កំពុងផ្ទុះការចាប់អារម្មណ៍នឹងសំណេរមួយរបស់រាជិនីសំឡេង ម៉េង កែវពេជ្ជតា ដែលបានរៀបរាប់ពីការសំណូមពររបស់អ្នកគាំទ្រ ឱ្យរៀបចំ Solo Concert នៅក្នុងស្រុកខ្មែរលើកទី ៣
កាលពីថ្មីៗនេះ អ្នកលេងបណ្តាញសង្គមហ្វេសប៊ុក កំពុងផ្ទុះការចាប់អារម្មណ៍នឹងសំណេរមួយរបស់រាជិនីសំឡេង ម៉េង កែវពេជ្ជតា ដែលបានរៀបរាប់ពីការសំណូមពររបស់អ្នកគាំទ្រ ឱ្យអ្នកនាងរៀបចំការប្រគំតន្ត្រីទោល។
ក្នុងនោះ តារាចម្រៀងរៀមច្បងរូបនេះ ក៏បានឱ្យដឹងថា បើគិតចាប់តាំងពីឆ្នាំ ១៩៩៧ មក អ្នកនាង បានរៀបចំការប្រគំតន្ត្រីទោល ២ ដង មកហើយ ហើយបើសិនជាលើកនេះ កើតឡើងម្តងទៀត គឺជាលើកទី ៣។
សំណេរនោះ អ្នកនាង ម៉េង កែវពេជ្ជតា រៀបរាប់ថា៖ «មាន Fans ជាច្រើន ទាំងក្នុងប្រទេស ក្រៅប្រទេសដែលសំណូមពរហើយ សំណូមពរទៀតឱ្យ ពេជ្ជតា ធ្វើ Solo Concert។ សូមអរគុណណាស់ដែលនៅតែជឿជាក់ ពេជ្ជតា ។ មិនចម្លែកទេសម្រាប់ ពេជ្ជតា ព្រោះបើសិនជា ពេជ្ជតា ធ្វើ Solo Concert ក្នុងស្រុកលើកនេះ គឺជាលើកទី ៣ ហើយ រាប់តាំងពីឆ្នាំ ១៩៩៧ មក។ ហ្វេនៗជាច្រើនធ្លាប់បានឃើញ និង ចងចាំ ។ ចំណែកក្រៅស្រុកវិញមិនបាច់រាប់ទេច្រើនពេក ហើយក្នុងមួយលើកៗច្រៀងមិនតិចជាង ៥០ បទ ឡើយ មានតែលើសផង មានគ្រប់ចង្វាក់ គ្រប់រសជាតិ ឱ្យតែភ្លេងចេះលេង និង អាស្រ័យដោយពេលវេលាដែលគេឱ្យយើង ។ ចាំបន្តិចណា Fans ណា៎! ចាំ ពេជ្ជតា រកបទចម្រៀងសិន មិនដឹងថាត្រូវច្រៀងបទណាទុកបទណីទេ»។
ក្រោយពីឃើញការរៀបរាប់របស់ អ្នកនាង ម៉េង កែវពេជ្ជតា ហើយ មានអ្នកគាំទ្រ និង អ្នកលេងបណ្តាញសង្គមហ្វេសប៊ុកជាច្រើន បានចូលទៅបញ្ចញមតិគាំទ្រ និង អន្ទះសាចង់ឱ្យរាជិនីសំឡេងរូបនេះ រៀបចំការប្រគំតន្ត្រីទោលឱ្យបានលឿនបំផុត៕
