តារាចម្រៀងរ៉េបរូបសង្ហា លោក ជី ដេវីត បានបង្ហាញពីភាពកតញ្ញូចំពោះលោកប៉ា ដោយទិញរថយន្តថ្មីសន្លាងជូនគាត់ ជាកាដូនៅក្នុងទិវាគុណបុណ្យលោកឪពុក

នៅលើបណ្ដាញសង្គមហ្វេសប៊ុក អ៊ីនស្ដាក្រាម និង Tiktok ជាដើម គេឃើញសិល្បករ ក៏ដូចជាអ្នកប្រើប្រាស់បណ្ដាញសង្គមជាច្រើន បាននាំគ្នាបង្ហោះរូបភាពរបស់លោកឪពុក នៅក្នុងទិវាគុណលោកឪពុក កាលពីថ្ងៃទី ១៦ ខែមិថុនា ឆ្នាំ ២០២៤ ដើម្បីបង្ហាញពីសេចក្ដីស្រឡាញ់ និង ការដឹងគុណចំពោះគាត់។

ក្រៅពីពាក្យពេចន៍ជូនពរលោកឪពុកប្រកបដោយក្ដីស្រឡាញ់ និង ភាពកក់ក្ដៅ គេក៏បានឃើញតារាចម្រៀងរ៉េបរូបសង្ហា លោក ជី ដេវីត បានបង្ហាញពីភាពកតញ្ញូចំពោះលោកប៉ា ដោយទិញរថយន្តថ្មីសន្លាងជូនគាត់ ជាកាដូនៅក្នុងទិវាគុណបុណ្យលោកឪពុកនេះ។

ក្រោយទទួលបានអំណោយយ៉ាងពេញចិត្តពីកូនប្រុសភ្លាម លោក រស់ កុសល ដែលជាលោកប៉ាបង្កើតរបស់តារាចម្រៀងរ៉េប ជី ដេវីត បានបង្ហាញកាដូថ្មី រួចថតបង្ហោះនៅលើគណនីហ្វេសប៊ុកអរគុណដល់កូនៗថា ៖ «អរគុណកូនប្រុសកូនស្រី កាដូសម្រាប់ទិវាលោកឪពុក Dit way forever»។ ចំណែកលោក ជី ដេវីត វិញ ក៏បង្ហាញក្ដីរីករាយដែលឃើញលោកប៉ាជាទីស្រឡាញ់មានសុខភាពល្អ និង បានជូនពរលោកប៉ាថា ៖ «សូមគង់ជាម្លប់កូនចៅចម្រើនដោយធម៌»៕