កម្លាំងពិសេស 911 បានចុះអន្តរាគមន៍រុករកសពយុវជនដឹកជញ្ជូន Nham24 លោតសម្លាប់ខ្លួនពីលើស្ពានជ្រោយចង្វារ.!!.

ភ្នំពេញ ៖ រហូតមកដល់ល្ងាចថ្ងៃទី ២៩ ខែកញ្ញាឆ្នាំ ២០២៣ កម្លាំងពិសេស 911 បានចុះអន្តរាគមន៍រាវរកសពយុវជនដឹកជញ្ជូនញ៉ាំ 24 ម៉ោងដែលលោតសម្លាប់ខ្លួនពីលើស្ពានជ្រោយចង្វារកាលវេលាម៉ោង ០៧និង២៥នាទីព្រឹកស្ថិតត្រង់ចំណុចមិត្តភាពកម្ពុជា ជប៉ុន ជ្រោយចង្វារ ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។

សូមបញ្ជាក់ផងដែរថាយុវជនដែលលោតទឹកសម្លាប់ខ្លួនពីលើស្ពានជ្រោយចង្វារត្រូវបានប្រជាពលរដ្ឋប្រទះឃើញបង្កឲ្យមានការភ្ញាក់ផ្អើលឡើងនៅវេលាម៉ោង ០៧:២៥នាទីព្រឹកថ្ងៃទី ២៩ ខែកញ្ញាឆ្នាំ ២០២៣និងរាយការណ៍ទៅសមត្ថកិច្ចមូលដ្ឋានចុះមកពិនិត្យនៅនឹងកន្លែងកើតហេតុ។

មន្ត្រីនគរបាលមូលដ្ឋានបានបញ្ជក់ឲ្យដឹងថា ជនរងគ្រោះមាន ឈ្មោះ សុខ វិសាល ភេទប្រុស ភស្តុតាងបន្សល់នៅកន្លែងកើតហេតុរួមមាន ម៉ូតូស៊ុយស៊ូគី និច ពណ៌សលាយខៀវ ពាក់ស្លាកលេខ ភ្នំពេញ 1GS-1987ធុងដឹកអីវ៉ាន់អនឡាញនៅជាប់លើម៉ូតូ ពណ៌ខៀវស្រាល និមិត្តសញ្ញាសម្គាល់ (២៤ញ៉ាំ) និងស្បែកជើងមួយគូ ចំពោះ ភស្តុតាងទាំងអស់នេះ សមត្ថកិច្ចយកទៅរក្សាទុកជាបណ្ដោះអាសន្ននៅប៉ុស្តិ៍រដ្ឋបាលជ្រោយចង្វារ និងបន្តស្វែងរកសាច់ញាតិ ។

លុះមកដល់វេលាល្ងាចថ្ងៃខែឆ្នាំដដែលត្រូវបានកម្លាំងសមត្ថកិច្ចអន្តរាគមន៍ពិសេស 911 បានដឹកសម្ភារៈចុះមករាវរករហូតមកដល់ម៉ោង០៧និង០០នាទីនេះនៅមិនទាន់រកសពជនរងគ្រោះឃើញនៅឡើយទេ តែទោះជាយ៉ាងណាកម្លាំងអន្តរាគមន៍ពិសេស 9 11 នៅតែបន្តរុករកសពជនរងគ្រោះតទៅទៀត។