សម្តេចតេជោ ហ៊ុន សែន ហៅការសម្រេចចិត្តរបស់សមាជិកបក្សប្រឆាំង មករួមរស់ជាមួយបក្សប្រជាជនកម្ពុជា ជាការសម្រេចចិត្តដ៏ត្រឹមត្រូវ
(ភ្នំពេញ)៖ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានហៅការសម្រេចចិត្តរបស់សមាជិកបក្សប្រឆាំងមករួមរស់ជាមួយគណបក្សប្រជាជនកម្ពុជា គឺជាការសម្រេចចិត្តមួយដ៏ត្រឹមត្រូវក្នុងការចូលរួមកសាងសង្គមកម្ពុជាឱ្យបន្តរក្សាបានសុខសន្តិភាព និងការអភិវឌ្ឍឱ្យកាន់តែរីកចម្រើន។
សម្តេចតេជោ ហ៊ុន សែន បានលើកឡើងបែបនេះនៅក្នុងជំនួបសំណេះសំណាល និងពិសាអាហារសាមគ្គីជាមួយសមាជិកគណបក្សប្រជាជនជាង២ពាន់នាក់ ដែលសុទ្ធសឹងជាសមាជិកបក្សមកពីគណបក្សប្រឆាំងទើបចូលមករួមជីវភាពនយោបាយជាមួយបក្សប្រជាជនកម្ពុជានាព្រឹកថ្ងៃទី៦ ខែវិច្ឆិកា ឆ្នាំ២០២៤ នៅវិមាន៧មករា។ ក្នុងជំនួបសំណេះសំណាល និងពិសាអាហារសាមគ្គីនេះ ក៏មានការអញ្ជើញចូលរួមពីថ្នាក់ដឹកនាំគណបក្សប្រជាជនកម្ពុជា មកពីតាមខេត្ត ក្រុង ស្រុក ឃុំ សង្កាត់ផងដែរ។
លោក យូ សិរីវុឌ្ឍ បេសកជនពិសេសរបស់សម្តេចតេជោ ហ៊ុន សែន និងជាប្រធានក្រុមការងារកសាងចលនាសមាជិកគណបក្សប្រជាជនកម្ពុជាមូលដ្ឋានរាជធានី-ខេត្ត បានឱ្យដឹងថា ចាប់តាំងពីក្រុមការងារចលនាកសាងសមាជិកបក្ស នៅមូលដ្ឋានរាជធានី-ខេត្ត បានបង្កើតឡើងនាថ្ងៃទី៣១ ខែឧសភា ឆ្នាំ២០២៤មក ក្រុមការងារបានសហការជាមួយគណៈកម្មាធិការបក្សរាជធានី-ខេត្ត និងក្រុមការងារគណបក្សចុះមូលដ្ឋានតាមបណ្តារាជធានី-ខេត្ត បានទទួលអតីតថ្នាក់ដឹកនាំបក្សប្រឆាំង និងបក្សនយោបាយផ្សេងៗ បានចំនួន ១៤,៥៣៩នាក់ ក្នុងនោះមានថ្នាក់រាជធានី និងថ្នាក់ខេត្តចំនួន ៧៧៤នាក់ ថ្នាក់ក្រុង-ស្រុក-ខណ្ឌចំនួន ១,៥៩១នាក់ ថ្នាក់ឃុំ-សង្កាត់ ចំនួន ១២,១៧៤នាក់។
លោក យូ សិរីវុឌ្ឍ បានលើកឡើងថា ដោយផ្អែកលើការការពារផលប្រយោជន៍ដ៏ឧត្តុងឧត្តមនៃប្រទេសជាតិ ការការពារនូវសុខសន្តិភាព ស្ថេរភាពនយោយនៅក្នុងសង្គមជាតិ ការពារនូវសេចក្តីសុខសាន្ត និងសុភមង្គលរបស់ប្រជាជនកម្ពុជា ដើម្បីធានាដល់ការរីកចម្រើនរបស់ប្រទេសជាតិជាយូរអង្វែង សម្តេចតេជោបានទទួលស្វាគមន៍សមាជិកបក្សដទៃទាំងក្នុង និងក្រៅប្រទេស ជាពិសេស ដើម្បីយកចំណេះវិជ្ជា និងមនសិការស្នេហាជាតិមកបម្រើប្រទេសជាតិ និងប្រជាជនកម្ពុជាជាមួយគណបក្សប្រជាជនកម្ពុជា។
លោក សិរីវុឌ្ឍ បានបន្ថែមថា តាមរយៈគោលនយោបាយប្រកបដោយព្រហ្មវិហារធម៌ និងក្តីសណ្តោសប្រណីរបស់សម្តេចតេជោ ដែលមានចំពោះជនរួមជាតិទាំងក្នុង និងក្រៅប្រទេស នាពេលបច្ចុប្បន្ននេះ គឺជាអតីតថ្នាក់ដឹកនាំប្រឆាំងតាមបណ្តាមូលដ្ឋានរាជធានី ខេត្ត ក្រុង ស្រុក ឃុំ សង្កាត់ គឺជនរួមជាតិបានមើលឃើញយ៉ាងច្បាស់ថា សម្តេចតេជោ ពិតជាអ្នកស្នេហាជាតិយ៉ាងពិតប្រាកដ តាមរយៈសកម្មភាពពិត ដោយមិនប្រកាន់និន្នាការនយោបាយ ឬកំហុសខុសឆ្គងរបស់ជនរួមជាតិនោះទេ។ លោកបន្តថា សម្តេចតេជោ តែងតែផ្តល់នូវក្តីស្រលាញ់ប្រកបដោយមនោសញ្ចេតនាជួយបងប្អូនតាមគ្រប់មធ្យោបាយ តាមដែលអាចធ្វើទៅបាន ដើម្បីជួយសម្រាលទៅដល់ការលំបាកនានា។
ក្នុងពិធីសំណេះសំណាលនេះ សម្ដេចតេជោ ហ៊ុន សែន បានប្រកាសស្វាគមន៍យ៉ាងកក់ក្តៅបំផុត ចំពោះសមាជិកថ្មីទាំងអស់ ដែលជាអតីតជាថ្នាក់ដឹកនាំ និងសមាជិកគណបក្សប្រឆាំង ដែលបានសម្រេចចិត្តចូលមករួមរស់ជាមួយគណបក្សប្រជាជនកម្ពុជា។
ក្នុងកិច្ចសំណេះសំណាលនេះ សម្តេចតេជោ ក៏បានផ្តល់អនុសាសន៍ ដើម្បីរួមចំណែកអភិវឌ្ឍប្រទេសជាតិផងដែរ។ សម្រាប់គោលដៅរយៈពេលវែងត្រូវរួមគ្នាអនុវត្តន៍នូវកិច្ចការចាំបាច់មួយចំនួនរួមមាន៖
ទី១៖ ត្រូវរក្សាឱ្យបានកត្តាសន្តិភាព ពីព្រោះថាកត្តាសន្តិភាពគឺជាកត្តាសំខាន់ មិនថា ប្រទេសណានោះទេ តែងតែត្រូវការសន្តិភាព បើគ្មានសន្តិភាព គឺមិនមានការអភិវឌ្ឍអ្វីឡើយ។
ទី២៖ ត្រូវខិតខំដើម្បីនាំប្រទេសមួយនេះ ឱ្យចាកចេញពីប្រទេសដែលមានការអភិវឌ្ឍន៍តិចតួចនៅត្រឹមឆ្នាំ២០២៩។
ទី៣៖ ត្រូវខិតខំជំរុញប្រទេសមួយនេះ ឱ្យក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ជាគោលដៅដែលបានកំណត់តាំងពីដំបូងនោះ។
ទី៤៖ ខិតខំសម្រេចឱ្យបានជាប្រទសដែលមានប្រាក់ចំណូលខ្ពស់នៅឆ្នាំ២០៥០។
សម្រាប់គោលដៅរយៈពេលខ្លី និងមធ្យមវិញនោះ សម្ដេចតេជោ បានបានណែនាំរួមគ្នាធ្វើកិច្ចការចាំបាច់មួយចំនួនដូចខាងក្រោម៖
ទី១៖ ត្រូវរួមគ្នារក្សាសន្តិភាព ស្ថេរភាពនយោបាយឲ្យបានល្អប្រសើរ។
ទី២៖ រក្សានូវស្ថេរភាពម៉ាក្រូសេដ្ឋកិច្ច និង ទប់ស្កាត់អតិផរណា។
ទី៣៖ ខិតខំរួមគ្នាវិលទៅរកកំណើនសេដ្ឋកិច្ចដូចមុនកូវីដ១៩ ក្នុងរង្វង់៧% ។
ទី៤៖ ប្តេជ្ញាកម្ចាត់ចោលក្រុមបដិវត្តន៍ពណ៍ដែលមានបំណលផ្តួលរំលំរដ្ឋាភិបាល ក្រៅប្រព័ន្ធរដ្ឋធម្មនុញ្ញ និងក្រោមប្រព័ន្ធប្រជាធិបតេយ្យ៕
