ជនសង្ស័យម្នាក់ លួចចូលដល់ក្នុងបន្ទប់កូនស្រីគេជាន់ទី២ បំណងលួចទូរស័ព្ទ តែជនរងគ្រោះឃើញទាន់ ស្រែក….

ភ្នំពេញ ៖ កាលពី ល្ងាច ថ្ងៃទី១ ខែវិច្ឆិកា ឆ្នាំ២០២៣ នៅចំណុច បុរីហេង ឃាង ផ្ទះលេខA២ ផ្លូវបេតុង ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។

មុនពេលកើតហេតុ ជនរងគ្រោះឈ្មោះ តាំង ឈុនបួយ ភេទស្រី អាយុ២៩ឆ្នាំ មុខរបរលក់ដូរ កំពុងសម្រាកនៅក្នុងបន្ទប់ជាន់ទី២ ផ្ទះកើតហេតុ ដោយបានសាកថ្មទូរស័ព្ទដៃ០១គ្រឿងម៉ាក iphone 14 ពណ៌ខ្មៅ លើក្បាលដំណេកខាងឆ្វេង ហើយជនរងគ្រោះក៏ដេកលក់ទៅ ។ បន្ទាប់មកជនសង្ស័យជាកម្មករសំណង់ជួសជុលផ្ទះក្បែរផ្ទះជនរងគ្រោះបានឃើញទ្វារដំបូលចំហទ្វារ ក៏បានលួចចូលទៅខាងក្នុងផ្ទះ ហើយឃើញជនរងគ្រោះ ដេកលក់នៅក្នុងបន្ទប់ រួចដាក់សាកថ្មទូរស័ព្ទដៃលើក្បាលដំណេក ក៏បានចូលក្នុងបន្ទប់ជនរងគ្រោះ រួចធ្វើសកម្មភាពលួចទូរសព្ទដៃខាងលើ ស្រាប់តែជនរងគ្រោះភ្ញាក់ដឹងខ្លួនទាន់ ឃើញជនសង្ស័យកំពុងលួចទូរសព្ទដៃរបស់ខ្លួន ក៏បានស្រែកឆោឡោឲ្យអ្នកជិតខាងជួយ តែត្រូវជនសង្ស័យយកដែកផ្លែទួណឺវ៉ីសចាក់ក និងវាយជនរងគ្រោះ ស្របពេលកម្លាំងសមត្ថកិច្ចប៉ុស្តិ៍នគរបាលរដ្ឋបាលដង្កោ កំពុងជិះម៉ូតូល្បាតក្នុងមូលដ្ឋានក្បែរកន្លែងកើតហេតុ បានឮជនរងគ្រោះស្រែកឲ្យជួយ សមត្ថកិច្ចក៏បានជួយអន្តរាគមន៍ឃាត់ខ្លួនជនសង្ស័យខាងលើ រួមនិងវត្ថុតាងយកមកប៉ុស្តិ៍នគរបាលរដ្ឋបាលដង្កោធ្វើការសាកសួរតាមនីតិវិធីច្បាប់ ។

ជនសង្ស័យមានឈ្មោះ គឹម ម៉រ៉ាឌី ភេទប្រុស អាយុ៣៣ឆ្នាំ មុខរបរមិនពិតប្រាកដ ស្នាក់នៅការដ្ឋានសំណង់ហេងឃាង ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ សម្ភារៈវត្ថុតាងបន្សល់ទុករួមមាន ទូរស័ព្ទដៃម៉ាក iphone 14 ចំនួន០១គ្រឿង, ផ្លែទួណឺវ៉ីសចំនួន០១, ដែកសម្រាប់ឆ្កឹះសោរចំនួន០២ និង កន្ត្រៃកាត់ក្រចកចំនួន០១ ៕