តួឯកប្រុសស្រីរឿង «ទុំទាវ» មានជីវិតគ្រួសារយ៉ាងក្ដីសុខរៀងៗខ្លួននៅក្រៅប្រទេស

មហាជនអ្នកគាំទ្រវិស័យភាពយន្តខ្មែរសុទ្ធសឹងតែបានជ្រាបហើយពីលោក ស៊ុក សុភា និង អ្នកនាង ដាញ់ ម៉ូនីកា ដែលជាអតីតតារាសម្ដែងខ្មែរដ៏ល្បី និង អ្នកទាំងពីរជាដៃគូដ៏ស័ក្តិសមក្នុងការសម្ដែងភាពយន្តខ្មែរ ជាពិសេសស្នាដៃសម្ដែងរបស់អ្នកទាំងពីរក្នុងសាច់រឿងបុរាណខ្មែរ «ទុំទាវ» ជាភាពយន្តល្បីល្បាញរន្ទឺ និង ដក់ជាប់ក្នុងចិត្តមហាជនជាមួយសាច់រឿងជីវិតស្នេហាដ៏កំសត់របស់តួអង្គទាំងពីរ។

យ៉ាងណាមិញ ជាច្រើនឆ្នាំមកនេះ អតីតតារាសម្ដែងប្រុសស្រីមួយគូនេះពុំមានវត្តមានក្នុងវិស័យសិល្បៈ និង ប៉ះគ្នាសម្ដែងក្នុងភាពយន្តណាមួយទៀតឡើយ ដោយអ្នកទាំងពីរបានដកខ្លួនចេញវិស័យសិល្បៈនេះទាំងស្រុង ដែលបានងាកទៅសាងជីវិតគ្រួសាររៀបការមានប្រពន្ធកូន និង ចេញទៅរស់នៅលើទឹកដីអូស្រ្តាលីរៀងៗខ្លួនផងដែរ។

១. អ្នកនាង ដាញ់ ម៉ូនីកា

បើចាប់អារម្មណ៍ចំពោះជីវិតឯកជនរបស់អតីតតារាសម្ដែងស្រី ដាញ់ ម៉ូនីកា ក្រោយពីឃ្លាតឆ្ងាយពីវិស័យសិល្បៈជាច្រើនឆ្នាំកន្លងទៅនេះ អ្នកនាងហាក់ទទួលបានក្ដីសុខយ៉ាងពេញទំហឹង ដែលបានសាងគ្រួសារជាមួយស្វាមី ទទួលបានកូនប្រុសស្រីចំនួន ២ នាក់ និង កំពុងចាយជីវិតយ៉ាងសោយសុខ ខណៈអ្នកនាង និង ស្វាមី ចាប់ដៃគ្នារកស៊ីកាន់កាប់មុខជំនួញលក់ផលិតផលតាមអនឡាញកំពុងកាក់កបខ្លាំងផងដែរ។ យ៉ាងណាមិញ មួយរយៈមុន ជីវិតគ្រួសាររបស់អតីតតារាសម្ដែងរូបនេះបានធ្វើឱ្យអ្នកគាំទ្រចាប់អារម្មណ៍ខ្លាំង ខណៈឃើញថាអ្នកនាងកាន់តែបង្ហាញជីវិតអភិជន មិនត្រឹមសោយសុខមានសុភមង្គលលើទឹកដីអូស្ត្រាលីនោះទេ ក៏បានឃើញអ្នកនាងបង្ហាញគម្រោងផ្ទះវីឡាយ៉ាងធំស្កឹមស្កៃនៅស្រុកខ្មែរ ព្រមទាំងអ្នកនាង និង ស្វាមី បានចំណាយលុយរាប់ម៉ឺនបើកមុខជំនួញថ្មីមួយនៅស្រុកខ្មែរទៀតផង។

២. លោក ស៊ុក សុភា 

ចំពោះអតីតតារាសម្ដែងប្រុសរូបសង្ហា ស៊ុក សុភា ក្រោយពីដកខ្លួនពីវិស័យសិល្បៈប្រមាណជាង ១១ ឆ្នាំមកនេះ លោកបានចាកចេញពីប្រទេសកំណើតទៅរស់នៅសាងគ្រួសារនឹងភរិយារូបស្រស់នៅប្រទេសអូស្រ្ដាលី ព្រមទាំងទទួលបានចំណងដៃកូនប្រុសស្រីរស់នៅប្រកបដោយក្ដីសុខ។ ដ្បិតថាមួយរយៈមុន ស៊ុក សុភា និង ភរិយា ធ្លាប់មានការរកាំរកូសនឹងគ្នាមែន ប៉ុន្ដែក្រោយមកប្ដីប្រពន្ធអ្នកទាំងពីរក៏បានជានាគ្នាវិញ និង បានសាងគ្រួសារកាន់តែមានសុភមង្គលផ្អែមល្ហែមលើសដើម។ ម្យ៉ាងវិញទៀត ក្រឡេកទៅមើលការប្រើជីវិតនៅលើទឹកដីប្រទេសអូស្រ្ដាលី លោក ស៊ុក សុភា និង ភរិយា រស់នៅក្នុងជីវិតបែបអភិជនបំផុត ដែលតែងឃើញបង្ហាញពីការចាយជីវិតហាយសូរទិញរបស់ហ្វ្រេនៗ ជិះរថយន្តទំនើបៗ រស់នៅផ្ទះធំទ្រនំខ្ពស់ផងដែរ៕