ដីកាបង្គាប់ឱ្យចាប់ខ្លួន និងឃុំខ្លួនស្ត្រីម្នាក់ ជាប់ចោទពីបទ.ឆបោក

ភ្នំពេញ ៖ កាលពីថ្ងៃទី២៧ ខែតុលា ឆ្នាំ២០២៣ ដោយអនុវត្តតាមដីកាបង្គាប់ឲ្យចាប់ខ្លួន និងឃុំខ្លួន របស់ចៅក្រមជំនុំជម្រះសាលាដំបូងរាជធានីភ្នំពេញ ស្ត្រីម្នាក់ត្រូវបានកម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ ចាប់ខ្លួនបញ្ជូនទៅតុលាការ ដើម្បីយកទៅឃុំខ្លួនតាមអំណាចសាលក្រម ដែលបានផ្តន្ទាទោសដាក់ពន្ធនាគារលើជនជាប់ចោទកំណត់២ ឆ្នាំ ។

តាមអំណាចសាលក្រមព្រហ្មទណ្ឌលេខ ៣៧២៣ “ថ” ចុះថ្ងៃទី១០ ខែវិច្ឆិកា ឆ្នាំ២០២១ បានសម្រេចផ្តន្ទាទោសជនជាប់ចោទឈ្មោះ ផាន់ លីឆេង ភេទស្រី អាយុ៣១ ឆ្នាំ ស្នាក់នៅផ្ទះលេខ៣៦៦ ផ្លូវលេខ៣៥ ភូមិឬស្សី១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដាក់ពន្ធនាគារកំណត់២ ឆ្នាំ និងពិន័យជាប្រាក់ចំនួន ២លានរៀល ជាប់ចោទពីបទ.ឆបោក ប្រព្រឹត្តនៅរាជធានីភ្នំពេញ កាលពីថ្ងៃទី១៣ ខែកុម្ភៈ ឆ្នាំ២០២០ ដែលបទល្មើសមានចែងឲ្យផ្តន្ទាទោសតាមបញ្ញតិមាត្រា ៣៧៧ និងមាត្រា៣៧៨ នៃក្រមព្រហ្មទណ្ឌ ។ ជនជាប់ចោទត្រូវបានសមត្ថកិច្ច នាំទៅជូនស្ថាប័នអយ្យការអមសាលាដំបូង ដើម្បីចេញដីកាសម្រេចឃុំខ្លួនដាក់ពន្ធនាគារតាមអំណាចសាលក្រមនោះ ៕