បុរសម្នាក់បានបោកក្បាលនៅនឹងផ្លូវស្លាប់បាត់បង់ជីវិតយ៉ាងអាណោចអាធ័ម ខណៈពេលជិះម៉ូតូទៅធ្វើការត្រូវរថយន្តមិនស្គាល់ម៉ាក បើកស្របទិសមកបុកយ៉ាងពេញទំហឹង

ភ្នំពេញ ៖ បុរសម្នាក់បានបោកក្បាលនៅនឹងផ្លូវស្លាប់បាត់បង់ជីវិតយ៉ាងអាណោចអាធ័ម ខណៈពេលជិះម៉ូតូទៅធ្វើការត្រូវរថយន្តមិនស្គាល់ម៉ាក បើកស្របទិសមកបុកយ៉ាងពេញទំហឹងអូសទៅមុខជាច្រើនមែន ហើយរថយន្តបង្កបន្តល្បឿនបើករត់គេចខ្លួនបាត់ស្រមោល។

ហេតុការណ៍គ្រោះថ្នាក់ចរាចរណ៍ខាងលើនេះដែរ បង្កឲ្យមានការភ្ញាក់ផ្អើលកាលពីវេលាម៉ោង ៩និង២០នាទីយប់ ថ្ងៃទី២១ខែតុលាឆ្នាំ២០២៣ ត្រង់ចំណុចមុខក្រុមហ៊ុនPK លើផ្លូវមហាវិថីឈ្នះឈ្នះស្ថិតក្នុង ភូមិត្រពាំងវែង សង្កាត់គោករកា ខណ្ឌព្រែកព្នៅ រាជធានីភ្នំពេញ។

សពជនរងគ្រោះមានឈ្មោះ អេង សុខមាន ភេទប្រុស អាយុ២៦ឆ្នាំ មានទីលំនៅក្នុងភូមិពោធិវាល សង្កាត់សួង ក្រុងសួង ខេត្តត្បូងឃ្មុំ។

បើយោងតាមការបញ្ជាក់ពីសមត្ថកិច្ចជំនាញចរាចរណ៍ បានឲ្យដឹងថា នៅមុនកើតហេតុដោយមានបុរសម្នាក់ មិនស្គាល់អត្តសញ្ញាណបានបើករថយន្ដមួយគ្រឿង មិនស្គាល់ម៉ាកធ្វើដំណើរលើផ្លូវមហាវិថីឈ្នះឈ្នះ ក្នុងទិសដៅពីកើតទៅលិចក្នុងល្បឿនលឿន លុះពេលបើកមកដល់កន្លែងកើតហេតុខាងលើ បានបុកពីក្រោយម៉ូតូមួយគ្រឿងម៉ាកហុងដាឌ្រីមសង់C125 ពណ៌ខ្មៅ ពាក់ផ្លាកលេខ ភ្នំពេញ 1IN-5549 ជិះដោយបុរសរងគ្រោះម្នាក់ ធ្វើដំណើរនៅពីមុខរថយន្តលើមហាវិថីឈ្នះឈ្នះ ក្នុងទិសដៅពីកើតទៅលិចស្របគ្នា ចំពីក្រោយពេញទំហឹងអូសទៅមុខជាច្រើនម៉ែត្រ បណ្តាលឲ្យជនរងគ្រោះផ្លោងចេញពីម៉ូតូបោកក្បាល នៅហ្នឹងផ្លូវស្លាប់ភ្លាមៗ ហើយរថយន្តបង្កបន្តល្បឿនបើករត់គេចខ្លួនបាត់ស្រមោល។

បន្ទាប់ពីកើតហេតុខាងលើសមត្ថកិច្ចមូលដ្ឋាន សហការជាមួយជំនាញចរាចរណ៍ បានចុះទៅដល់រួចវាស់វែងយកម៉ូតូជនរងគ្រោះ០១គ្រឿង ទៅរក្សាទុកនៅអធិការដ្ឋាននគរបាលខណ្ឌព្រែកព្នៅ ដើម្បីបន្តនិតិវិធិ ។ រួចធ្វើកំណត់ហេតុប្រគល់សព ឲ្យទៅក្រុមគ្រួសារយកទៅធ្វើបុណ្យតាមប្រពៃណី៕