តុលាការ ដាក់ពន្ធនាគារអតីតអភិបាលរងស្រុកកំពង់លែង និងគូកនម្នាក់ៗ ៣-៤ឆ្នាំ និងពិន័យ ៦-១០លានរៀល ពាក់ព័ន្ធទន្ទ្រានដីព្រៃលិចទឹក

ភ្នំពេញ៖ អតីតអភិបាលរងស្រុកកំពង់លែង ខេត្តកំពង់ឆ្នាំង ត្រូវបានតុលាការកាត់ជាប់ពន្ធនាគារ៣ឆ្នាំ ពិន័យ ៦លាន និងគូកន ២នាក់ទៀតជាប់ពន្ធនាគារម្នាក់ៗ ៤ឆ្នាំ និងពិន័យប្រាក់ ១០លានរៀល ពាក់ព័ន្ធការទន្ទ្រានដីព្រៃលិចទឹកនៅជុំវិញបឹងទន្លេសាប ក្រោយអង្គភាពប្រឆាំងអំពើពុករលួយ (ACU) ចាប់ខ្លួនកាលពីអំឡុងខែមេសា ឆ្នាំ២០២៤។

លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើ ពុករលួយ (ACU) បានប្រាប់មជ្ឈមណ្ឌលព័ត៌មានដើមអម្ពិលនាថ្ងៃ១២ ធ្នូថា កាលពីអំឡុង ខែមេសា ឆ្នាំ២០២៤ អង្គភាពប្រឆាំងអំពើពុករលួយបានបញ្ជូនសំណុំរឿងមួយពាក់ព័ន្ធការទន្ទ្រានដីព្រៃលិចទឹក ដែលមានជនសង្ស័យ ៣នាក់ មានឈ្មោះ ១)ពុំ សុផល ជាអតីតអភិបាលស្រុកកំពង់លែង , ២)លឹម ដានីន អតីតប្រធានការិយាល័យប្រជាពលរដ្ឋស្រុកកំពង់លែង និង៣)ជួន តុំ ម្ចាស់សិប្បកម្មទឹកកក ទៅសាលាដំបូងខេត្តកំពង់ឆ្នាំង។

លោកបន្តថា បន្ទាប់ពីនីតិវិធីជាបន្តបន្ទាប់ សំណុំរឿង នេះត្រូវបានតុលាការខេត្តកំពង់ឆ្នាំង បើកការជនុំជម្រះកាលពីថ្ងៃទី២០ វិច្ឆិកា ឆ្នាំ២០២៤ កន្លងទៅនេះ ហើយនិងបានប្រកាសសាលក្រមកាលពីព្រឹកថ្ងៃទី១២ ខែធ្នូ ឆ្នាំ២០២៤ ដោយសម្រេចផ្តទ្ទាទោសដាក់ពន្ធនាគារជនជាប់ចោទ ពុំ សុផល ចំនួន៣ឆ្នាំ និងពិន័យជាប្រាក់ចំនួន៦លានរៀល ។

ដោយឡែក ជនជាប់ចោទ លឹម ដានីន និង ជួន តុំ ដាក់ ពន្ធនាគារម្នាក់ៗ ៤ឆ្នាំ និងពិន័យជាប្រាក់ ១០លានរៀល ៕