ផ្ដើមពីទំនាស់ពាក្យសម្ដី! នគរបាលម្នាក់បាញ់ប្រហារ២នាក់ប្ដីប្រពន្ធបណ្ដាលឲ្យរងរបួស នៅសង្កាត់ព្រែកឫស្សី ក្រុងតាខ្មៅ, ខ្មាន់កាំភ្លើងត្រូវចាប់ខ្លួនបានភ្លាមៗ

(កណ្ដាល)៖ មន្ដ្រីនគរបាលពាក់ស័ក្ដិ៥នាក់ បម្រើការនៅអគ្គនាយកដ្ឋានភស្ដុភារ និងហិរញ្ញវត្ថុ ក្រសួងមហាផ្ទៃ ត្រូវបានកម្លាំងនគរបាលខេត្តកណ្ដាលចាប់ខ្លួនភ្លាមៗ បន្ទាប់ពីបានធ្វើសកម្មភាពបាញ់ប្រហារទៅលើ២នាក់ប្ដីប្រពន្ធ បណ្ដាលឲ្យរងរបួស ដោយផ្ដើមចេញពីទំនាស់ពាក្យសម្ដី។

ហេតុការណ៍នេះបានកើតឡើងនៅយប់ថ្ងៃទី១៧ ខែវិច្ឆិកា ឆ្នាំ២០២៤ នៅចំណុចបន្ទប់ជួលលេខ៣ ភូមិព្រែកឫស្សីលិច សង្កាត់ព្រែកឫស្សី ក្រុងតាខ្មៅ ខេត្តកណ្តាល។ ជនរងគ្រោះ២នាក់ប្ដីប្រពន្ធឈ្មោះ ស៊ាង តូម៉ា អាយុ៥៤ឆ្នាំ មុខរបរលក់កង់បី (ត្រូវចំនួន៣គ្រាប់) និងប្រពន្ធឈ្មោះ ជា សុភី អាយ៥៤ឆ្នាំ មុខរបរនៅផ្ទះ (ត្រូវ១គ្រាប់ ចំជើងខាងស្តាំ)។

ដោយឡែក ខ្មាន់កាំភ្លើងឈ្មោះ សយ សុផានី អាយុ៥៩ឆ្នាំ ជាមន្ដ្រីនគរបាល ឋានន្តរស័ក្តិ វរសេនីយ៍ឯក តួនាទីជាប្រធានសាខាប្រមូលថវិការចំណូល នាយកដ្ឋានផែនការសេដ្ឋកិច្ច និងហិរញ្ញវត្ថុ នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ មានទីលំនៅភូមិព្រែកឫស្សីលិច សង្កាត់ព្រែកឫស្សី ក្រុងតាខ្មៅ ខេត្ដកណ្តាល។

តាមការបំភ្លឺរបស់ប្រជាពលរដ្ឋដែលនៅក្បែរកន្លែងកើតហេតុ បានឲ្យដឹងថា ជនរងគ្រោះជួលបន្ទប់លេខ២ ជាមួយប្តីប្រពន្ធ និងចៅចំនួន២នាក់ ជាប់បន្ទប់ជាមួយជនសង្ស័យដែលជួលបន្ទប់លេខ៣ ជាប់គ្នា តែងតែមានពាក្យសំដីមិនត្រូវគ្នា រឿងបញ្ហាផឹកស៊ីមាត់ឡូឡាលឺៗ នៅមុខបន្ទប់។

លុះនៅថ្ងៃទី១៧ ខែវិច្ឆិកា ឆ្នាំ២០២៤ វេលាម៉ោង២០៖៣០នាទី ជនសង្ស័យឈ្មោះ សយ សុផានី បានអង្គុយសរសេររបាយការណ៍នៅមុខបន្ទប់ ស្រាប់តែជនរងគ្រោះទាំង២នាក់ បានជិះម៉ូតូកង់បី (PassApp) មកដល់បន្ទប់មានសភាពស្រវឹងទាំង ២នាក់ បានមកដល់មុខបន្ទប់ក៏ធាក់ទ្វារបន្ទប់ ហើយដើរធាក់ដើមស្វាយ ហើយស្រែកជេរដោយពាក្យសំដីធ្ងន់ៗ។

ពេលនោះក៏ជនសង្ស័យស្រែកហៅម្ទាស់ផ្ទះជួលឲ្យជួយមកមើល ស្រាប់តែជនរងគ្រោះបានដើរចេញមកក្រៅ ជេរសម្លេងលឺៗ ក៏ធ្វើឲ្យជនសង្ស័យប៉ះពាក្យសំដី ក៏ជនរងគ្រោះបានដើរចូលបន្ទប់ជនសង្ស័យ ធ្វើឲ្យជនសង្ស័យយកកាំភ្លើងចេញមក ក៏បាញ់ទៅលើជនរងគ្រោះចំនួន៤គ្រាប់ បណ្ដាលឲ្យជនរងគ្រោះត្រូវរបួសដេកដួលមុខបន្ទប់ និងប្រពន្ធជនរងគ្រោះត្រូវចំភ្លៅ។

បន្ទាប់មកកម្លាំងអធិការដ្ឋាននគរបាលក្រុងតាខ្មៅ និងកម្លាំងប៉ុស្តិ៍រដ្ឋបាលព្រែកឫស្សី បានឃាត់ខ្លួនជនសង្ស័យ ព្រមទាំងវត្ថុតាង យកមកសួរនាំ និងកសាងសំណុំរឿងចាត់ការតាមនីតិវិធី។

តាមការរៀបរាប់របស់ជនស្ស័យបានឲ្យដឹងថា ជនរងគ្រោះមកពីផឹកស៊ីស្រវឹង បានជេរទៅលើជនសង្ស័យមិនមានមូលហេតុ ហើយបានរករឿងជនសង្ស័យដល់ក្នុងបន្ទប់ ក៏មានចិត្តខឹងទាញកាំភ្លើងបាញ់មកលើជនរងគ្រោះប្រាកដមែន។ បច្ចុប្បន្នជនសង្ស័យខាងលើ បានឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងតាខ្មៅ៕