សហព័ន្ធគុនខ្មែរអន្ដរជាតិ ចេញសេចក្ដីថ្លែងការណ៍ ៧ចំណុច ដើម្បីបន្ដនិរន្ដរភាពរីកចម្រើន និងពង្រឹងអភិបាលកិច្ចល្អ ក្នុងចលនាមហាគ្រួសារគុនខ្មែរពិភពលោក

(សៀមរាប)៖ សហព័ន្ធគុនខ្មែរអន្ដរជាតិ (KIF) បានចេញនូវសេចក្ដីថ្លែងការណ៍រួមចំនួន ៧ចំណុច ក្រោយមហាសន្និបាតប្រចាំឆ្នាំរបស់ខ្លួន នៅក្រុងសៀមរាប នាល្ងាចថ្ងៃទី០៥ ខែធ្នូ ឆ្នាំ២០២៤ ដើម្បីបន្ដនិរន្ដរភាពនៃការរីកចម្រើន និងពង្រឹងនូវអភិបាលកិច្ចល្អក្នុងការដឹកនាំគ្រប់គ្រងចលនាមហាគ្រួសារគុនខ្មែរពិភពលោក ដោយទទួលបានការគាំទ្រពេញទំហឹង និងយកទៅអនុវត្តពីបណ្ដាប្រទេសសមាជិកទាំងអស់។

យោងតាមខ្លឹមសារនៃសេចក្ដីថ្លែងការណ៍រួមខាងលើបានបញ្ជាក់ថា ក្នុងនាមអង្គការកីឡាគុនខ្មែរអន្ដរជាតិតែមួយគត់នៅលើពិភពលោក មានបេសកកម្ម «អភិរក្ស ដើម្បីអភិវឌ្ឍន៍គុនខ្មែរ និងអភិវឌ្ឍន៍ ដើម្បីអភិរក្សគុនខ្មែរ» ដែលជាប្រភេទយុទ្ធគុនអត្តសញ្ញាណជាតិខ្មែរ។ ក្នុងន័យនេះ KIF បានរៀបចំមហាសន្និបាតប្រចាំឆ្នាំ នៅថ្ងៃទី០៥ ខែធ្នូ ឆ្នាំ២០២៤ នៅខេត្តសៀមរាប ដោយមានប្រទេសជាសមាជិកចូលរួមផ្ទាល់ចំនួន ១៨ប្រទេស និងប្រទេសជាសមាជិកផ្ដល់សិទ្ធិប្រទាន ៤៦ប្រទេស ដែលសរុបសមាជិកចូលរួម និងសមាជិកគាំទ្រមហាសន្និបាតមានចំនួន ៦៤ប្រទេស។

ទន្ទឹមជាមួយគ្នា អង្គមហាសន្និបាត បានប្រកាសនូវសេចក្ដីថ្លែងការណ៍រួមចំនួន ៧ចំណុច ដើម្បីបន្ដនិរន្ដរភាពនៃការរីកចម្រើន លូតលាស់ឆាប់រហ័សរបស់សហព័ន្ធគុនខ្មែរអន្ដរជាតិ និងពង្រឹងអភិបាលកិច្ចល្អក្នុងការគ្រប់គ្រងដឹកនាំចលនាមហាគ្រួសារគុនខ្មែរពិភពលោក ដូចខាងក្រោម៖

១៖ បាវចនាមហាគ្រួសារគុនខ្មែរពិភពលោក «រឹងមាំទាំងអស់គ្នា Stronger Together»។
២៖ សហព័ន្ធគុនខ្មែរអន្ដរជាតិ និងសមាជិកគុនខ្មែរទាំងអស់ បានឯកភាពគ្នារក្សាឱ្យបាននូវនិរន្ដរភាពនៃការរៀបចំការប្រកួតកីឡាគុនខ្មែរជ្រើសរើសជើងឯកពិភពលោក និងការប្រកួតជើងឯកគុនខ្មែរអាស៊ីឱ្យបានទៀងទាត់ជារៀងរាល់ឆ្នាំ។
៣៖ សហព័ន្ធគុនខ្មែរអន្ដរជាតិ បាននឹងកំពុងខិតខំប្រឹងប្រែង ពង្រឹងយន្ដការគ្រប់គ្រង ដឹកនាំសហព័ន្ធ និងសមាជិកទាំងអស់ តាមយន្ដការអភិបាលកិច្ចល្អ តម្លាភាព និងស្មារតីមិត្តភាព សាមគ្គីភាព ឯកភាព និងសហប្រតិបត្តិការល្អ។
៤៖ សហព័ន្ធគុនខ្មែរអន្ដរជាតិ អំពាវនាវសុំការឧបត្ថម្ភគាំទ្រឱ្យមាន «ចលនាជាតិអភិវឌ្ឍគុនខ្មែរពិភពលោក» ដើម្បីសម្រេចបានគោលដៅយុទ្ធសាស្ដ្រជាតិ «ការបញ្ចូលកីឡាគុនខ្មែរអន្ដរជាតិទៅក្នុងការប្រកួតពហុកីឡាគ្រប់កម្រិត»។
៥៖ សហព័ន្ធគុនខ្មែរអន្ដរជាតិបន្ដបើកទ្វារចំហរជានិច្ច រង់ចាំទទួលសមាជិកភាពគុនខ្មែរពីគ្រប់ប្រទេសនៅលើពិភពលោក។
៦៖ មហាសន្និបាត និងការប្រកួតគុនខ្មែរជ្រើសរើសជើងឯកពិភពលោក លើកទី៥ ឆ្នាំ២០២៤ នឹងប្រព្រឹត្តទៅនាថ្ងៃទី០៥ ខែធ្នូ ឆ្នាំ២០២៤ ហើយបើកទូលំទូលាយដល់ប្រទេសដែលមានបំណងចង់ចូលជាសមាជិកត្រូវដាក់ពាក្យស្នើសុំមួយឆ្នាំមុន។
៧៖ សហព័ន្ធគុនខ្មែរអន្ដរជាតិប្ដេជ្ញាគោរពយ៉ាងម៉ឺងម៉ាត់ គោរពអនុវត្តនូវគោលការណ៍កីឡាយុត្តិធម៌ (Fair-Play) និងគោលការណ៍កីឡាស្អាតស្អំ (Clean Sport) ដោយគោរពបទដ្ឋានគតិយុត្ដនៃការប្រឆាំងដាច់ខាតការប្រើប្រាស់សារធាតុលើកកម្លាំង (WADA Code of Anti-Doping Rule)។

សូមបញ្ជាក់ថា ទន្ទឹមជាមួយមហាសន្និបាតប្រកបដោយផ្លែផ្កាខាងលើ គិតត្រឹមបច្ចុប្បន្នសហព័ន្ធគុនខ្មែរអន្ដរជាតិ បានកើនប្រទេសសមាជិករហូតដល់ ៦៤ប្រទេស ដែលខិតជិតនឹងដល់ការជំរុញកីឡាអត្តសញ្ញាណជាតិខ្មែរនេះ ទៅក្នុងព្រឹត្តិការណ៍ធំៗ ពិសេសកីឡាអូឡាំពិក។ ក្នុងចំណោមប្រទេសទើបចូលជាសមាជិក ក៏មានបណ្ដាប្រទេសមហាអំណាចដូចជាអាមេរិក រុស្ស៊ី និងចិន ផងដែរ។ លើសពីនេះ ឥណ្ឌូនេស៊ី ដែលជាសមាជិកយូរឆ្នាំ ក៏បានស្នើសុំ និងទទួលបានការឯកភាព ក្នុងការរៀបចំធ្វើម្ចាស់ផ្ទះការប្រកួតគុនខ្មែរជើងឯកពិភពលោក លើកទី៦ ឆ្នាំ២០២៥ បន្ទាប់ពីកម្ពុជាផងដែរ។

ចំពោះការប្រកួតគុនខ្មែរជើងឯកពិភពលោក លើកទី៥ ឆ្នាំ២០២៤ នៅកម្ពុជា នឹងប្រព្រឹត្តទៅពីថ្ងៃទី០៦-០៨ ខែធ្នូចុងសប្ដាហ៍នេះ នៅមុខសួនច្បារព្រះរាជដំណាក់ ក្រុងសៀមរាប ដោយមានប្រតិភូ និងអត្តពលិកជាង ២០ប្រទេសចូលរួមប្រកួត ក្នុងនោះក៏មានកីឡាករ-កីឡាការិនីឆ្នើមៗលំដាប់ប្រទេសរបស់កម្ពុជាចូលរួមជាច្រើនផងដែរ៕