បុគ្គលជោគជ័យ និង គួរឱ្យគោរព អ្នកឧកញ៉ា គិត ម៉េង សេដ្ឋីវាល់លាន ប្រាប់ពីមូលហេតុច្បាស់ៗ អានហើយដាស់ស្មារតីខ្លាំង
ជាបុគ្គលជោគជ័យ និង គួរឱ្យគោរព អ្នកឧកញ៉ា គិត ម៉េង សេដ្ឋីវាល់លាននៅស្រុកខ្មែរ តែងត្រូវបានមហាជនកោតសរសើរអំពីភាពខ្លាំងរបស់លោក។ មិនថាមមាញឹកនឹងជំនួញកម្រិតណា ជារឿយៗ លោក តែងឆ្លៀតចែករំលែកគន្លឹះ ក៏ដូចជាបទពិសោធជីវិត នៅលើបណ្តាញសង្គម ដើម្បីជាប្រយោជន៍រួមទៅកាន់មហាជន។
យ៉ាងណាមិញ ថ្មីៗនេះ អ្នកឧកញ៉ា គិត ម៉េង បានបង្ហោះសារមួយដ៏ចាក់ដោត ដែលត្រូវបំផុតចំពោះអ្នកឧស្សាហ៍មានលេស។ លោកបានលើកឡើងពីពាក្យលេសមួយចំនួនចំៗ និង ហេតុផលយ៉ាងលម្អិត អាចជាការដាស់តឿនស្មារតីដ៏មានថាមពល។ លោកបានសរសេររៀបរាប់ដូចខាងក្រោម៖
«យើងមិនគួរមានលេសច្រើនក្នុងជីវិតរបស់យើងទេ
លេសគឺជារបាំងដែលយើងដាក់រារាំងខ្លួនយើងមិនឱ្យធ្វើសកម្មភាព និងសម្រេចបាននូវសក្តានុពលរបស់យើង។
លេសមួយចំនួនដែលយើងឮជារៀងរាល់ថ្ងៃ មានដូចជា “ខ្ញុំមិនមានពេល” “ខ្ញុំហត់ណាស់” “ការងារនោះពិបាកពេក” “ខ្ញុំមិនល្អគ្រប់គ្រាន់” “ខ្ញុំនឹងធ្វើវានៅថ្ងៃស្អែក” “ខ្ញុំមិនមានលុយគ្រប់គ្រាន់” “ខ្ញុំមិនដឹងថាត្រូវចាប់ផ្តើមពីណា” “ខ្ញុំរវល់ណាស់” “នេះមិនមែនជាពេលវេលាត្រឹមត្រូវ” “ខ្ញុំមានការប្តេជ្ញាចិត្តផ្សេងទៀតជាច្រើន” “ខ្ញុំខ្លាចបរាជ័យ” “គ្មាននរណាម្នាក់គាំទ្រខ្ញុំទេ” “ខ្ញុំនឹងរង់ចាំរហូតដល់ខ្ញុំត្រៀមខ្លួនឱ្យបានគ្រប់គ្រាន់ថែមទៀត” “ខ្ញុំមិនមានកម្លាំង” និង “ខ្ញុំមិនដែលធ្វើវាពីមុនទេ”…។
លេសគឺជាគ្រោះថ្នាក់ ពីព្រោះវាសម្រាលភាពតានតឹង ឬការថប់បារម្ភបានបណ្តោះអាសន្នតែប៉ុណ្ណោះ។ ផ្ទុយទៅវិញ សម្រាប់រយៈពេលវែង លេសទាំងនោះផ្តល់ផលអាក្រក់ទៅលើទិដ្ឋភាពផ្សេងៗនៃជីវិតរបស់យើង ដោយធ្វើឱ្យផលិតភាពយើងថយចុះ តម្លៃ និង ទំនុកចិត្តមកលើខ្លួងឯងធ្លាក់ចុះដោយគិតថាខ្លួនមិនល្អ ឬគ្មានសមត្ថភាព។ លេសធ្វើឱ្យយើងខកខានឱកាសសម្រាប់ភាពរីកចម្រើន និង ការអភិវឌ្ឍខ្លួនទៅមុខ ដោយសារតែយើងចេះតែលើកពេលធ្វើកិច្ចការ រហូតធ្វើឱ្យការងារកាន់តែច្រើន ហើយក៏ធ្វើឱ្យកើនភាពតានតឹងក្នុងចិត្ត។ លេសទាំងនោះហើយដែលធ្វើឱ្យយើងជាប់គាំងនៅក្នុងតំបន់សុខស្រួលរបស់យើង ដោយធ្វើឱ្យជីវិតយើងខ្វះភាពរីករាយ និង មិនទទួលបានបទពិសោធថ្មីៗ។
ដល់ពេលដែលអ្នកឈប់រកលេសហើយ។ ប្រសិនបើអ្នកតាំងចិត្តយ៉ាងមុតមាំក្នុងការធ្វើឱ្យសម្រេចអ្វីមួយ អ្នកនឹងត្រូវជម្នះឧបសគ្គឱ្យបាន ដោយមិនត្រូវយកលេសណាមួយមកធ្វើជារបាំងរារាំងគោលដៅរបស់អ្នកទ្បើយ។
នៅពេលយើងឈប់យកលេសជារៀងរហូត យើងនឹងបង្កើតឱ្យមាននូវឱកាសថ្មីៗរាប់មិនអស់សម្រាប់ខ្លួនយើង និង ធ្វើឱ្យជីវិតពោរពេញដោយសកម្មភាព ភាពរីកចម្រើន និង ភាពរីករាយ។ សូមមានទំនួលខុសត្រូវ ហើយហ៊ានប្រឈមនឹងបញ្ហា ដោយការតាំងចិត្ត និង ភាពក្លាហាន និង ទទួលយកការផ្លាស់ប្តូរបែបវិជ្ជមាន និង មានន័យ ដោយបញ្ចប់នូវការយកលេស»៕
