លោក ស៊ុន ចាន់ថុល អញ្ជើញសម្ពោធទីស្នាក់ការបក្សប្រជាជនកម្ពុជា ក្នុងសង្កាត់ស្ទឹងមានជ័យទី២
(ភ្នំពេញ)៖ នៅថ្ងៃទី៥ ខែមករា ឆ្នាំ២០២៥នេះ លោក ស៊ុន ចាន់ថុល សមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខណ្ឌមានជ័យ បានអញ្ជើញសម្ពោធដាក់ឱ្យប្រើប្រាស់ទីស្នាក់ការបក្សប្រជាជនកម្ពុជាក្នុងសង្កាត់ស្ទឹងមានជ័យទី២ និងប្រារព្ធពិធីរំលឹកខួបអនុស្សាវរីយ៌ទិវាជ័យជម្នះ៧មករា លើកទី៤៦។
មុននឹងចាប់ផ្តើមមតិសំណេះ លោក ស៊ុន ចាន់ថុល បានពាំនាំមកនូវសេចក្តីនឹករលឹក និងការផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ព្រមទាំងថ្នាក់ដឹកនាំគណបក្ស ដែលជានិច្ចកាលសម្តេច តែងតែយកចិត្តទុកដាក់ខ្ពស់ចំពោះសុខទុក្ខប្រជាពលរដ្ឋទូទាំងប្រទេស។
លោក ស៊ុន ចាន់ថុល បានថ្លែងកោតសសើរក្រុមការងារចុះមូលដ្ឋានសង្កាត់ស្ទឹងមានជ័យ២ ដែលមានលោក យុន ហេង សមាជិកគណៈកម្មាធិការកណ្តាលជាប្រធាន និងក្រុមការងារថ្នាក់មូលដ្ឋានគ្រប់ជាន់ថ្នាក់ ដែលបានប្រឹងប្រែងអស់កម្លាំងកាយចិត្តចុះរួមសុខរួមទុក្ខជាមួយប្រជាពលរដ្ឋ ស្របតាមអនុសាសន៍ណែនាំរបស់សម្តេចតេជោប្រធានគណបក្ស។
លោក ស៊ុន ចាន់ថុល បានគូសរំលេចផងដែរថា អគារទីស្នាក់ការគណបក្សប្រជាជនកម្ពុជា ដែលសម្ពោធដាក់ឱ្យប្រើប្រាស់នៅថ្ងៃនេះ គឺជាសមិទ្ធផលថ្មីមួយនៅក្នុងសង្កាត់ស្ទឹងមានជ័យទី២ មានសារៈសំខាន់សម្រាប់បម្រើឱ្យរដ្ឋបាលគណបក្សនៅថ្នាក់មូលដ្ឋាន ហើយអគារនេះក៏បានបង្ហាញពីភាពរឹងមាំរបស់គណបក្សដែលមានភាពចាស់ទុំខាងនយោបាយ និងត្រៀមលក្ខណៈរួមសុខរួមទុក្ខជាមួយប្រជាពលរដ្ឋគ្រប់កាលៈទេសៈ មិនរត់ចោលប្រជាពលរដ្ឋ និងត្រៀមដឹកនាំប្រទេសសម្រាប់រយៈពេលយូរអង្វែងតទៅទៀត។
បន្ថែមលើនេះ លោក ស៊ុន ចាន់ថុល បានលើកបង្ហាញពីស្នាដៃ និងសមិទ្ធិផលរបស់គណបក្សប្រជាជនកម្ពុជាក្នុងរយៈពេល៤៦ឆ្នាំកន្លងមកនេះមានជាអាទិ៍ការរំដោះប្រទេសជាតិពីរបបប្រល័យពូជសាសន៍ ការបង្រួបបង្រួមជាតិ រកបានសន្តិភាពពេញលេញជូនជាតិ តាមរយៈនយោបាយឈ្នះ ឈ្នះ ដែលជាយុទ្ធសាស្ត្រដ៏មានប្រសិទ្ធីរបស់សម្តេចតេជោ ហ៊ុន សែន ព្រមទាំងសមិទ្ធិផលអភិវឌ្ឍន៍ជាច្រើនរាប់មិនអស់មានការរីកចម្រើនលើគ្រប់វិស័យ។
បន្តវេនពីគោលដៅជាយុទ្ធសាស្ត្រអភិវឌ្ឍជាតិនៃរាជរដ្ឋាភិបាលមុន រាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃ និងស្វាហាប់របស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី អនុប្រធានគណបក្សប្រជាជនកម្ពុជា រួមជាមួយថ្នាក់ដឹកនាំគ្រប់លំដាប់ថ្នាក់ បានប្តេជ្ញាអនុវត្តគោលដៅអភិវឌ្ឍន៍ប្រទេសកម្ពុជា ឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
ដើម្បីសម្រេចគោលដៅនេះ រាជរដ្ឋាភិបាលបានខិតខំបំពេញភារកិច្ចជាច្រើន ដូចជាការខិតខំអភិវឌ្ឍហេដ្ឋារចនាសម្ព័ន្ធស្ពាន ថ្នល់ អគ្គិសនី អាកាសយាន្តដ្ឋាន ផ្លូវដែក និងធនធានមនុស្ស។ ជាមួយគ្នានេះ ចាំបាច់ត្រូវមានការចូលរួមពីបងប្អូនប្រជាពលរដ្ឋផងដែរ។ ការចូលរួមសំខាន់គឺ នាំគ្នាថែរក្សាសន្តិភាពឱ្យខាងតែបាន។ ប្រជាពលរដ្ឋត្រូវយកចិត្តទុកដាក់អប់រំណែនាំកូនចៅ ឱ្យចៀសវាងអំពើអបាយមុខទាំងឡាយមានការប្រើប្រាស់គ្រឿងញៀន ល្បែងសុីសង ក្រុមបងតូចបងធំ ហើយត្រូវខិខំរៀនសូត្រ និងរៀនជំនាញវិជ្ជាជីវៈ ឱ្យបានស្ទាត់ជំនាញ ដែលអាចក្លាយជាធនធានមនុស្សដ៏សំខាន់សម្រាប់ជាតិ។
លោក ស៊ុន ចាន់ថុល បានណែនាំដល់មន្ត្រីបក្សគ្រប់លំដាប់ថ្នាក់ឱ្យខិតខំធ្វើអំពើល្អ បន្តរួមសុខរួមទុក្ខជាមួយប្រជាពលរដ្ឋស្របតាមការណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា៕
