អាជ្ញាធរជប៉ុនបានសម្រេចចិត្តដាក់ជញ្ជាំងបាំងកន្លែងទស្សនាទេសភាពភ្នំ Fuji នៅមុខហាងទំនិញ Lawson ដែលជាមុំថតរូបដ៏ល្បី

ថ្មីៗនេះ អាជ្ញាធរជប៉ុនបានសម្រេចចិត្តដាក់ជញ្ជាំងបាំងកន្លែងទស្សនាទេសភាពភ្នំ Fuji នៅមុខហាងទំនិញ Lawson ដែលជាមុំថតរូបដ៏ល្បី ដោយសារតែមានបញ្ហារឿងអ្នកទេសចរបុកមកទស្សនាច្រើន ព្រមទាំងប្រព្រឹត្តកិរិយាមិនសមរម្យ មានទាំងចោលសំរាមផ្តេសផ្តាស និងមាត់ឡូឡា ដែលធ្វើឱ្យប៉ះពាល់ដល់ប្រជាជននៅតំបន់នោះ។

ជញ្ជាំងនេះដែរ ជាជញ្ជាំងស្តើងពណ៌ខ្មៅ ដែលមានកម្ពស់ ២.៥ សង់ទីម៉ែត្រ​ និងប្រវែង ២០ ម៉ែត្រ ប៉ុន្តែបើទោះជាបិទជញ្ជាំងបែបនេះទៅហើយ មើលទៅក៏មិនអាចហាមឃាត់មិនឱ្យជនមួយចំនួន ចូលទៅទស្សនាបានដែរ ដោយក្នុងនោះ មិនទាន់បានប៉ុន្មានថ្ងៃផង គេប្រទះឃើញរន្ធតូចៗប្រហែលជា ១០ រន្ធនៅលើជញ្ជាំងនោះ ដែលគេស​ន្និដ្ឋានថា ជាស្នាដៃរបស់ជនមួយចំនួន​ ដោយព្យាយាមហែកនៅពេលដែលសន្តិសុខមិននៅ ដើម្បីបានថតរូបទិដ្ឋភាពរបស់ភ្នំ។

យ៉ាងណាមិញ មហាជននៅតាមបណ្តាញសង្គមកំពុងតែផ្ទុះការរិះគន់ទៅលើរឿងនេះខ្លាំងណាស់ ដោយម្នាក់ៗចង់ឱ្យមានការរឹតបន្តឹងជាងនេះ។ លើសពីនេះទៅទៀត លោកអភិបាលក្រុង Hideyuki Watanabe ក៏បានណែនាំអ្នកទេសចរឱ្យទៅទស្សនាភ្នំនៅមុំកន្លែងផ្សេងៗទៀតផងដែរ៕