សម្តេច ហ៊ុន ម៉ាណែត សម្រេច«បញ្ចប់តំណែង»លោក កន សុខកាយ ពីអភិបាលស្រុកល្វាឯម

ភ្នំពេញ៖ សម្ដេច ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី ៨ តុលានេះ បានចេញនូវអនុក្រឹត្យសម្រេចបញ្ចប់តំណែង លោក កន សុខកាយ ពីអភិបាលស្រុកល្វាឯម ខេត្តកណ្តាល។ជាអនុក្រឹត្យធ្វើឡើង ក្រោយពីលោកអភិបាលស្រុករូបនេះ ជាប់ពាក់ព័ន្ធផ្តល់ថវិកា៣០ម៉ឺនដុល្លារជូនលោកលី សាម៉េត (ហៅគ្រូមា) ដើម្បីបានទទួលតំណែងជាអភិបាលស្រុកល្វាឯម។

យោងតាមអនុក្រឹត្យ សម្ដេច ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្រេចបញ្ចប់តំណែង លោក កន សុខកាយ ពីអភិបាលស្រុកល្វាឯម ខេត្តកណ្តាល ដោយសារ សាមីខ្លួនបានប្រព្រឹត្តកំហុសក្រមសីលធម៌ និងវិជ្ជាជីវៈ ធ្ងន់ធ្ងរ ផ្ទុយនឹងច្បាប់ស្តីពីសហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា។

លោក កន សុខកាយ ឋានន្តរស័ក្តិវរមន្ត្រី ថ្នាក់លេខ១ ត្រូវបានសម្តេច ហ៊ុន សែន អតីតនាយករដ្ឋមន្ត្រីនៃកម្ពុជា បានចេញអនុក្រឹត្យតែងតាំងឲ្យកាន់មុខតំណែងជាអភិបាលស្រុកល្វាឯម ខេត្តកណ្តាល ជំនួសលោក ភឹម ភីរ៉ា អភិបាលស្រុកចាស់ កាលពីថ្ងៃទី ៩ មីនា ឆ្នាំ២០២០។

នៅថ្ងៃទី ៧ តុលា ឆ្នាំ២០២៤ម្សិលមិញ សម្តេច ហ៊ុន សែន ទម្លាយរឿងឆបោករបស់លោក លី សាម៉េត ហៅគ្រូមា និង ស្នើឱ្យរដ្ឋមន្ត្រីក្រសួងយុត្តិធម៌ និង តុលាការ ចេញដីកាបង្កកទ្រព្យសម្បត្តិ លី សាម៉េត។ ក្នុងករណីនោះក៏មានជាប់ពាក់ព័ន្ធ លោក កន សុខកាយ ដែលបានយកលុយចំនួន៣០ម៉ឺនដុល្លារទៅសូកប៉ាន់ លោក លី សាម៉េត ដើម្បីបានតំណែងជាអភិបាលស្រុកល្វាឯម ហើយព័ត៌មានរងការរិះគន់ជាខ្លាំងពីមហាជន រហូតមានការបញ្ចប់តំណែងលោក កន សុខកាយ ពីអភិបាលស្រុកល្វាឯម៕