រដ្ឋលេខាធិការក្រសួងកិច្ចការនារី លោកជំទាវ ញ៉ែម មរកតផ្ដាំឱ្យ អ្នកតាំងខ្លួនជាមហេសីព្រះបាទជ័យវរ្ម័នទី៧ ត្រៀមខ្លួន ព្រោះក្រសួងពាក់ពន្ធ័នឹងអញ្ជើញទៅបង្ហាញខ្លួនឆាប់ៗ

នៅថ្ងៃទី ០៣ ខែកុម្ភៈ ឆ្នាំ ២០២៥ រដ្ឋលេខាធិការក្រសួងកិច្ចការនារី លោកជំទាវ ញ៉ែម មរកត បានបញ្ចេញមតិយោបល់មួយចំនួននៅលើគណនីរបស់លោកជំទាវផ្ទាល់ ពាក់ព័ន្ធទៅនឹងករណីមានអ្នករកស៊ីតាំងខ្លួនជាបារមីនេះកាន់ បារមីនោះកាន់ជាដើម។

ក្នុងនោះ លោកជំទាវបានមានប្រសាសន៍ដូច្នេះថា ៖ «ប្រកបមុខរបរដោយសេរីភាពពេញលេញ រកស៊ីលក់ដូររីកចម្រើនហើយ បែជាយកកិត្តិនាមវិរៈក្សត្រ វិរៈក្សត្រី តួអង្គជាច្រើនទៀតដែលមានស្នាដៃល្បីល្បាញពេញពិភពលោកមកលេងសើចសម្រាប់លក់ផលិតផលទៅវិញ?? ខ្ញុំគាំទ្រប្រសាសន៍ណែនាំរបស់លោកជំទាវឧកញ៉ា ហ៊ុន ស៊ីណាត ដែលជាចាស់ទុំ។ ប្រហែល ២០ ឆ្នាំមកហើយ ខ្ញុំ និង លោកស្រី ផល្លីកា បានស្រាវជ្រាវប្រវត្តិមហេសីទាំង ២ អង្គរបស់ព្រះបាទជ័យវរ្ម័នទី ៧ ចងក្រងជាសៀវភៅ គឺជាស្ត្រីដ៍អស្ចារ្យជួយស្វាមីការពារជាតិទឹកដី លើកស្ទួយវិស័យសេដ្ឋកិច្ច អប់រំ សាសនា ។ល។ មិនមែនជាចរិត និង សកម្មភាពរហេចរហាចដូចអ្នកលក់ផលិតផលខ្លះនោះទេ ហេតុនេះប្អូនៗកុំយកព្រះនាមអតីតមហាវិរក្សត្រ និង តាំងខ្លួនជាតួអង្គព្រះមហេសីវីរៈបុរសជំនាន់មុនមកតាំងជារូបខ្លួនចាប់ជាតិ ឬ ដឹងជាតិកំណើតទៀតវាមិនអាចទៅរួចទេ គ្រាន់តែគោរពប្រតិបត្តិគឺមិនខុសឡើយ។ រកស៊ីធម្មតាៗទៅបានសុខ និង មានកិត្តិយសគ្រប់គ្រាន់ហើយ»។

បន្ថែមលើសពីនេះ នៅថ្ងៃទី ០៤ ខែកុម្ភៈ ឆ្នាំ ២០២៥ នេះ លោកជំទាវបានបង្ហោះសារបន្ថែមឱ្យដឹងថា ៖ «ក្រោយលោកជំទាវ ហ៊ុនស៊ីណាត លោកឡាយ មុននេះ ខ្ញុំបានយកសៀវភៅស្រាវជ្រាវពីបដិមាដែលឆ្លាក់នៅអង្គរវត្ត និង ប្រវត្តិមហេសីទាំងពីររបស់ព្រះបាទជ័យវរ្ម័នទី៧មកមើល លោកជំទាវស្រែកប្រដៅមិនខុសទេ រកស៊ីកុំចេះតែបែកឆ្វេងតាំងខ្លួនជាបារមីនេះ បារមីនោះកាន់ដើម្បីផលប្រយោជន៍ក្រុមខ្លួន ហើយមកបន្ទាបបន្ថោកកិត្យានុភាពជាតិ សាសនា វីរៈបុរស វីរៈស្ត្រីជាដូនតាជំនាន់មុន វាមិនអាចទៅរួចទេ។ ប្អូនដែលតាំងខ្លួនជាមហេសីព្រះអង្គត្រៀមខ្លួនទៅ ព្រោះឮថាក្រសួងពាក់ព័ន្ធនឹងអញ្ជើញទៅបង្ហាញខ្លួនឆាប់ៗហើយ»៕