ព្យុះទីហ្វុង យ៉ាកជី (Yagi) បានវាយប្រហារលើប្រទេសហ្វីលីពីនរយៈពេល ២ ថ្ងៃជាប់គ្នា បង្កជាគ្រោះទឹកជំនន់ និង រអិលបាក់ដីធ្ងន់ធ្ងរ

ព្យុះទីហ្វុង យ៉ាកជី (Yagi) បានវាយប្រហារលើប្រទេសហ្វីលីពីនរយៈពេល ២ ថ្ងៃជាប់គ្នា បង្កជាគ្រោះទឹកជំនន់ និង រអិលបាក់ដីធ្ងន់ធ្ងរ និង ថែមទាំងបណ្ដាលឱ្យមនុស្សយ៉ាងហោចណាស់ ១១ នាក់បានបាត់បង់ជីវិត។

នៅយប់ថ្ងៃទី ០១ ខែកញ្ញា ឆ្នាំ ២០២៤ កន្លងទៅ (ពេលវេលាក្នុងតំបន់) ព្យុះទីហ្វុង យ៉ាកជី បានបោកបក់កាត់តំបន់ Bicol ភាគអាគ្នេយ៍ក្រុងម៉ានីល ដែលបណ្ដាលឱ្យសាលារៀន រួមទាំងការិយាល័យរដ្ឋាភិបាលនៅក្រុងម៉ានីល ត្រូវបានបិទជាបណ្ដោះអាសន្នសិន ខណៈការដឹកជញ្ជូនតាមផ្លូវទឹកនៅតំបន់ដែលមានព្យុះក៏ត្រូវផ្អាកសិនដែរ។

បើតាមអ្នកនាំពាក្យប្រចាំក្រុងបានបញ្ជាក់ថា មនុស្សយ៉ាងហោចណាស់ ១១ នាក់បានស្លាប់ដោយសារតែព្យុះមួយនេះ ដោយក្នុងនោះជនរងគ្រោះ ៣ នាក់បានស្លាប់ដោយគ្រោះរអិលបាក់ដីនៅតំបន់ Antipolo។ សាកសពជនរងគ្រោះ ៤ នាក់ផ្សេងទៀតដែលស្លាប់ដោយការលង់ទឹក ត្រូវបានប្រទះឃើញនៅព្រឹកថ្ងៃទី ០២ ខែកញ្ញា កន្លងទៅក្នុងទីតាំង ៣ កន្លែងផ្សេងៗគ្នា។ ជាមួយគ្នានោះដែរ នៅក្រុង Naga ដែលជាក្រុងរងគ្រោះធ្ងន់ធ្ងរដែរនោះ ខាងក្រុមសង្គ្រោះបានរកឃើញសពបុរសម្នាក់ស្លាប់ដោយឆក់ខ្សែភ្លើង និង ក្មេងស្រីម្នាក់ទៀតស្លាប់ដោយលង់ទឹក។ ចំណែកនៅក្រុង Cebu ជួបគ្រោះរអិលបាក់ដីបណ្ដាលឱ្យមនុស្ស ២ នាក់បានស្លាប់ផងដែរ។

គួរបញ្ជាក់ថា គិតត្រឹមថ្ងៃទី ០២ ខែកញ្ញា កន្លងទៅ ពលរដ្ឋប្រមាណជា ៣០០ នាក់នៅកំពុងជម្លៀសខ្លួននៅឡើយ ខណៈទឹកជំនន់ក្នុងក្រុងកំពុងស្រកចុះបន្តិចម្ដងៗ។ ព្យុះទីហ្វុង យ៉ាកជី បានបោកបក់ទៅភាគខាងជើងកោះ Luzon កាលពីរសៀលថ្ងៃទី ០២ ខែកញ្ញា កន្លងទៅជាមួយកម្លាំងខ្យល់ពី ៧៥ គីឡូម៉ែត្រក្នុងមួយម៉ោង ទៅ ៨៥ គីឡូម៉ែត្រក្នុងមួយម៉ោង។ ព្យុះនេះដែររំពឹងថានឹងវាយប្រហារដល់ខេត្ត Isabela នៅថ្ងៃទី ០៣ ខែកញ្ញានេះ៕

ប្រភព៖ VN Express