ឃា-ត់-ខ្លួនក្មេ-ងទំនើង២នាក់ ដែលបានថតវីដេអូបង្ហាញអាវុធដូចជាដាវ ជំពាមកៅស៊ូ គំរាមដៃគូលើបណ្ដាញសង្គមហ្វេសប៊ុក

ខេត្តក្រចេះ៖ ឃាត់ខ្លួនក្មេងទំនើងពីរនាក់ ដែលបានថតវីដេអូបង្ហាញអាវុធដូចជាដាវ ជំពាមកៅស៊ូគំរាមដៃគូលើបណ្ដាញសង្គមហ្វេសប៊ុក កាលពីរសៀលថ្ងៃទី២៤ ខែតុលា ឆ្នាំ២០២៣ យកមកវាស់កម្ពស់អប់រំណែនាំ និងកោះហៅឪពុកម្តាយឱ្យមកធានាក្មេងទំនើងទាំងពីរយកទៅអប់រំបន្ថែមនៅឯគេហដ្ឋាន…។

ក្រោយទទួលបានបទបញ្ជាភ្លាម កម្លាំងនគរបាលប៉ុស្តិ៍ បានចុះឃាត់ខ្លួនក្មេងទំនើងចំនួន០២នាក់ ក្នុងចំណោម០៣នាក់ ពាក់ព័ន្ធនឹងករណីថតវីឌីអូបង្ហោះលើបណ្ដាញសង្គមហ្វេសប៊ុកដែលបានគំរាមទៅដល់ដៃគូទំនាស់របស់ខ្លួន និងបណ្តាប្រជាពលរដ្ឋផ្សេងទៀតដែលបានធ្វើដំណើរឆ្លងកាត់ផ្លូវចូលទៅកាន់វត្តស្នួល។

ក្មេងទំនើងទាំងបីនាក់នោះ រួមមាន៖ ទី១-ឈ្មោះ ជ្រេន សុខហៃ ភេទប្រុស អាយុ១៥ឆ្នាំ រស់នៅភូមិព្រែកក្ដី ឃុំស្នួល ជាម្ចាស់គណនីហ្វេសបុកផេកឈ្មោះ Mey x you។ ទី២-ឈ្មោះ ម៉យ លីតា ភេទប្រុស អាយុ១៦ឆ្នាំ ជាអ្នកថតវីដេអូ។ និង៣-ឈ្មោះ ណាន់ សុខន ភេទប្រុស អាយុ១៨ឆ្នាំ ជាអ្នកកាន់ដាវ (រត់គេចខ្លួន) ខណៈអ្នកទាំងពីររស់នៅភូមិស្នួលលិច ឃុំស្នួល។

សមត្ថកិច្ចជំនាញនៃអធិការដ្ឋាននគរបាលស្រុកស្នួល បានចុះបង្ក្រាបក្រុមក្មេងទំនើង០៣នាក់ បានថតវីដេអូគំរាមបង្ហោះ កាលពីថ្ងៃទី២៣តុលា ឆ្នាំ២០២៣ លើបណ្ដាញសង្គមហ្វេសបុកផេក Mey x you ដែលមានខ្លឹមសារថា «ជិះចូលស្នួលវត្ត ជិះឱ្យស្លូតទៅ ប្រយ័ត្នគ្រាប់ជំពាមហោះ បំណងល្អពីអញ Liat» ដោយក្នុងវីដេអូនោះ មានកាន់ដាវចំនួន០១ផងដែរ។ ប្រតិបត្តិការឃាត់ខ្លួនក្មេងទំនើងដែលបង្កភាពអនាធិបតេយ្យ និងបង្កភាពភ័យខ្លាចនៅក្នុងសង្គមនេះ សមត្ថកិច្ចឃាត់ខ្លួនបានចំនួន២នាក់ ដោយម្នាក់រត់គេចខ្លួនបាត់ស្រមោលតែអាជ្ញាធរនឹងតាមចាប់យមមកណែនាំនៅពេលក្រោយទៀត។ បច្ចុប្បន្ន ក្មេងទំនើង២នាក់នេះ ត្រូវបានអាជ្ញាធរធ្វើការណែនាំ អប់រំ ចុះកិច្ចសន្យាឱ្យបញ្ឈប់ការបង្ហោះលើបណ្ដាញសង្គមហ្វេសប៊ុកនូវរាល់សកម្មភាពទំនើង ការគំរាមកំហែង បង្កការភ័យខ្លាច ធ្វើឱ្យប៉ះពាល់ដល់ សន្តិសុខ សណ្តាប់ធ្នាប់សង្គមតទៅទៀត និងបានអនុញ្ញាតឱ្យអាណាព្យាបាលធ្វើ លិខិតធានាត្រឡប់ទៅលំនៅដ្ឋានវិញ ដើម្បីណែនាំអប់រំបន្ត៕