាព, ការកែទម្រង់រចនាសម្ព័ន្ធត្រូវតែធ្វើជាចាំបាច់ និងកាន់តែឆាប់, កាន់តែប្រសើរ។ ទោះបីជាយ៉ាងនេះក្តី, ការកែទម្រង់មិនគួរត្រូវ ធ្វើដោយតក់ក្រហល់ពេល រហូតប៉ះពាល់ដល់សន្តិភាព និងស្ថិរភាពជារួមនោះទេ។

សូមបញ្ជាក់ថា តម្រូវការអោយដាក់ប្រើប្រាស់គម្រោងកម្មវិធីថ្មីនេះ គឺដោយសារសេដ្ឋកិច្ចកម្ពុជាបានរងគ្រោះក្នុងយុគសម័យកូវីដ១៩ រហូតដល់ក្រោមសូន្យហើយទើបតែងើបឡើងវិញសន្សឹមៗ ដែលឆ្នាំ២០២៤កន្លងមកថ្មីៗនេះសេដ្ឋកិច្ចកម្ពុជាងើបឡើងវិញបានត្រឹមតែ៦ភាគរយ ខណៈមុនវិបត្តិនេះសេដ្ឋកិច្ចកម្ពុជាមានកំណើនក្នុងរង្វង់៧ភាគរយ។

ប្រមុខរាជរដ្ឋាភិបាលបានបញ្ជាក់ថា បើទោះបីសេដ្ឋកិច្ចកម្ពុជា បានងើបឡើងវិញក្តី ប៉ុន្តែការរងផលប៉ះពាល់ នៃសេដ្ឋកិច្ចកម្ពុជា តាំងតែពីវិបត្តិកូវីដ-១៩ រហូតមកដល់វិបត្តិ សង្គ្រាមតាមបណ្តាប្រទេសនៅលើពិភពលោក ក៏បានបន្តផលប៉ះពាល់ ដល់សេដ្ឋកិច្ចកម្ពុជានៅឡើយ។ ទន្ទឹមនេះការកែសម្រួលគោលនយោបាយនេះបានធ្វើឡើង បន្ទាប់ពីកត្តាក្រៅប្រទេស មានហានិភ័យ និងភាពមិនប្រាកដប្រជា កើតមានកាន់តែច្រើនឡើងៗ រួមមាន ៖ ទី១ ការកើនឡើងនូវគោលនយោបាយគាំពារនិយម និងសង្គ្រាមពាណិជ្ជកម្ម។

ទី២ ភាពតានតឹងនៃកត្តាភូមិសាស្ត្រសេដ្ឋកិច្ចដែលអាចបន្ទច់បង្អាក់ដល់ច្រវាក់ផ្គត់ផ្គង់សកល និងនាំទៅដល់ការកើនថ្លៃទំនិញជាអន្តរជាតិ។ ទី៣ ការបែកខ្ញែក ភូមិសាស្ត្រសេដ្ឋកិច្ច និងពាណិជ្ជកម្ម។ និង ទី៤ ផលប៉ះពាល់កាន់តែធ្ងន់ធ្ងរពីការប្រែប្រួល អាកាសធាតុ និងគ្រោះធម្មជាតិ ។

សូមបញ្ជាក់ថា ក្នុងរយៈពេលជាង២ទសវត្សរ៍កន្លងមកនេះ សេដ្ឋកិច្ចកម្ពុជាសម្រេចបានកំណើន ក្នុងរង្វង់៧ភាគរយ ក្នុងមួយឆ្នាំ ដែលគាំទ្រដោយ វិស័យកាត់ដេរ ទេសចរណ៍ កសិកម្មនិង សំណង់ ប៉ុន្តែកម្ពុជាមិនអាចនៅបន្តពឹងអាស្រ័យតែទៅលើវិស័យទាំង៤ ក្នុងការជំរុញកំណើនសេដ្ឋកិច្ចតទៅមុខទៀតជាអចិន្ត្រៃយ៍នោះបានទេ។ ពោលគឺកម្ពុជា ត្រូវតែធ្វើពិពិធកម្ម មូលដ្ឋានគ្រឹះ នៃសេដ្ឋកិច្ច របស់ខ្លួនជាចាំបាច់ ដោយរិះរកវិធីពង្រីកសក្ដានុពលសេដ្ឋកិច្ចជាតិលើច្រើនវិស័យ ពង្រីកមុខព្រួញសេដ្ឋកិច្ច ជាអតិបរមាទៅតាមលទ្ធភាពដែលអាចធ្វើបាន ដើម្បីមានកំណើនសេដ្ឋកិច្ចជានិរន្តរ៍។

យ៉ាងណាក៏ដោយសម្ដេចបវរធិបតី ហ៊ុន ម៉ាណែត បានលើកបង្ហាញថា «ក្នុងរយៈពេលជាង១៩ខែកន្លងទៅនេះ រាជរដ្ឋាភិបាលបានបន្តដាក់ចេញ និងអនុវត្តកម្មវិធី, យន្តការកែទម្រង់ និងវិធានការឆ្លើយតបជាបន្តបន្ទាប់។ ជាក់ស្ដែងពាក់ព័ន្ធនឹងកម្មវិធីគោលនយោបាយអាទិភាព៦ និងវិធានការគន្លឹះទាំង៥, រាជរដ្ឋាភិបាលបានដាក់ចេញយន្តការអនុវត្ត និងបន្តតាមដាន និងវាយតម្លៃ ដែលកន្លងទៅនេះ ទទួលបាននូវលទ្ធផលគួរជាទីមោទនៈ»។

សូមបញ្ជាក់ថា ការដាក់ត្រៀមដាក់អោយអនុវត្ត «កម្មវិធីលើកកម្ពស់ភាព ប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ច នៅក្នុងបរិការណ៍សកល ដែលមានភាពមិនប្រាកដប្រជាខ្ពស់ ឆ្នាំ២០២៥-២០២៨» នេះ ក៏ជាផ្នែកមួយក្នុងគោលបំណងកំណត់នូវទស្សនរួមអំពីទិសដៅអភិវឌ្ឍន៍កម្ពុជា ក្នុងដំណើរឆ្ពោះទៅ សម្រេចបានចក្ខុវិស័យកម្ពុជានៅឆ្នាំ ២០៥០ខាងមុខនេះ៕