អ្នកជិះឡាន Pick Up ចង់បើកលើផ្លូវល្បឿនលឿន មិនអនុញ្ញាតិដាក់មនុស្សនៅខាងក្រោយទេ ព្រោះមូលហេតុទាំងនេះ

នាពេលថ្មីៗនេះ តាមរយៈផេកផ្លូវល្បឿនលឿនភ្នំពេញ-ក្រុងព្រះសីហនុ បានឆ្លើយតបទៅនឹងសំណួរប្រចាំសប្ដាហ៍ ដែលបានសួរថា ៖ «តើនៅលើផ្លូវល្បឿនលឿន អនុញ្ញាតឱ្យរថយន្ដប្រភេទភីកអាប់ (Pick-up) ផ្ទុកអ្នកដំណើរនៅខាងក្រោយបានដែរឬទេ?»

ទាក់ទិនទៅនឹងសំណួរនេះ ក្រុមការងារផ្លូវល្បឿនលឿនភ្នំពេញ-ក្រុងព្រះសីហនុ បានឆ្លើយតបបញ្ជាក់ឱ្យដឹងថា អ្នកមានឡាន Pick Up ចង់បើកបរលើផ្លូវល្បឿនដោយផ្ទុកអ្នកដំណើរនៅខាងក្រោយ គឺមិនអនុញ្ញាតិនោះទេ នោះគឺដោយសារតែកត្តាទាំងនេះ៖

– ជៀសវាងគ្រោះថ្នាក់ ឬ ឧបទ្ទវហេតុ កើតឡើងតាមដងផ្លូវ

– បង្កហានិភ័យខ្ពស់ដល់អាយុជីវិតអ្នករួមដំណើរ

គួរឱ្យដឹងផងដែរថា កាលពីពេលកន្លងទៅ ក្រុមការងារផ្លូវល្បឿនលឿន ភ្នំពេញ-ក្រុងព្រះសីហនុ ក៏ធ្លាប់បានក្រើនរំឭកបន្ថែមអំពីចំណុចសំខាន់ៗមួយចំនួន ដែលអ្នកបើកបរ និង អ្នករួមដំណើរគួរយល់ដឹង ដែលមានដូចជា៖

១. ហាមបើកបរត្រឡប់ក្រោយ

២. ហាមបើកបរបញ្រ្ចាសទិស ឬ ថយក្រោយ

៣. ហាមបើកបរលើសល្បឿនកំណត់

៤. ហាមដឹកអ្នកដំណើរនៅក្រោយរថយន្តភីកអាប់

៥. ហាមបោះសំរាមចោលតាមផ្លូវ

៦. ហាមឈប់លើគន្លងឈប់បន្ទាន់ដោយគ្មានករណីអាសន្ន៕