ឥណ្ឌា ពិចារណាបន្ធូរបន្ថយវិធានការទប់ស្កាត់ការនាំចេញអង្ករ

(ញូវដែលី)៖ ប្រទេសឥណ្ឌាកំពុងពិចារណាបន្ធូរបន្ថយវិធានការទប់ស្កាត់ការលក់អង្ករមិនមែនពូជបាស្មាទីទៅបរទេស ដែលដំណឹងនេះបានកើតមានឡើងតែប៉ុន្មានថ្ងៃប៉ុណ្ណោះបន្ទាប់ពីបានលុបចោលតម្លៃអប្បបរមាសម្រាប់ការនាំចេញអង្ករប្រណិត ហើយការបន្ធូរបន្ថយណាមួយអាចជំរុញការផ្គត់ផ្គង់អង្ករពិភពលោក។ នេះបើយោងតាមទីភ្នាក់ងារព័ត៌មាន Bloomberg។

ឥណ្ឌា ដែលជាប្រទេសនាំចេញអង្ករធំបំផុតរបស់ពិភពលោកបានដាក់កម្រិតការលក់អង្ករទៅបរទេសអស់រយៈពេលជាងមួយឆ្នាំក្នុងគោលបំណងរក្សាតម្លៃក្នុងស្រុក។ ទីភ្នាក់ងារព័ត៌មាន Bloomberg បានរាយការណ៍កាលពីខែកក្កដាថា ឥណ្ឌាគ្រោងនឹងបន្ធូរបន្ថយការទប់ស្កាត់ការនាំចេញពូជអង្ករមួយចំនួន ដើម្បីជៀសវាងការកកស្ទះអង្ករនៅក្នុងប្រទេស មុនពេលដំណាំរដូវកាលថ្មីចូលមកដល់ក្នុងខែតុលា។

ដោយសំដៅលើការរឹតបន្តឹងបច្ចុប្បន្នលើអង្ករមិនមែនពូជបាស្មាទី លោក Sanjeev Chopra រដ្ឋមន្ត្រីក្រសួងស្បៀងអាហាររបស់ប្រទេសឥណ្ឌាបានប្រាប់អ្នកយកព័ត៌មាននៅក្នុងទីក្រុងញូវដែលីកាលពីថ្ងៃពុធថា៖ «ការណ៍នេះស្ថិតក្នុងការ ពិចារណា»។ លោកបានបន្ថែមថា «អ្វីៗទាំងនេះមានការប្រែប្រួលខ្លាំង ហើយយើងនឹងធ្វើការសម្រេចចិត្តដ៏សមស្រប» អាស្រ័យលើតម្រូវការរបស់ប្រទេស និងស្តុកដែលអាចរកបាន។

ប្រទេសឥណ្ឌាកាលពីសប្តាហ៍មុនបានលុបចោលវិធានការកំណត់តម្លៃនាំចេញអប្បបរមាសម្រាប់អង្ករពូជបាស្មាទី ដើម្បីបង្កើនការប្រកួតប្រជែងរបស់ខ្លួននៅក្នុងទីផ្សារពិភពលោក និងពង្រីកការនាំចេញ។

កិច្ចប្រឹងប្រែងបន្ថែមដើម្បីលុបចោលឧបសគ្គក្នុងការនាំចេញ អាចជួយធ្វើឱ្យតម្លៃអង្ករនៅអាស៊ីធ្លាក់ចុះ ដែលកាលពីខែមករាបានកើនឡើងដល់កម្រិតខ្ពស់បំផុតក្នុងរយៈពេលជាង ១៥ឆ្នាំ ហើយនៅតែកើនឡើងក្នុងតម្លៃជាប្រវត្តិសាស្ត្រ។ នេះជាដំណឹងល្អសម្រាប់ប្រទេសមួយចំនួននៅអាហ្វ្រិកខាងលិចនិងមជ្ឈិមបូព៌ា ដែលជាធម្មតាពឹងផ្អែកលើការនាំចូលអង្ករពីប្រទេសឥណ្ឌា។

ប្រទេសអាស៊ីខាងត្បូងមួយនេះបានចាប់ផ្តើមហាមឃាត់ ឬបន្ថែមពន្ធលើពូជស្រូវសំខាន់ៗក្នុងឆ្នាំ២០២២ ក្នុងកិច្ចខិតខំប្រឹងប្រែងដើម្បីពង្រឹងការផ្គត់ផ្គង់ក្នុងស្រុក និងទប់ស្កាត់អតិផរណាអាហារនៅមុនការបោះឆ្នោតជាតិ។ នេះបើយោងតាមទីភ្នាក់ងារព័ត៌មាន Bloomberg៕