លោក ហេង វិសាល និង អ្នកជិតដិតក្បែរខ្លួនប្ដូរ Profile ទៅជាពណ៌ខ្មៅ ពេលនេះមានការបកស្រាយហើយ

ប្រិយមិត្តដែលជាអ្នកគាំទ្រលោក ហេង វិសាល កំពុងនាំគ្នាភ្ញាក់ផ្អើលប្រកបដោយក្ដីបារម្ភ ខណៈនៅព្រឹកថ្ងៃទី ២៣ ខែឧសភា ឆ្នាំ ២០២៤ នេះ Influencer ដ៏ល្បីល្បាញរូបនេះ និង មនុស្សជិតដិតក្បែរខ្លួនប៉ុន្មានរូបទៀត មានដូចជាលោក ហេង វាសនា, កញ្ញា លីនដា, កញា Jennie និង Influencer ប៉ុន្មានរូបទៀត បាននាំគ្នាប្ដូររូប Profile ហ្វេសប៊ុក ឬផេក ទៅជាពណ៌ខ្មៅ។

អ្វីដែលគួរឱ្យចាប់អារម្មណ៍ Influencer ល្បីៗប៉ុន្មានរូបនេះ មិនត្រឹមតែប្ដូររូប Profile ហ្វេសប៊ុក ឬផេក ទៅជាពណ៌ខ្មៅស្របពេលគ្នានោះទេ ប៉ុន្ដែនៅក្នុងរូបភាពពណ៌ខ្មៅនោះ ក៏មានសរសេរអក្សរដូចៗគ្នាថា ៖ «ដល់ពេលហើយ It’s Time» ធ្វើឱ្យអ្នកគាំទ្រជាច្រើន កាន់តែងឿងឆ្ងល់ ចំណែកខ្លះក៏បារម្ភខ្លាចកើតរឿងមិនល្អណាមួយចំពោះពួកគេ។

យ៉ាងណាមិញ ស្រាប់តែនៅមុននេះបន្តិច លោក ហេង វាសនា ដែលគេស្គាល់ជាបងប្រុសបង្កើតរបស់លោក ហេង វិសាល បានបង្ហោះសារបញ្ជាក់ ដើម្បីកុំឱ្យអ្នកគាំទ្រមានការយល់ច្រឡំថា ៖ «អ្នកទាំងអស់គ្នា អរគុណដែលបារម្ភ, សារនេះគឺចង់ប្រាប់ថាគ្មានរឿងអ្វីមិនល្អកើតឡើងចំពោះពួកយើងទេ, ហើយសមាជិកយើងគឺសុខសប្បាយដូចគ្នា, ស្រឡាញ់អ្នកទាំងអស់គ្នា!»៕