ស្អែកនេះសម្តេចបវរធិបតី ហ៊ុន ម៉ាណែត នឹងអញ្ជើញទៅគោរពវិញ្ញាណក្ខន្ធ អតីតប្រធានរដ្ឋឡាវ

ភ្នំពេញ៖ នៅថ្ងៃទី៥ ខែមេសា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា នឹងដឹកនាំគណៈប្រតិភូជាន់ខ្ពស់អញ្ជើញទៅគោរពវិញ្ញាណក្ខន្ធ នាយឧត្តមសេនីយ៍ ខាំតៃ ស៊ីផាន់ដន អតីតប្រធានគណៈកម្មាធិការមជ្ឈិមនៃបក្សបដិវត្តន៍ឡាវ និង ជាអតីតប្រធានរដ្ឋឡាវ ដែលបានទទួលមរណភាព កាលពីថ្ងៃទី២ ខែមេសា ឆ្នាំ២០២៥។

បេីតាមសេចក្ដីប្រកាសព័ត៌មានរបស់ក្រសួងការបរទេសខ្មែរ បានឲ្យដឹងថា អញ្ជើញអមដំណើរ សម្តេចធិបតី រួមមានលោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រី ព្រមទាំងមន្ត្រីសំខាន់ៗនៃរាជរដ្ឋាភិបាលកម្ពុជា។

ក្រោមការដឹកនាំរបស់លោក ខាំតៃ ស៊ីផាន់ដន ប្រទេសឡាវបានពង្រឹងទំនាក់ទំនងដ៏ រឹងមាំយូរអង្វែងក្នុងភាពជាអ្នកជិតខាងល្អ សាមគ្គីគ្នាប្រកបដោយភាតរភាព និងកិច្ចសហប្រតិបត្តិការ ល្អប្រពៃជាមួយកម្ពុជា ៕