រថយន្ត ៣គ្រឿង បុកគ្នាតាមបណ្ដោយផ្លូវជាតិលេខ៤បណ្ដាលឱ្យមនុស្សរងរបួស២នាក់

ខេត្តព្រះសីហនុ៖ គ្រោះថ្នាក់ចរាចរណ៍រថយន្ដ៣គ្រឿងបុកប៉ះគ្នាតាមផ្លូវជាតិលេខ៤ ចន្លោះគីឡូម៉ែត្រលេខ ១៥៨-១៥៩ ស្ថិតនៅភូមិមនោរម្យ ឃុំតានៃ ស្រុកព្រៃនប់ ខេត្តព្រះសី ហនុ កាលពីថ្ងៃត្រង់ថ្ងៃទី៧.១១.២០២៣ មានមនុស្ស២នាក់រងរបួ.ស និងរថយន្ត៣គ្រឿងរងការខូចខាត ។

របាយការណ៍អង្កេតជាបឋមពីនគរបាលជំនាញស្រុកព្រៃនប់ឲ្យដឹងថា គ្រោះថ្នាក់ចរាចរណ៍នេះកើតឡើង រវាងរថយន្ដ ០១គ្រឿងម៉ាក TOYOTA COASTER ពណ៌ស ពាក់ផ្លាកលេខ ភ្នំពេញ 3C-0498 (រថយន្ដដឹកអ្នកដំណើរ) មានទិសដៅពីរាជធានីភ្នំពេញឆ្ពោះទៅក្រុងព្រះសីហនុ បើកបរដោយឈ្មោះ ឡុង ប៉េងអៀង ភេទប្រុស អាយុ៤០ឆ្នាំ មានទីលំនៅភូមិកំពង់បឹង ឃុំកំពង់ហៅ ស្រុកកំពង់លែង ខេត្តកំពង់ឆ្នាំង មកដល់ចំណុចខាងលើ រថយន្តនេះបានរេចង្កូតទៅខាងឆ្វេងដៃរបស់ខ្លួន រួចបានកៀររថយន្ដ កុងតឺនរ័០១គ្រឿងចំពីចំហៀងខាងឆ្វេង ម៉ាក FUSO ពណ៌បៃតង ក្បាលរថយន្តពាក់ផ្លាកលេខ កំពង់ស្ពឺ 3A-1700 និងរ៉ឺម៉កពាក់ផ្លាកលេខ កំពង់ស្ពឺ 4A-0008 (ទិសដៅផ្ទុយគ្នា) បើកបរដោយឈ្មោះ ថុន ចាន់ថង ភេទប្រុស អាយុ២៨ឆ្នាំ មានទីលំនៅភូមិព្រៃបេង ឃុំស្ដុះ ស្រុកសំរោងទង ខេត្តកំពង់ស្ពឺ។

ក្រោយពីកៀររួច រថយន្ដម៉ាក TOYOTA COASTER ខាងលើ មិនទាន់អស់ល្បឿនក៏បន្ដទៅបុកប៉ះ រថយន្ដ ០១គ្រឿងទៀត ម៉ាក TOYOTA HINGLANDER ពណ៌ប្រផេះ ពាក់ផ្លាកលេខ ភ្នំពេញ 2AK-6127 (ទិសដៅផ្ទុយគ្នា)បើកបរដោយឈ្មោះ លី ចាន់ថេង ភេទប្រុស អាយុ៤១ឆ្នាំ មានទីលំនៅភូមិក្រាំងដូងទៃ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ មានអ្នករួមដំណើរ ០១នាក់ឈ្មោះ អោក ចិន្ដា ភេទស្រី អាយុ៣៥ឆ្នាំ មានទីលំនៅភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ។
គ្រោះថ្នាក់ចរាចរណ៍នេះបណ្ដាលឲ្យមានមនុស្សរងរបួ.សចំនួន ០២នាក់ ៖
១.ឈ្មោះ ឡុង ប៉េងអៀង ភេទប្រុស អ្នកបើកបររថយន្ដម៉ាក TOYOTA COASTER (រងរបួ.សមធ្យម)
២.ឈ្មោះ អោក ចិន្ដា ភេទស្រី អ្នករួមដំណើររថយន្ដម៉ាក TOYOTA HIGHLANDER (រងរបួ.សមធ្យម) ។
ក្រោយកើតហេតុ ជនរងគ្រោះបានបញ្ជូនទៅព្យាបាលនៅពេទ្យឯកជនវាលរេញ រីឯវត្ថុតាង(រថយន្ដ៣គ្រឿង) សមត្ថកិច្ចយកមករក្សាទុកជាបណ្ដោះអាសន្ននៅអធិការដ្ឋាននគរបាលស្រុកព្រៃនប់ដោះស្រាយបន្ត៕