២រឿងកុំធ្វើពេលព្រឹក ៣រឿងកុំប៉ះពេលយប់ និង១កុំធ្វើមុនចូលគេង នឹងជួយអ្នករស់បានយូរ ក្មេងជាងវ័យ
ទាំងនេះជារឿងដែលអ្នកគួរនិងមិនគួរធ្វើ ដើម្បីឲ្យបានសុខភាពល្អ។
១. កុំហាត់ប្រាណដោយចលនាខ្លាំងៗនៅពេលព្រឹក
ហាត់ប្រាណនៅពេលព្រឹកបន្ទាប់ពីក្រោកពីគេង គឺជាទម្លាប់ល្អ តែបើអ្នកមិនបានយកចិត្តទុកដាក់ខ្ពស់នោះទេ នឹងនាំមកនូវហានិភ័យដល់រាងកាយមិនខាន។ ក្រោយពីគេងរយៈពេលយូរ រាងកាយនៅអស់កម្លាំងនៅឡើយ មិនទាន់អាចវិលមកសភាពធម្មតាភ្លាមៗនោះទេ។ ដូច្នេះ ពេលភ្ញាក់ពីគេងភ្លាម ត្រូវសម្រាក៣នាទីសិន សឹមក្រោក ដើម្បីរង់ចាំឲ្យចរន្តឈាមរត់បានស្រួលតាមមុខងាររបស់វា។ បន្ទាប់មក អ្នកអាចហាត់ប្រាណដោយកាយវិការស្រាលៗ ដើម្បីចៀសវាងបញ្ហាបេះដូង ឬជំងឺសរសៃប្រសាទ។
២. កុំងូតទឹកក្តៅនៅពេលព្រឹក
ងូតទឹកក្តៅនៅពេលព្រឹក នឹងធ្វើឲ្យសសៃឈាមរីក ដែលបណ្តាលឲ្យឆាប់ងងុយគេង។ ហេតុនេះ នៅពេលព្រឹកគួរងូតទឹកត្រជាក់ មិនមែនទឹកក្តៅឡើយ។
៣. កុំផឹកកាហ្វេ ឬតែនៅពេលយប់
នៅពេលយប់ បើអ្នកផឹកកាហ្វេ ឬតែច្រើន វាប៉ះពាល់ដល់ខួរក្បាលងាយនឹងកើតស្រ្តេស អស់កម្លាំង និងគេងមិនលក់។ គេងមិនលក់យូរទៅនឹងជះឥទ្ធិពលដល់សុខភាពបានងាយបំផុត រហូតក្លាយជាជំងឺផ្សេងៗដូចជា សម្ពាធឈាមឡើងខ្ពស់ ជំងឺបេះដូង ឬដាច់សសៃឈាមខួរក្បាលជាដើម។
៤. កុំញ៉ាំអាហារបំពងនៅពេលល្ងាច
អ្នកគួរមកហូបអាហារស្ងោរ ឬចំហុយវិញដែលល្អសម្រាប់សុខភាព។ ការញ៉ាំអាហារបំពងនៅពេលល្ងាច មិនត្រឹមធ្វើឲ្យឆាប់ឡើងគីឡូទេ តែក៏ងាយបណ្តាលឲ្យហើមពោះ ជះផលអវិជ្ជមានលើមុខងាររំលាយអាហាររបស់ក្រពះផងដែរ។
៥. កុំញ៉ាំពពួកសាច់ក្រហមនៅពេលយប់
ថ្វីបើពពួកសត្វក្រហមសម្បូរប្រូតេអ៊ីនក៏ដោយ តែវាត្រូវការប្រើរយៈពេលយូរដើម្បីឲ្យក្រពះរំលាយជាងពពួកអាហារផ្សេងៗ។ ដូច្នេះ បើអ្នកចង់ឆាប់គេងលក់ គួរចៀសវាងញ៉ាំសត្វក្រហមនៅពេលល្ងាច ឬយប់ តែគួរជ្រើសរើសអាហារឆាប់រំលាយដូចជា ពពួកសាច់ស ដូចជាត្រី មាន់ បន្លែពណ៌បៃតង ឬផ្លែឈើជាដើម។
៦. កុំប្រើប្រាប់គ្រឿងអេឡិចត្រូនិកមុនចូលគេង
មុនចូលគេង បើអ្នកចំណាយពេលមើលទូរសព្ទ ឬកុំព្យូទ័រ នោះអ្នកច្បាស់ជាគេងមិនងាយលក់ភ្លាមៗទេ។ ក្នុងពេលជាមួយគ្នានេះដែរ គ្រឿងអេឡិចត្រូនិកទាំងនោះក៏ជះឥទ្ធិពលដល់ខួរក្បាល ធ្វើឲ្យមុខឆាប់ចាស់ និងអាក្រក់ថែមទៀត។ ហេតុនេះ មុនចូលគេង១ -២ ម៉ោង គប្បីកុំមើលទូរសព្ទ ឬកុំព្យូទ័រអី៕
ប្រភព៖ Phunutoday